1-3. (a) Sa unsa moresulta ang “dakong kasuko” ni Jehova? (Tan-awa ang hulagway sa sinugdan sa kapitulo.) (b) Unsay atong hisgotan karon?

 ANG mga lalaki, babaye, ug mga bata nagtindog, nga nagkanta ug awit sa Gingharian. Unya usa ka ansiyano ang kinasingkasing nga nag-ampo aron mohangyo sa proteksiyon ni Jehova. Ang mga igsoon sa kongregasyon masaligon nga tabangan sila ni Jehova, pero nagkinahanglan gihapon silag paghupay ug pasalig. Sa gawas, banha kaayo tungod sa gubat. Ang Armagedon nagsugod na!​—Pin. 16:14, 16.

² Sa gubat sa Armagedon, ipahungaw ni Jehova ang iyang “dakong kasuko” sa mga tawo nga gusto niyang laglagon. (Basaha ang Ezequiel 38:18.) Iyang ipahamtang ang iyang kasuko, dili lang sa usa ka grupo sa kasundalohan o sa usa ka nasod, kondili sa daghan kaayong tawo sa tibuok kalibotan. Nianang panahona, ang pamatyon ni Jehova maoy “gikan sa usa ka tumoy sa yuta hangtod sa pikas tumoy.”​—Jer. 25:29, 33.

³ Nganong si Jehova, ang Diyos sa gugma, ang usa nga gihisgotang “maluluy-on ug mabination” ug “dili daling masuko,” mohimo niana ug mosilaob sa “dakong kasuko”? (Ex. 34:6; 1 Juan 4:16) Atong tan-awon kon nganong ang tubag niana makapahupay gyod nato, makahatag natog kaisog, ug makadasig nato sa atong pagsangyaw karon.

4, 5. Nganong ang kasuko sa Diyos lahi nianang sa dili hingpit nga mga tawo?

⁴ Kinahanglan una natong masabtan nga ang kasuko ni Jehova dili parehas nianang sa dili hingpit nga mga tawo. Kon ang kasuko sa tawo mograbe ug moabot sa punto nga naa na siyay himoon, sagad dili niya kini makontrol ug ang resulta dili maayo. Pananglitan, si Cain, nga panganay ni Adan, “nasuko pag-ayo” kay wala dawata ni Jehova ang iyang halad pero ang gasa ni Abel Iyang giuyonan. Ang resulta? Gipatay ni Cain ang iyang matarong nga igsoon. (Gen. 4:3-8; Heb. 11:4) Hunahunaa sab si David, nga gikahimut-an sa kasingkasing ni Jehova. (Buh. 13:22) Bisag buotan si David, hapit siya makahimog grabeng krimen dihang nahibaloan niya nga siya ug ang iyang mga sundalo giinsulto sa dato nga tag-iyag yuta nga si Nabal. Kay nanginit sa kasuko, gitakin ni David ug sa iyang mga sundalo ang ilang espada aron patyon dili lang ang inggrato nga si Nabal kondili ang tanang lalaki sa iyang panimalay. Maayo na lang kay nakombinsir ni Abigail, nga asawa ni Nabal, si David ug ang iyang mga sundalo nga dili manimalos. (1 Sam. 25:9-14, 32, 33) Mao nga haom lang nga gigiyahan ni Jehova si Santiago sa pagsulat: “Ang kasuko sa tawo dili moresultag pagkamatarong nga iya sa Diyos.”​—Sant. 1:20.

⁵ Lahi sa kasuko sa tawo, nga sagad maangin ang uban, kanunayng kontrolado ni Jehova ang iyang kasuko ug klaro kon nganong nasuko siya. Bisan dihang suko na kaayo siya, molihok gihapon si Jehova sa matarong nga paagi. Dihang makig-away siya, dili niya laglagon “ang matarong uban sa daotan.” (Gen. 18:22-25) Dugang pa, si Jehova masuko lang tungod sa matarong nga mga rason. Matikdi ang duha ka rason ug ang mga leksiyon nga atong makat-onan niana.

6. Unsay reaksiyon ni Jehova dihang pasipalahan ang iyang ngalan?

⁶ Rason: Ang ngalan ni Jehova gipasipalahan. Kadtong nangangkong nagrepresentar kang Jehova pero nagahimog daotan nagdaot sa iyang reputasyon, ug natural lang nga masuko siya. (Ezeq. 36:23) Sumala sa gihisgotan sa nag-unang mga kapitulo niini nga publikasyon, gipasipalahan pag-ayo sa nasod sa Israel ang ngalan ni Jehova. Siyempre, ang tinamdan ug binuhatan sa nasod nakapasuko kang Jehova. Pero kontrolado gyod niya ang iyang kasuko​—gisilotan niya ang iyang katawhan sa husto nga paagi, ug wala gyod siya maghinobra. (Jer. 30:11) Ug dihang molampos na si Jehova sa katuyoan sa iyang kasuko, wala na gyoy mabilin nga kasuko bisag gamay.​—Sal. 103:9.

7, 8. Unsang mga leksiyon ang atong makat-onan sa pagpakiglabot ni Jehova sa Israel?

⁷ Leksiyon: Ang pagpakiglabot ni Jehova sa mga Israelinhon naghatag kanatog seryosong pasidaan. Sama sa karaang mga Israelinhon, duna tay pribilehiyo sa pagdala sa ngalan ni Jehova. Mga Saksi ni Jehova ta. (Isa. 43:10) Ang atong sinultihan ug binuhatan duna gyoy epekto sa kon unsay hunahunaon sa mga tawo bahin sa Diyos nga atong girepresentahan. Dili gyod nato gusto nga dili na ta maulaw  sa paghimog sala ug mapasipalahan ang ngalan ni Jehova. Ang maong pagkinabuhi makapasuko kang Jehova, ug siya duna gyoy himoon aron panalipdan ang iyang reputasyon.​—Heb. 3:13, 15; 2 Ped. 2:1, 2.

⁸ Kay si Jehova mobati man ug “dakong kasuko,” angay ba nang magpugong nato sa pagpakigsuod kaniya? Dili. Nahibalo ta nga si Jehova mapailobon ug mapinasayloon. (Isa. 55:7; Roma 2:4) Pero nahibalo sab ta nga siya modisiplina kon gikinahanglan. Gani, atong giugmad ang pagtahod kaniya, kay nahibalo ta nga ang iyang kasuko mosilaob niadtong nagpatuyang sa pagpakasala ug nga dili niya tugotan nga magpabilin sila uban sa iyang katawhan. (1 Cor. 5:11-13) Klarong gisulti ni Jehova kanato kon unsay makapasuko niya. Naa ra nato kon atong likayan ang mga tinamdan ug binuhatan nga makapasuko kaniya.—Juan 3:36; Roma 1:26-32; Sant. 4:8.

9, 10. Unsay reaksiyon ni Jehova dihang hulgaon ang iyang matinumanong katawhan? Paghatag ug mga pananglitan.

⁹ Rason: Ang matinumanong katawhan ni Jehova gihulga. Maaghat ang kasuko ni Jehova dihang atakehon sa mga kaaway kadtong maunongong modangop kaniya para sa proteksiyon. Pananglitan, human mobiya ang mga Israelinhon sa Ehipto, giatake sa Paraon ug sa iyang gamhanang kasundalohan ang daw walay mahimo nga katawhan nga nagtapok sa baybayon sa Pulang Dagat. Pero dihang gigukod nianang gamhanang kasundalohan ang mga Israelinhon diha sa uga nga yuta sa tunga sa dagat, gipanangtang ni Jehova ang mga ligid sa mga karong panggubat ug gibanlod ang mga Ehiptohanon diha sa dagat. “Walay bisan usa kanila nga nabuhi.” (Ex. 14:25-28) Misilaob ang kasuko ni Jehova sa mga Ehiptohanon tungod sa iyang “maunongong gugma” sa iyang katawhan.​—Basaha ang Exodo 15:9-13.

¹⁰ Sa susama, tungod sa gugma ni Jehova sa iyang katawhan, siya milihok sa panahon ni Haring Ezequias. Ang mga Asiryanhon, nga pinakagamhanan ug pinakapintas nga kasundalohan sa maong panahon, miabot sa pag-atake sa siyudad sa Jerusalem. Ang maunongong mga alagad ni Jehova gihulga nga likosan, nga moresultag anam-anam ug ngilngig nga kamatayon. (2 Hari 18:27) Tungod niana, si Jehova nagpadalag usa lang ka anghel; gipatay niini ang 185,000 ka kaawayng sundalo sa usa lang ka gabii! (2 Hari 19:34, 35) Hunahunaa lang ang kahimtang sa kampo sa mga Asiryanhon pagkabuntag. Wala matandog ang mga bangkaw, taming, ug espada. Walay trompeta nga mipukaw sa mga sundalo. Walay mando nga magtigom para sa gubat. Dihay makabungol nga kahilom sa kampo, ug nagkatag ang mga patayng lawas sa palibot.

11. Nganong makapahupay ug makahatag ug kaisog ang mga pananglitan sa Kasulatan sa kon unsay himoon ni Jehova dihang hulgaon ang iyang katawhan?

¹¹ Leksiyon: Ang maong mga pananglitan nga nagpakita kon unsay himoon ni Jehova dihang hulgaon ang iyang katawhan naghatag niining kusganong pasidaan sa atong mga kaaway: “Hadlok kaayo nga masilotan sa buhing Diyos” dihang maaghat ang iyang kasuko. (Heb. 10:31) Para nato, ang maong mga pananglitan makahupay ug  makahatag ug kaisog. Mahupayan ta sa pagkahibalo nga ang atong pangunang kaaway, si Satanas, dili molampos. Sa di madugay, ang iyang “mubo” lang nga pagmando matapos! (Pin. 12:12) Sa karon, makaalagad ta kang Jehova uban ang kaisog, masaligon nga walay tawo, organisasyon, o gobyerno nga makapugong nato sa pagbuhat sa kabubut-on sa Diyos. (Basaha ang Salmo 118:6-9.) Gipahayag ni apostol Pablo ang atong determinasyon niining mga pulonga: “Kon ang Diyos dapig nato, kinsay makadaog batok kanato?”​—Roma 8:31.

12. Sa dakong kasakitan, unsay makapasilaob sa kasuko ni Jehova?

¹² Sa nagsingabot nga dakong kasakitan, si Jehova molihok sa pagprotektar nato, sama sa iyang gihimo sa mga Israelinhon nga daw wala nay kaikyasan sa mga Ehiptohanon ug sa mga Hudiyo sa Jerusalem nga gilikosan sa mga Asiryanhon. Tungod sa dakong gugma ni Jehova kanato, mosilaob ang iyang kasuko dihang ang atong mga kaaway mosulay sa pagwagtang kanato. Kadtong mangahas sa pag-atake nato sama rag magtandog sa kalimutaw ni Jehova. Molihok gyod dayon siya ug dili na mausab ang iyang hunahuna. (Zac. 2:8, 9) Ang pagpamatay grabe unya kaayo, nga wala pa gyod sukad mahitabo.  Pero ang mga kaaway sa Diyos walay rason nga makurat dihang ipahungaw ni Jehova ang iyang kasuko kanila. Ngano?

13. Unsang mga pasidaan ang gihatag ni Jehova?

¹³ Si Jehova “dili daling masuko” ug naghatag siyag daghang pasidaan nga iyang laglagon kadtong mobatok niya ug mohulga sa iyang katawhan. (Ex. 34:6, 7) Gigamit ni Jehova ang mga propeta nga si Jeremias, Ezequiel, Daniel, Kristo Jesus, ug ang mga apostoles nga si Pedro, Pablo, ug Juan aron magpasidaan bahin sa dakong pangataposang gubat.​—Tan-awa ang kahong “Si Jehova Nagpasidaan sa Nagsingabot nga Dakong Gubat.”

14, 15. Unsay gihimo ni Jehova, ug ngano?

¹⁴ Gipasulat ni Jehova kini nga mga pasidaan diha sa iyang Pulong. Giseguro sab niya nga ang Bibliya mahimong ang pinakadaghag hubad ug ang pinakadaghang naapod-apod nga basahon sukad. Sa tibuok yuta, duna siyay daghang boluntaryo nga nagtabang sa uban nga makabatog maayong relasyon sa Diyos ug nagpasidaan bahin sa nagsingabot nga “dakong adlaw ni Jehova.” (Sof. 1:14; Sal.  2:10-12; 110:3) Gipalihok niya ang iyang katawhan sa paghubad sa mga publikasyon para sa pagtuon sa Bibliya ngadto sa ginatos ka pinulongan ug sa paggahin ug ginatos ka milyong oras kada tuig aron isulti ang mga saad ug pasidaan nga naa sa iyang Pulong.

¹⁵ Gihimo ning tanan ni Jehova “kay dili niya gusto nga naay malaglag kondili gusto niya nga ang tanan maghinulsol.” (2 Ped. 3:9) Dako gyod natong pribilehiyo ang pagrepresentar sa atong mahigugmaon ug mapailobon nga Diyos ug ang pagbaton ug gamayng bahin sa pagmantala sa iyang mensahe! Pero sa dili madugay, mahutdan nag panahon kadtong dili maminaw sa mga pasidaan.

16, 17. Duna na bay gitakda nga adlaw si Jehova para sa kataposang gubat? Ipatin-aw.

¹⁶ Si Jehova duna nay gitakda nga adlaw para sa kataposang gubat. Nahibalo na siyang daan kon kanus-a atakehon ang iyang katawhan. (Mat. 24:36) Giunsa pagkahibalo ni Jehova kon kanus-a moatake ang iyang mga kaaway?

¹⁷ Sa ato nang nakat-onan sa miaging kapitulo, giingnan ni Jehova si Gog: “Kaw-itan nako ang imong apapangig.” Iyang giyahan  ang mga panghitabo aron ang mga nasod maagni sa pag-atake. (Ezeq. 38:4) Wala kini magpasabot nga si Jehova ang unang moatake niini nga pagpakig-away; wala sab kini magpasabot nga mapugos kadtong mobatok niya, nga daw gikuhaan niya silag kagawasan sa pagdesisyon. Hinuon, kini nagpakita nga si Jehova makabasag kasingkasing ug nahibalo siya kon unsay reaksiyon sa iyang mga kaaway sa espesipikong mga kahimtang.​—Sal. 94:11; Isa. 46:9, 10; Jer. 17:10.

18. Nganong makig-away ang mga tawo sa Labing Gamhanan?

¹⁸ Kon dili si Jehova ang mosugod sa away o dili niya pugson ang iyang mga kaaway sa pagpakiggubat, nganong ibutang sa ubos nga mga tawo ang ilang kaugalingon sa kahimtang diin sila makig-away sa Labing Gamhanan mismo? Usa ka rason mao nga nianang panahona, lagmit kombinsido sila nga walay Diyos o nga dili siya mangilabot sa kalihokan sa tawo. Tingali maghunahuna sila niini kay bag-o pa nilang napuo ang tanang organisasyon sa bakak nga relihiyon sa yuta. Busa mangatarongan sila nga kon dunay Diyos, seguradong depensahan niya ang mga institusyon nga nangangkong nagrepresentar kaniya. Dili sila makaamgo nga ang Diyos mismo  ang nagbutang sa ilang kasingkasing nga wagtangon ang mga relihiyon nga nagrepresentar kuno niya pero grabeng nagdaot niya.​—Pin. 17:16, 17.

19. Unsay lagmit mahitabo human malaglag ang bakak nga relihiyon?

¹⁹ Human malaglag ang bakak nga relihiyon, lagmit sugoon ni Jehova ang iyang katawhan sa pagpahayag ug bug-at nga mensahe. Kini nga mensahe gipakasama sa basahon sa Pinadayag ngadto sa ulan nga yelo, nga ang matag yelo motimbang ug mga 20 kilos. (Pin. 16:21, footnote) Kini nga mensahe, nga posibleng usa ka deklarasyon nga ang sistema sa politika ug negosyo hapit nang wad-on, magsakit pag-ayo sa mga makadungog mao nga ilang pasipalahan ang Diyos. Lagmit kini nga mensahe ang makaaghat sa mga nasod sa paghimog todotodong pag-atake sa katawhan sa Diyos aron mapuo na gyod ta. Maghunahuna sila nga wala tay depensa, nga dali ra tang laglagon. Sayop gyod sila!

20, 21. Kinsa si Gog, ug unsay mahitabo kaniya?

²⁰ Sa ato nang nakita sa Kapitulo 17 niining publikasyona, gigamit ni Ezequiel ang titulo nga “Gog sa yuta sa Magog” aron ipaila ang mag-alyansang kanasoran nga moatake kanato. (Ezeq. 38:2) Pero daw hilo lang ang nagbugkos sa mga membro niini nga alyansa. Bisan tuod morag nagkahiusa sila, naa gihapon kanila ang pagpalabwanay, garbo, ug ambisyon para sa ilang nasod. Busa sayon ra para kang Jehova nga palihokon ang matag usa nga gamiton ang iyang espada “batok sa kaugalingon niyang igsoon.” (Ezeq. 38:21) Pero dili maggikan sa tawo ang kalaglagan sa mga nasod.

²¹ Sa dili pa sila malaglag, makita sa atong mga kaaway ang ilhanan sa Anak sa tawo, nga lagmit usa ka katingalahang pagpadayag sa gahom ni Jehova ug Jesus. Makakita silag mga butang nga makapahadlok pag-ayo nila. Sa gitagna na ni Jesus, “ang mga tawo panguyapan tungod sa kahadlok ug sa pagpaabot sa mga butang nga mahitabo sa yuta.” (Luc. 21:25-27) Mahadlok gyod sila kay ilang maamgohan nga nasayop sila sa pag-atake sa katawhan ni Jehova. Mapugos sila sa pag-ila sa papel sa Maglalalang ingong komandante militar, si Jehova sa kasundalohan. (Sal. 24:10, footnote; 46:6-11; Ezeq. 38:23) Segurado nga gamiton ni Jehova ang langitnong kasundalohan ug ang mga puwersa sa kinaiyahan aron panalipdan ang iyang maunongong mga alagad ug laglagon ang mga kaaway.​—Basaha ang 2 Pedro 2:9.

22, 23. Kinsay manalipod sa katawhan sa Diyos, ug unsay segurado nilang bation sa ilang himoon?

²² Hunahunaa kon unsa ka agresibo si Jesus dihang pangunahan niya ang pag-atraka batok sa mga kaaway sa Diyos ug panalipdan kadtong nahigugma ug nag-alagad sa iyang Amahan. Hunahunaa sab ang bation sa mga dinihogan nianang panahona. Sa dili pa magsugod ang Armagedon, kadtong nahibilin pa sa yuta banhawon ngadto sa kinabuhi sa langit aron ang tanang 144,000 makauban ni Jesus  sa pagpakig-away. (Pin. 17:12-14) Seguradong daghan sa mga dinihogan ang dunay suod kaayong mga higala nga sakop sa ubang mga karnero kay nagkauban sila sa kataposang mga adlaw. Nianang panahona, naa na silay awtoridad ug gahom sa pagdepensa niadtong maunongon gyong misuportar nila panahon sa ilang pagsulay.​—Mat. 25:31-40.

²³ Ang mga anghel apil sab unya sa langitnong kasundalohan ni Jesus. (2 Tes. 1:7; Pin. 19:14) Mitabang na sila kaniya sa pagpahawa kang Satanas ug sa mga demonyo sa langit. (Pin. 12:7-9) Ug nagatabang sab sila sa pagtigom niadtong naa sa yuta nga gustong mosimba kang Jehova. (Pin. 14:6, 7) Haom gyod nga tugotan ni Jehova ang mga anghel sa pagpanalipod niining maunongong mga tawo! Labaw sa tanan, ang tanang membro sa kasundalohan ni Jehova mobati nga kadungganan ang pagbalaan ug pagbindikar sa iyang ngalan, o reputasyon, pinaagi sa pagtabang nga malaglag ang iyang mga kaaway.​—Mat. 6:9, 10.

24. Unsay reaksiyon unya sa dakong panon sa ubang mga karnero?

²⁴ Tungod niining gamhanang kasundalohan nga gusto kaayong manalipod, ang dakong panon sa ubang mga karnero wala gyoy rason nga mouk-ok sa kahadlok. Gani, sila ‘motindog nga tul-id ug mohangad sa ilang mga ulo, kay nagkaduol na ang ilang kaluwasan.’ (Luc. 21:28) Importante gyod nga sa dili pa moabot ang adlaw ni Jehova, himoon nato ang tanan natong maarangan sa pagtabang sa mas daghan pang tawo nga makaila ug mahigugma sa atong maluluy-on ug andam manalipod nga Amahan!​—Basaha ang Sofonias 2:2, 3.

25. Unsay sunod natong hisgotan?

²⁵ Sa gubat sa tawo, ang resulta maoy kagubot ug pag-antos. Pero sa Armagedon, ang resulta maoy kahapsay ug kalipay. Unsay mahitabo dihang mapagawas na ni Jehova ang tanan niyang kasuko, mabalik na sa sakoban ang mga espada sa iyang mga manggugubat, ug mahunong na ang kabanha sa gubat? Sa sunod nga kapitulo, hisgotan nato kanang nindot kaayong umaabot.