Samuel Pakhatnak 31:1-13
-
Saul le a fapa pathum thihnak (1-13)
31 Filistin mi nih Israel mi cu an doh hna. Israel mi cu Filistin mi hna hmai in an zam i Gilboa Tlang ah mi tampi an thi.
2 Filistin mi nih Saul le a fapale kha a hleiin an doh hna i Saul fapa pathum Jonathan, Abinadab le Malkhishua kha an thah hna.
3 Saul zong kha fak chinchin in an doh. Thal kah thiam hna nih Saul kha an hmuh i cei ngai in an hliam.
4 Saul nih a hriamnam putu cu “Na vainam kha zuk law rak ka that. Cu lo ahcun cuarpar tan lomi hna cu an ra lai i puarhrangpi in an ka thah sual lai” tiah a ti. Asinain a hriamnam putu nih a ṭih tuk caah a that duh lo. Cucaah Saul nih vainam kha a tun i a bawh hnawh.
5 A hriamnam putu nih Saul a thihmi kha a hmuh tikah anih zong a vainam cung ah cun a bawk ve i a thi.
6 Cucaah Saul, a fapa pathum, a hriamnam putu le a mi vialte cu mah ni ah an thi dih.
7 Israel ralkap pawl an zammi, Saul le a fapale an thihmi kha horkuang le Jordan Tiva pawng ah a ummi Israel mi hna nih an theih tikah an khua kha kaltak in an zam. Filistin mi cu an ra i an khua kha an rolh hna.
8 A thaizing ah Filistin mi cu a thimi hna thilthuam lak ding in an kal tikah Gilboa Tlang ah Saul le a fapa pathum an thihmi kha an hmuh.
9 Cun Saul a lu kha an tan i a ralthuam kha an phoih. Cu hnuah Filistin ram pumpi ah lamkal an thlah hna i an siasal biakinn hna le mizapi sinah thawng an thanhter hna.
10 Saul a ralthuam kha Ashtoreth milem biakinn ah an chiah i a ruak tu cu Beth-shan khua kulhnak vanpang ah an thlai.
11 Filistin mi nih Saul a ruak an tuahto ning kha Jabesh-gilead khuami nih an theih tikah,
12 ralkap vialte cu zan khuadei an kal i Saul le a fapale ruak kha Beth-shan khua kulhnak vanpang in an ṭhumh hna. Jabesh khua ah an kirpi hna i mei in an khangh.
13 An ruh kha an lak i Jabesh khua, tamarisk thingkung* tang ah an phum. Cu hnuah nisarih chung rawl an ul.
Footnotes
^ Mah kung cu a hnah a dip i a par cu sendaang asiloah a raangmi rong a si.
