Samuel Pakhatnak 10:1-27
10 Samuel nih chiti thawl kha aa lak i Saul lu ah a toih. Cun a hnamh i hitin a ti: “Jehovah nih a miphun hruaitu ding ah chiti aan thuh cang.
2 Nihin ka sinin na kir tikah Benjamin ram, Zelzah i Rachel thlan pawng ah mi pahnih he nan i tong lai. Annih nih ‘Na kawlmi laa cu an hmuh cang. Atu na pa cu laa kong ah si loin nangmah kong tu ah a lungre a thei cang. “Ka fapa cu a rak phan rih lo, zeitindah ka tuah lai?” tiah a ti’ tiin an in chimh lai.
3 Cuka in Tabor i thingkung nganpi a umnak tiang va kal law a hmaanmi Pathian biak awkah Bethel lei a kalmi pa pathum he nan i tong lai. Pakhat nih meheh no pathum aa put lai, pakhat nih changreu hlum thum aa put lai i a dang pakhat nih mitsur zu ralca nganpi pakhat aa put lai.
4 Annih nih zeidah na lawh tiah an in hal lai i changreu hlum hnih an in pek lai, cu tikah changreu kha vaa lak te.
5 Cu hnuah khuavengtu Filistin ralkapbu an umnak a hmaanmi Pathian tlangbo ah va kal. Khua chung na phanh tikah biaknak hmunsang in a rak ṭummi profet phu khat he nan i tong lai. Annih nih profet bia an chim lioah mi cu an hmaiah kal in hri sihmi ringawn tumnak, khuangte, thonglawi le tingtang kha an tum lai.
6 Cu tikah Jehovah thlarau nih ṭhawnnak aan pek lai i anmah he profet bia na chim kho ve lai. Nang cu midang pakhat bantuk in naa thleng lai.
7 Cu hmelchunhnak hna an tlin tikah a hmaanmi Pathian cu na sinah a um tinak a si caah na tuah khawhmi zeipaoh va tuah te.
8 Cu hnuah Gilgal ah va kal chung. Kei zong khangh thawinak le hawikomhnak thawinak pekchanh awkah ka rak ṭum ve te lai. Ka phanh hlan tiang ni sarih chung rak ka hngak. Cu tikah zeidah na tuah awk a si ti kha kaan chimh te lai.”
9 Samuel sinin Saul a kalle cangka Pathian nih Saul a lungthin cu midang pakhat lungthin bantuk ah a thlen. Cu ni ah hmelchunhnak vialte cu a tling dih.
10 Cuka in tlangbo ah an kal i profet phu khat he an i tong. Cu cangka cun Pathian thlarau nih ṭhawnnak a pek caah an lakah profet bia cu a chim ve.
11 A rak hngalmi hna nih profet hna he profet bia a chim vemi kha an hmuh tikah “Kish fapa cung ah zeidah a cang? Saul cu profet maw a si ve?” tiah pakhat le pakhat an i ti.
12 Cu tikah pa pakhat nih “A dang profet hna i an pale cu tah ahote dah an si kun?” tiah a ti. Cuticun “Saul zong profet maw a si ve?” timi bia* a hung um.
13 Saul cu profet bia a chim dih tikah biaknak hmunsang ah a va kai.
14 Saul a pate nih Saul le a hnu zultu kha “Khoika ah dah nan kal?” tiah a hal hna tikah “Laa kan kawl, asinain kan hmu lo i Samuel sinah kan kal” tiah a leh.
15 A pate nih Saul cu “Samuel nih zeidah aan chimh hna? Rak ka chim” tiah a ti tikah,
16 “Laa cu an hmuh cang hna tiah a kan chimh” tiin a leh. Asinain siangpahrang na si lai tiah Samuel nih a timi kha cu a chim lo.
17 Cun Samuel nih Mizpah i Jehovah hmaiah Israel mi cu a pumh hna i,
18 hitin a ti hna: “Israel Pathian Jehovah bia cu hihi a si: ‘Keimah cu Izipt ram in aan chuahpitu hna, nanmah aan hremtu Izipt mi hna kut in le ram vialte kut chung in aan khamhtu hna ka si.
19 Asinain atu cu harnak le thil ṭhalo vialte chung in nanmah aan khamhtu hna Pathian kha nan hlawt i “A kan uktu ding ah siangpahrang rak kan thimpiak” tiah nan ti. Atu Jehovah hmaiah nan phun ning cio in le nan chungkhar ning cio in dir u.’”
20 Samuel nih Israel phun vialte kha a hmaiah a ratter hna tikah Benjamin phun cu thim an si.
21 Benjamin phun kha an chungkhar ning cio in a hmaiah a ratter hna tikah Matrit te chungkhar cu thim an si. A donghnak ah Kish fapa Saul cu thim a si. Asinain Saul cu an kawl tikah an hmu lo.
22 Cucaah “Mipa cu a rak phan cang maw?” tiah Jehovah kha an hal tikah Jehovah nih “A phan cang, thiltom lakah aa thup” tiah a leh hna.
23 Cucaah an va tli i Saul cu an rak chuahpi. Mibu lakah a dir tikah hawi hleiin a sang i midang vialte cu a liang can lawng an si.
24 Samuel nih mizapi kha “Jehovah nih a thimmi pa hi zoh hmanh u, amah bantuk ahohmanh an um lo” tiah a ti hna. Cu tikah mibu cu “Siangpahrang cu a chan sau ko seh!” tiah an au.
25 Cun siangpahrang nih hmuhnak nawl a ngeihmi kha Samuel nih mizapi cu a chimh hna, cauk chung ah a ṭial i Jehovah hmaiah a chiah. Cu hnuah Samuel nih mibu kha an inn cio ah a kirter hna.
26 Saul zong Gibeah khua i a inn ah a kir ve. Jehovah nih an lung a thawhtermi ralkap pawl zong nih an zulh.
27 Mi zei ruaram lo cheukhat nih “Hi pa nih cun zeitindah a kan khamh khawh lai?” tiah an ti, zei an rel lo i laksawng an pe duh lo. Asinain Saul nih zeihmanh a let hna lo.
Footnotes
^ Asiloah “phungthluk.”
