Ang Pinadayag ug Ikaw
Kapitulo 44
Ang Pinadayag ug Ikaw
1. (a) Unsay gipasalig sa manulonda kang Juan mahitungod sa tanang kahibulongang mga saad sa Pinadayag? (b) Kinsa ang nag-ingon, “ako moabot sa madali,” ug kanus-a ang maong ‘pag-abot’?
SA PAGKABASA sa maanindot nga kahubitan sa Bag-ong Jerusalem, mahimong nadasig ka sa pagpangutana: ‘Mamatuman ba gayod ang maong kahibulongan kaayong butang?’ Kana gitubag ni Juan pinaagi sa pagtaho sa sunod nga mga pulong sa manulonda: “Ug siya miingon kanako: ‘Kining mga pulonga kasaligan ug matuod; oo, si Jehova nga Diyos sa inspiradong mga pahayag sa mga manalagna nagpadala sa iyang manulonda aron ipakita sa iyang mga ulipon ang mga butang nga kinahanglang mahitabo sa dili-madugay. Ug, tan-awa! ako moabot sa madali. Malipayon ang si bisan kinsa nga magatuman sa mga pulong sa tagna niining linukot nga basahon.’” (Pinadayag 22:6, 7) Ang tanang kahibulongang mga saad sa Pinadayag mamatuman gayod! Nga nagsulti diha sa ngalan ni Jesus, ang manulonda nagpahayag nga si Jesus moabot sa dili-madugay, “sa madali.” Kini mao gayod ang pag-abot ni Jesus “ingon sa usa ka kawatan” aron laglagon ang mga kaaway ni Jehova ug ipadangat ang hingpit ug makalilipay nga sangkoanan sa Pinadayag. (Pinadayag 16:15, 16) Busa, kinahanglang ipahiuyon nato ang atong kinabuhi sa mga pulong “niining linukot nga basahon,” ang Pinadayag, aron ikapahayag nga malipayon nianang panahona.
2. (a) Unsay sanong ni Juan sa dagayang pagpadayag, ug unsay giingon sa manulonda kaniya? (b) Unsay atong makat-onan gikan sa mga pulong sa manulonda nga “Pagbantay!” ug “Maoy simbaha ang Diyos”?
2 Tapos sa maong dagayang pagpadayag, masabtan nga si Juan daw nalumsan sa pagbati: “Buweno, ako, si Juan, mao ang nakadungog ug nakakita niining mga butanga. Ug sa pagkadungog ug pagkakita ko niini, ako mihapa sa pagsimba diha sa tiilan sa manulonda nga nagpakita kanako niining mga butanga. Apan siya miingon kanako: ‘Pagbantay! Ayaw kanag buhata! Ako usa lamang ka isigkaulipon nimo ug sa imong mga igsoon nga mga manalagna ug niadtong nanagtuman sa mga pulong niining linukot nga basahon. Maoy simbaha ang Diyos.’” (Pinadayag 22:8, 9; itandi ang Pinadayag 19:10.) Kining kaduha gipahayag nga pasidaan nga dili mosimba sa mga manulonda maoy tukma-sa-panahon sa adlaw ni Juan, sa dihang ang pipila dayag nga naghimo sa maong pagsimba o nag-angkon nga may espesyal nga mga pagpadayag gikan sa mga manulonda. (1 Corinto 13:1; Galacia 1:8; Colosas 2:18) Karong adlawa, kini nagpasiugda sa kamatuoran nga ang Diyos lamang ang atong pagasimbahon. (Mateo 4:10) Dili nato hugawan ang putling pagsimba pinaagi sa pagsimba kang bisan kinsa o sa bisan unsa.—Isaias 42:5, 8.
3, 4. Unsay padayong gisulti sa manulonda kang Juan, ug sa unsang paagi gituman sa dinihogang nahibilin ang iyang mga pulong?
3 Si Juan nagpadayon: “Siya usab miingon kanako: ‘Ayaw timbrehi ang mga pulong sa tagna niining linukot nga basahon, kay ang tinudlong panahon haduol na. Siya nga nagbuhat ug pagkadili-matarong, pabuhata gihapon siya ug pagkadili-matarong; ug ang mahugaw pasagding magpabilin gihapon nga mahugaw; apan ang matarong pabuhata gihapon ug pagkamatarong, ug ang balaan pasagding magpabilin gihapon nga balaan.’”—Pinadayag 22:10, 11.
4 Ang dinihogang nahibilin karong adlawa nagtuman sa mga pulong sa manulonda. Wala nila timbrehi ang mga pulong sa tagna. Ngani, ang unang gula mismo sa Zion’s Watch Tower and Herald of Christ’s Presence (Hulyo 1879) nagpahayag ug mga komento bahin sa daghang bersikulo sa Pinadayag. Sumala sa among giingon sa among unang kapitulo, latas sa katuigan ang mga Saksi ni Jehova nagpatik ug ubang makapalamdag nga mga basahon bahin sa Pinadayag. Karon, among dapiton na usab ang tanang mahigugmaon sa kamatuoran sa paghatag ug pagtagad sa gamhanang mga tagna sa Pinadayag ug sa katumanan niini.
5. (a) Unsa man kon dili buot sa mga tawo nga manumbaling sa mga pasidaan ug tambag diha sa Pinadayag? (b) Unsay angayng pagsanong sa mga maaghop ug mga matarong?
5 Kon dili buot sa mga tawo nga manumbaling sa mga pasidaan ug tambag diha sa Pinadayag, aw, pasagdi sila! “Siya nga nagbuhat ug pagkadili-matarong, pabuhata gihapon siya ug pagkadili-matarong.” Kon mao kanay ilang gusto, pasagding mamatay niana nga kahugawan ang mga nagalunang sa kahugawan niining matinugotong panahon. Sa dili na madugay, ang mga paghukom ni Jehova bug-os nang ipatuman, nga magsugod sa paglaglag sa Dakong Babilonya. Hinaot nga ang maaghop nga mga tawo magmakugihon sa pagpatalinghog sa mga pulong sa manalagna: “Pangitaa ninyo si Jehova . . . Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.” (Sofonias 2:3) Alang sa mga nagpahinungod na kang Jehova, “ang matarong pabuhata gihapon ug pagkamatarong, ug ang balaan pasagding magpabilin gihapon nga balaan.” Nahibalo ang maalamon nga ang temporaryong kaayohan nga mabatonan tungod sa pagpakasala dili ikatandi sa malungtarong mga panalangin nga pahimuslan sa mga nagsunod sa pagkamatarong ug pagkabalaan. Ang Bibliya nag-ingon: “Padayong sulayi kon kamo anaa ba sa pagtuo, padayong pamatud-i kon unsa kamo sa inyong kaugalingon.” (2 Corinto 13:5) Pinasukad sa dalan nga imong gipili ug gipadayon sa pagsubay, imong madawat ang imong ganti.—Salmo 19:9-11; 58:10, 11.
6. Unsay giingon ni Jehova sa kataposang higayon ngadto sa mga magbabasa sa Pinadayag diha sa tagna?
6 Sa kataposang higayon si Jehova, ang walay-kataposang Hari, miingon ngadto sa mga magbabasa sa Pinadayag diha sa tagna: “Tan-awa! Ako moabot sa madali, ug ang ganti nga akong ihatag ania kanako, sa pagbalos sa matag usa sumala sa iyang buhat. Ako mao ang Alfa ug ang Omega, ang una ug ang ulahi, ang sinugdan ug ang kataposan. Malipayon kadtong naglaba sa ilang tag-as nga mga besti, aron mailaha ang katungod sa pagpahimulos sa mga kahoy sa kinabuhi ug aron sila makasulod sa siyudad agi sa mga ganghaan niini. Sa gawas anaa ang mga iro ug ang nagbuhat sa espiritismo ug ang mga makihilawason ug ang mga mamumuno ug ang mga tigsimbag idolo ug ang tanan nga nahigugma ug nagapadayon sa pagpamakak.”—Pinadayag 22:12-15.
7. (a) Alang sa unsa nga si Jehova “moabot sa madali”? (b) Nganong ang klero sa Kakristiyanohan walay bahin sa Bag-ong Jerusalem?
7 Sa makausa pa, si Jehova nga Diyos nagpasiugda sa iyang walay-kataposang pagkasoberano ug sa kamatuoran nga kon unsa ang iyang unang katuyoan iya gayod kining pagabuhaton. Siya “moabot sa madali” aron ipatuman ang paghukom ug gantihan kadtong matinuorong nagapangita kaniya. (Hebreohanon 11:6) Ang iyang mga sukdanan maoy magtino kon kinsay gantihan ug kinsay isalikway. Ang klero sa Kakristiyanohan naggawi nga samag “amang nga mga iro,” nga wala lang magtagad sa daotang mga buhat nga gihubit dinhi ni Jehova. (Isaias 56:10-12; tan-awa usab ang Deuteronomio 23:18, New World Translation Reference Bible, potnot.) Tinuod gayod, ilang ‘gihigugma ug gipadayon’ ang bakak nga mga doktrina ug mga tinuohan ug bug-os nga wala magtagad sa tambag ni Jesus alang sa pito ka kongregasyon. Busa, wala silay bahin sa Bag-ong Jerusalem.
8. (a) Kinsa lamang ang ‘magpahimulos sa mga kahoy sa kinabuhi,’ ug unsay kahulogan niini? (b) Sa unsang paagi ang dakong panon “naglaba sa ilang tag-as nga mga besti,” ug sa unsang paagi padayon silang naghupot sa hinlong baroganan?
8 Ang dinihogang mga Kristohanon lamang nga tinuod nga “naglaba sa ilang tag-as nga mga besti” aron hinlo sa panan-aw ni Jehova ang makapribilehiyo sa “pagpahimulos sa mga kahoy sa kinabuhi.” Sa ato pa, ilang madawat ang katungod ug kalig-onan sa imortal nga kinabuhi diha sa ilang langitnong katungdanan. (Itandi ang Genesis 3:22-24; Pinadayag 2:7; 3:4, 5.) Human sila mamatay ingong mga tawo, sila makasulod sa Bag-ong Jerusalem pinaagi sa pagkabanhaw. Pasudlon sila sa 12 ka manulonda, samtang isalikway si bisan kinsa nga nagbatasan sa pagpamakak o sa kahugawan bisan pag nag-angkong may langitnong paglaom. Ang dakong panon sa yuta ‘naglaba usab sa ilang tag-as nga mga besti ug nagpaputi niana sa dugo sa Kordero’ ug sila kinahanglang padayong maghupot sa ilang hinlong baroganan. Ilang mahimo kini pinaagi sa paglikay sa daotang mga buhat nga gipasidaan dinhi ni Jehova nga likayan, ingon man sa pagsunod sa tambag ni Jesus diha sa iyang pito ka mensahe alang sa mga kongregasyon.—Pinadayag 7:14; mga kapitulo 2 ug 3.
9. Unsang mga pulong ang gipahayag ni Jesus, ug kang kinsa ilabinang gipunting ang iyang mensahe ug ang tibuok nga Pinadayag?
9 Pagkahuman ni Jehova, si Jesus ang namulong. Iyang gipahayag ang makapadasig nga mga pulong ngadto sa mga matarong ug kasingkasing nga nagbasa sa Pinadayag, nga nag-ingon: “Ako, si Jesus, nagpadala sa akong manulonda aron ipamatuod kaninyo kining mga butanga alang sa mga kongregasyon. Ako mao ang gamot ug ang kaliwat ni David, ug ang mahayag nga bituon sa kabuntagon.” (Pinadayag 22:16) Oo, kining mga pulonga sa panguna maoy “alang sa mga kongregasyon.” Una sa tanan, kini maoy mensahe alang sa kongregasyon sa dinihogang mga Kristohanon sa yuta. Ang tanang butang nga gihisgotan sa Pinadayag gipunting ilabina sa dinihogang mga Kristohanon, nga maoy mopuyo sa Bag-ong Jerusalem. Pinaagi nianang kongregasyona, ang dakong panon makapribilehiyo usab sa pagsabot niining bililhon nga matagnaong mga kamatuoran.—Juan 17:18-21.
10. Nganong gitawag ni Jesus ang iyang kaugalingon nga (a) “ang gamot ug ang kaliwat ni David”? (b) “ang mahayag nga bituon sa kabuntagon”?
10 Si Jesu-Kristo gipiyalan sa pagpasa sa Pinadayag ngadto kang Juan ug pinaagi kaniya ngadto sa kongregasyon. Si Jesus mao “ang gamot ug ang kaliwat ni David.” Siya kaliwat ni David sumala sa unod ug busa kuwalipikado nga mahimong Hari sa Gingharian ni Jehova. Siya usab mahimong “Amahang Walay Kataposan” ni David, ug sa ingon ang “gamot” ni David. (Isaias 9:6; 11:1, 10) Siya ang permanente, imortal nga Hari sa linya ni David, nga nagtuman sa pakigsaad ni Jehova kang David, ug “ang mahayag nga bituon sa kabuntagon” nga gitagna sa adlaw ni Moises. (Numeros 24:17; Salmo 89:34-37) Siya ang “bituon sa adlaw” nga mosubang, nga tungod niana ang adlaw mobanagbanag. (2 Pedro 1:19) Ang tanang panglingla sa dakong kaaway nga Dakong Babilonya wala makapugong niining mahimayaong pagsubang.
Paingna: “Umari Ka!”
11. Unsang bukas nga imbitasyon ang gitanyag karon ni Juan, ug kinsay mahimong modawat niini?
11 Karon, turno na ni Juan sa pagsulti. Gikan sa kasingkasing nga napunog apresasyon alang sa tanan nga iyang nakita ug nadungog, siya nagpatugbaw: “Ug ang espiritu ug ang pangasaw-onon nagpadayon sa pag-ingon: ‘Umari ka!’ Ug si bisan kinsa nga nagpatalinghog paingna: ‘Umari ka!’ Ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” (Pinadayag 22:17) Ang mga benepisyo sa halad lukat ni Jesus dili lamang alang sa 144,000, kay kini maoy bukas nga imbitasyon. Ang nagatukmod nga espiritu ni Jehova naglihok pinaagi sa pangasaw-onon nga matang, mao nga ang mensahe padayong gipahayag nga tin-aw kaayo: ‘Inom sa tubig sa kinabuhi nga walay bayad.’ (Tan-awa usab ang Isaias 55:1; 59:21.) Si bisan kinsa nga giuhaw sa pagkamatarong gidapit nga “umari” ug dawaton ang gasa ni Jehova. (Mateo 5:3, 6) Pagkabulahan sa tanang umaabot nga yutan-ong matang nga modawat niining imbitasyona sa dinihogang Juan nga matang!
12. Unsay sanong sa dakong panon sa imbitasyon sa Pinadayag 22:17?
12 Sukad sa sinugdan sa katuigan sa 1930, ang nagkadaghang sakop sa dakong panon “nagpatalinghog”—nga nagtagad sa imbitasyon. Sama sa ilang mga isigkaulipon nga mga dinihogan, ilang nakab-ot ang hinlong baroganan atubangan ni Jehova. Ilang gipangandoy ang panahon nga ang Bag-ong Jerusalem manaog gikan sa langit aron ipaagos ang mga panalangin sa katawhan. Kay nakadungog sa makapapukaw nga mensahe sa Pinadayag, ang dakong panon wala lamang mag-ingong “Umari ka!” kondili aktibong nagtigom sa uban pa ngadto sa organisasyon ni Jehova, nga nagbansay usab kanila sa pagmantala: “Si bisan kinsa nga giuhaw paaria.” Busa padayong nag-uswag ang gidaghanon sa dakong panon, kay kapin sa 6,000,000 kanila diha sa 235 ka nasod sa tibuok yuta ang nagpakig-ambit uban sa wala nay 9,000 sa dinihogang pangasaw-onon nga matang sa pagtanyag sa imbitasyon nga ‘moinom sa tubig sa kinabuhi nga walay bayad.’
13. Unsang pasidaan ang gipahayag ni Jesus?
13 Sunod, si Jesus na usab ang nagsulti, nga nag-ingon: “Nagpamatuod ako ngadto sa matag usa nga magpatalinghog sa mga pulong sa tagna niining linukot nga basahon: Kon dugangan ni bisan kinsa kining mga butanga, idugang sa Diyos kaniya ang mga hampak nga nahisulat niining linukot nga basahon; ug kon kuhaan ni bisan kinsa ug bisan unsa ang mga pulong sa linukot nga basahon niini nga tagna, kuhaon sa Diyos ang iyang bahin gikan sa mga kahoy sa kinabuhi ug gikan sa balaan nga siyudad, mga butang nga nahisulat niining linukot nga basahon.”—Pinadayag 22:18, 19.
14. Unsay pag-isip sa Juan nga matang sa “tagna” sa Pinadayag?
14 Kinahanglang ipasiugda niadtong sakop sa Juan nga matang ang “tagna” sa Pinadayag. Kinahanglang dili nila kini tagoan o dugangan. Ang mensahe niini kinahanglang iwali sa dayag, “gikan sa mga atop.” (Mateo 10:27) Ang Pinadayag maoy inspirado sa Diyos. Kinsa bay mangahas nga usbon ang usa ka pulong nga gibungat mismo sa Diyos ug gipasa pinaagi sa nagamandong Hari karon, si Jesu-Kristo? Kanang tawhana mapakyas gayod sa iyang pagpangagpas sa kinabuhi ug makaagom sa mga hampak nga modangat gayod sa Dakong Babilonya ug sa tibuok kalibotan.
15. Unsay kahulogan sa mga pulong ni Jesus nga siya “nagpamatuod niining mga butanga” ug “ako moabot sa madali”?
15 Si Jesus nagpahayag karon ug pangataposan nga makapadasig nga pulong: “Siya nga nagpamatuod niining mga butanga nag-ingon, ‘Oo; ako moabot sa madali.’” (Pinadayag 22:20a) Si Jesus mao “ang matinumanon ug matuod nga saksi.” (Pinadayag 3:14) Tungod kay siya nagpamatuod sa mga panan-awon sa Pinadayag, kini tinuod gayod. Siya ug si Jehova nga Diyos mismo subsob nagpasiugda sa kamatuoran nga sila moabot sa “madali,” o sa dili na madugay, nga gisulti dinhi ni Jesus sa ikalimang higayon. (Pinadayag 2:16; 3:11; 22:7, 12, 20) Ang ‘pag-abot’ maoy alang sa pagpatuman sa paghukom diha sa dakong bigaon, sa politikanhong “mga hari” ug sa tanang uban pa nga nagsupak sa “gingharian sa atong Ginoo [si Jehova] ug sa iyang Kristo.”—Pinadayag 11:15; 16:14, 16; 17:1, 12-14.
16. Kay nahibalo nga si Jehova nga Diyos ug si Jesus moabot sa madali, unsang desididong aksiyon ang angay nimong himoon?
16 Ang imong pagkahibalo nga si Jehova nga Diyos ug si Jesus moabot sa madali kinahanglang magdasig kanimo nga ‘ibutang kanunay sa hunahuna ang presensiya sa adlaw ni Jehova.’ (2 Pedro 3:12) Ang daw kalig-on sa yuta nga nagtumong sa sistema sa mga butang ni Satanas maoy panghanduraw lamang. Ang daw kalamposan nga tingali naangkon sa langit nga nagtumong sa mga magmamando sa kalibotan ubos ni Satanas maoy umalagi lamang. Mahanaw ra kining mga butanga. (Pinadayag 21:1) Ang malungtaron lamang mao si Jehova, ang iyang Gingharian ubos ni Jesu-Kristo, ug ang iyang gisaad nga bag-ong kalibotan. Ayaw gayod kana hikalimti!—1 Juan 2:15-17.
17. Sa unsang paagi ang imong pagpabili sa pagkabalaan ni Jehova angayng mag-apektar kanimo?
17 Nan, hinaot ang imong nakat-onan sa imong pagtuon sa Pinadayag makaimpluwensiya ug dako sa imong kinabuhi. Wala ka ba mahingangha sa dili-hitupngang himaya ug pagkabalaan sa atong Maglalalang gumikan sa imong daklit nga pagtan-aw sa langitnong presensiya ni Jehova? (Pinadayag 4:1–5:14) Pagkatalagsaong pribilehiyo ang pag-alagad sa ingon nga matang sa Diyos! Hinaot ang imong pagpabili sa iyang pagkabalaan magdasig kanimo nga isipong ugdang kaayo ang tambag ni Jesus sa pito ka kongregasyon ug likayan ang mga butang sama sa materyalismo, idolatriya, imoralidad, dagaang nga pagtuo, apostatang pagsekta-sekta, o bisan unsang butang pa nga maghimo sa imong pag-alagad nga dili dalawaton kang Jehova. (Pinadayag 2:1–3:22) Ang prinsipyo sa mga pulong ni apostol Pedro ngadto sa Juan nga matang mapadapat usab ngadto sa dakong panon: “Sumala sa Balaang Usa nga nagtawag kaninyo, magmabalaan usab kamo sa tanan ninyong panggawi.”—1 Pedro 1:15, 16.
18. Sa unsa angay kang makigbahin nga labing bug-os kutob sa mahimo, ug nganong kining buluhatona dinalian karon?
18 Dugang pa, hinaot mosamot ang imong kadasig samtang imong gimantala ang “tuig sa maayong kabubut-on sa bahin ni Jehova ug sa adlaw sa panimalos sa bahin sa atong Diyos.” (Isaias 35:4; 61:2) Bahin ka man sa gamayng panon o sa dakong panon, hinaot makigbahin ka sa bug-os kutob sa mahimo diha sa pagmantala sa pagbubo sa pito ka panaksan sa kasuko ni Jehova, nga magpahayag sa mga paghukom sa Diyos batok sa kalibotan ni Satanas. Sa samang panahon, gamita ang imong tingog sa masadyaong pagmantala bahin sa walay-kataposang maayong balita maylabot sa natukod nga Gingharian ni Jehova ug sa iyang Kristo. (Pinadayag 11:15; 14:6, 7) Buhata nga dinalian ang maong buluhaton. Ug hinaot nga ang pagkaamgo nga ania na kita sa adlaw sa Ginoo magdasig sa daghan nga wala pa mag-alagad kang Jehova sa pagduyog sa buluhaton sa pagmantala sa maayong balita. Hinaot sila mouswag usab ngadto sa pagpahinungod sa ilang kinabuhi sa Diyos uban ang tumong nga magpabawtismo. Hinumdomi, “ang tinudlong panahon haduol na”!—Pinadayag 1:3.
19. Unsa ang paniklop nga mga pulong sa tigulang nang apostol nga si Juan, ug unsay imong sanong niini?
19 Busa, duyog kang Juan, kita mainitong mag-ampo: “Amen! Umari ka, Ginoong Jesus.” Ug si Juan, ang tigulang nang apostoles, dugang nga nag-ingon: “Hinaot ang dili-takos nga kalulot sa Ginoong Jesu-Kristo maanaa sa mga balaan.” (Pinadayag 22:20b, 21) Hinaot usab nga inyong masinati kini, kamong tanan nga nagbasa niining publikasyona. Hinaot ikaw makabatog pagtuo nga ang dakong sangkoanan sa Pinadayag haduol na, aron makaduyog ka usab kanamo sa kinasingkasing nga pag-ingong “Amen!”
[Mga Pangutana sa Pagtuon]
[Hulagway sa panid 314]
“Sa gawas anaa ang mga iro . . . ”
[Hulagway sa panid 315]
“Malipayon kadtong . . . makasulod sa siyudad agi sa mga ganghaan niini”
