Samuel Pakhatnak 25:1-44
25 A hnuah Samuel cu a thi. Israel mi vialte cu amah ṭah awkah an i pum i Ramah khua i a inn pawng ah an vui. Cun David cu a tho i Paran ramcar ah a kal.
2 Maon khua ah a rum ngaimi pa pakhat a um. Karmel* khua ah saṭil a zua i tuu 3,000 le meheh 1,000 a ngei. Anih cu Karmel khua ah tuuhmul a met cuahmah.
3 Cu pa min cu Nabal a si i a nupi cu Abigail a si. Abigail cu thleidan thiamnak a ngei i aa dawh. Asinain Kaleb mipa Nabal tu cu a puarhrang i a ziaza a ṭha lo.
4 Nabal cu tuuhmul a met lio ti kha ramcar ah a ummi David nih a theih.
5 Cucaah a mi 10 kha a thlah hna i hitin a ti hna: “Karmel khua ah va kal u. Nabal sin nan phanh tikah zeidah a lawh ti kha keimah aiawh in va hal u.
6 Cun hitin va ti u: ‘Na chan sau ko seh. Nangmah, na chungkhar le na ngeihmi vialte cung ah daihnak um ko seh.
7 Atu tuuhmul na meh lio a si ti kha ka theih. Na tuukhal pawl kan sin an um lioah harnak kan pe hna lo. Karmel i an um chung vialte an thil zeihmanh a tlau lo.
8 Na mi kha hal hna law an in chimh ko lai. Atu bantuk puai tuah caan ah a rak phanmi ka mi pawl kha mithmai ṭha pe ko hna. Zaangfahnak in na salle le na fapa David hi na ngeihmi ei awk a hleivuang rak kan pe ko.’”
9 Cucaah David a mi hna cu Nabal sinah an kal i David nih bia a cah hna ning in an va chimh. An chim dih tikah,
10 Nabal nih “David cu ahodah a si? Jesse fapa cu ahodah a si? Nai hrawng hi an bawile sinin a zammi sal an tam ngai.
11 Ka changreu, ka ti le tuuhmul mettu hna caah ka thahmi sa kha la in khoika in an rat ti ka hngalh lomi cu ka pe kho hna lo” tiah a ti.
12 David a mi hna cu an rak kir i mah kong vialte cu an chimh.
13 Cu tikah David nih “Nan vainam i thlaih u!” tiah a mi pawl cu a ti colh hna i an vainam cu an i thlaih. David zong a vainam aa thlaih ve i a mi 400 hrawng he an i thawh. A mi 200 cu thil hngah awkah an taangta.
14 Cu lioah sal pakhat cu Nabal nupi Abigail sinah a ra i hitin a ti: “Zoh hmanh! David nih kan bawipa chawnhbiak awkah ramcar in mi a rak thlah hna nain kan bawipa nih zei rel loin a au hnawh hna.
15 Annih cu kan cung ah an ṭha tuk. Harnak an kan pe bal lo. Ramlak i kan umṭi chung ah kan thil zeihmanh a tlau bal lo.
16 Tuu kan cawngh chung vialte chun he, zan he ralhau bantuk in an kan huhphenh.
17 Atu zeidah ka tuah awk a si ti kha biakhiak. Zeicahtiah kan bawipa le a innchungkhar dihlak cung ah rawhralnak a tlung cang lai. Kan bawipa cu zei ruaram lomi a si caah ahohmanh nih an chim kho lo.”
18 Cucaah Abigail nih changreu hlum 200, mitsur zu ralca ngan pahnih, chuan ding in timhciami tuu panga, fangreu seah* panga, mitsur car nenmi thlar 100, theipi car nenmi thlar 200 kha khulrang in a lak i laa cung ah a khin hna.
19 Cun a salle kha “Ka hmai in kal u, kaan zulh hna lai” tiah a ti hna. Asinain a vapa Nabal cu zeihmanh a chim lo.
20 Abigail cu laa aa cit i tlang phen in a rak ṭum. Mah lioah David le a mi hna zong an rak ṭum ve i an i tong.
21 David nih “Ramlak ah Nabal ngeihmi thil vialte ka rak zohkhenhmi cu pakpalawng a si. A thil pakhat hmanh a tlau lo. Asinain ṭhatnak kha ṭhatlonak in a ka lehrulh.
22 Thaizing zing ah a chungkhar chung in pa pakhat kha ka zuah sual ahcun Pathian nih David ral cung ah* dantatnak pakhat hnu pakhat in tlunter ko seh” tiah a rak ti len.
23 Abigail nih David a hmuh tikah laa cung in a ṭum zokzok i a hmaiah a bawk.
24 Cun a kehram ah a bawk i hitin a ti: “Ka bawipa, a cangmi thil ruang ah keimah tu hi sual rak ka phaw ko. Na salnu hi biachimnak nawl ka pe law ka bia hi rak ka ngaihpiak hram ko.
25 Ka bawipa, zei ruaram lo Nabal kha zei ah rel duh hlah. Anih cu Nabal* timi a min bang in a si ko. Khuaruah khawhnak a ngei lo. Cun na salnu nih hin na thlahmi na mi pawl kha ka rak hmu hna lo.
26 Ka bawipa, Jehovah a nun bang in le nangmah zong na nun bang in ka chim lai. Mi thah lo awk le nangmah theng nih phuhlam lo awkah aan khamtu hi Jehovah a si. Na ral le nangmah fahnak pek awkah aa zuammi cu Nabal bantuk si ko hna seh.
27 Ka bawipa, na salnu nih ka rak putmi laksawng hi cohlang law na hnu zultu kha pe ko hna.
28 Na salnu palhnak hi zaangfahnak in ka ngaithiam ko. Ka bawipa cu Jehovah caah ral a domi na si i na nunnak ah zei ṭhatlonak hmanh na tuah lo. Cucaah Jehovah nih na chungkhar cu a hmunhter hrimhrim lai.
29 Mi pakhat cu nangmah dawi awk le thah awkah aa zuam ahcun Jehovah nih ka bawipa nunnak cu nunnak zal chung ah him tein a sanh lai. Na ral hna nunnak tu cu lungherh chehnak in chehmi lung bantuk in a cheh hna lai.
30 Jehovah nih na sinah bia aa kammi thilṭha vialte aan tuahpiak i Israel mi hruaitu ah aan ser tikah,
31 a ruang um loin mi thah sual ruang le mah theng nih phuhlam ruang ah a chuakmi ngaihchiatnak le ngaihchihnak kha na hrial khawh lai. Jehovah nih ka bawipa hi thluachuah aan pek tikah na salnu hi rak ka philh sawh hlah.”
32 David nih Abigail cu hitin a ti: “Nihin ah keimah ton awkah aan thlahtu Israel Pathian Jehovah cu thangṭhat si ko seh!
33 Khua a tuaktan khomi na si caah Jehovah nih thluachuah in pe ko seh. Nihin ah mi ka thah sual nakhnga lo le keimah theng nih phu ka hlam nakhnga lo a ka khamtu nangmah cu thluachuah hmu ko.
34 Nangmah harnak pek lo awkah a ka khamtu Israel Pathian Jehovah a nun bang in ka chim lai. Khulrang in rak ka tong hlah law cu thaizing zing ah Nabal chungkhar chung in pa pakhat hmanh an taang ti hnga lo.”
35 Cun David nih Abigail putmi kha a cohlan i “Inn ah lungdai tein va kir cang. Na bia kha ka ngaih i na ka halmi ning in kaan tuahpiak lai” tiah a ti.
36 Abigail cu Nabal sinah a kir ṭhan. Nabal cu a inn ah siangpahrang bantuk in puai a rak tuah. A lung aa nuam ngai i ri lak in a ding. Cucaah Abigail nih a thaizing zing tiang zeihmanh a chim lo.
37 Zinglei Nabal a lung a fim tikah a nupi nih a cangmi thil vialte kha a chimh. Cu tikah Nabal a lungthin cu mithi lungthin bantuk a hung si. A pum cu a zeng, a cawl kho ti lo i lung bantuk ah a cang.
38 Ni hra hrawng a rauh hnuah Jehovah nih Nabal cu dan a tat i a thi.
39 Nabal a thi cang timi thawng kha David nih a theih tikah “Nabal nehsawhnak in ka luat nakhnga a ka runvengtu, thil ṭhalo zeihmanh ka tuah nakhnga lo a ka khamtu Jehovah cu thangṭhat si ko seh. Jehovah nih Nabal ṭhatlonak kha amah lu cung lila ah a tlakter cang” tiah a ti. Cun Abigail kha nupi caah hal ding in mi a thlah hna.
40 David salle cu Karmel i Abigail sin an phanh tikah “David nih a nupi caah nangmah hal ding in a kan thlah” tiah an ti.
41 Cu tikah vawlei ah a bawk colh i “Ka bawipa a salle an ke a ṭawltu sal si awkah timhcia ka si ko” tiah a ti.
42 Cun Abigail cu a tho zokzok i laa cung ah a kai. A salnu panga kha a auh hna i David thlahmi lamkal cu an zulh hna. Cun David nupi a hung si.
43 David nih Jezreel khuami Ahinoam zong kha a ṭhit caah an pahnih in a nupi an hung si.
44 Asinain Saul nih David nupi, a fanu Mikhal kha cu Gallim khuami, Laish fapa Palti kha a rak pek cang.
Footnotes
^ Judah ram ah a ummi khua a si; Karmel Tlang he aa lo lo.
^ Seah pakhat cu 7.33 L he aa tluk. Thlaihhlei B14 ah zoh.
^ Asiloah “David cung ah” ti zong a si kho.
^ A sullam “Khuaruah Khawhnak A Ngei Lomi; Mihrut.”
