Abonuan sa nga be su wa ju’n
Abonuan sa nga be su wa ju’n
WIENUN ɔn tukpacɛ kekle wie o amun su yɛ ɔ fata kɛ be kpaci amun nun. ?Sɛ amun ti i kɛ dɔɔtrɔfuɛ nga ɔ́ wá kpáci amun nun’n ɔ nin a yomɛn i sɔ like’n le’n, wafa sɛ yɛ amun wun yó amun ɔn? ?Amun klun su titiman amun? ?Sanngɛ sɛ amun ti i kɛ dɔɔtrɔfuɛ sɔ’n i junman’n nun’n, sran fi tomɛn i, naan w’a dun mmua w’a kpaci sran kpanngban mɔ tukpacɛ ng’ɔ o amun su’n tɔli be su wie’n be nun’n naan i bo’n guali kpa’n nin? ?Amun su lafiman su kpa kɛ ɔ́ kwlá úka amun?
Ɲanmiɛn Zoova ti kɛ dɔɔtrɔfuɛ kun m’ɔ si i junman’n i kpa’n sa. Yɛ mɛn’n ti kɛ tukpacifuɛ kun m’ɔ fata kɛ be kpaci i nun’n sa. Biblu’n m’ɔ ti i nuan ndɛ’n i nun’n, ɔ seli kɛ ɔ́ wá yó naan asiɛ’n kaci lika klanman kɛ Adam nin Ɛvu be blɛ su’n sa. (2 Piɛr 3:13) Sanngɛ ka naan i sɔ’n w’a yo ye’n, ɔ nin i fata kɛ be nunnun klunwi yolɛ’n sekeseke. (Jue Mun 37:9-11; Nyanndra Mun 2:21, 22) Ɔ fata kɛ ɲrɛnnɛn sa nga e wun be’n be wie mlɔnmlɔn naan asiɛ’n w’a kaci mɛn klanman. I sɔ liɛ’n ti abonuan sa!—Sa Nglo Yilɛ 21:4, 5.
Zoova i Lalofuɛ’m be lafi su kɛ ɔ cɛ kan’n, i sɔ sa dandan’m bé wá jú. ?Ngue ti ɔ? Yɛle kɛ abonuan sa nga Ɲanmiɛn Zoova w’a dun mmua w’a yo be’n, be kle kɛ ɔ le tinmin yia nda ng’ɔ tali be’n be nuan. Maan e nian abonuan sa nga be kannin be ndɛ Biblu’n nun’n be nun nsiɛn, ɔ nin e ɲrun lɔ sa’m be su like nga be kle e’n.
É srɛ́ amun kɛ amun suan e ɲrun lɔ sa’m be su kasiɛ nga Biblu’n boli’n be su like ekun. Kɛ amun Ɲanmiɛn sulafilɛ’n yó dan kɔ́’n, nn amun wla m’ɔ o su kɛ blɛ kun nun’n amún ɲán abonuan sa nga Zoova yo be’n be su ye’n i kusu ɔ́ yó dan kɔ́ wie.
[Kuku, bue 7]
ABONUAN SA:
ZEZI FALI KPAUN KAN NIN JUE KAN TALI SRAN AKPI KPANNGBAN.—MATIE 14:13-21; MARK 8:1-9; ZAN 6:1-14.
KASIƐ:
“Anannganman bɔbɔ yɛ ɔ́ mán muae nin-ɔn, yɛ e asiɛ’n ɔ́ sú mma kpa.”—JUE MUN 85:13.
LIKE NGA I SƆ’N KLE E’N:
SRAN FI SU FƐFƐMAN AWE KUN LE.
ABONUAN SA:
ZEZI YOLI MAAN AƝANSIFUƐ’M BE WUNNIN ASE.—MATIE 9:27-31; MARK 8:22-26.
KASIƐ:
“Anyansifuɛ’m bé wún ase.”—EZAI 35:5.
LIKE NGA I SƆ’N KLE E’N:
BE KWLAA NGA BE ƝIN SILI’N BÉ WÚN ASE EKUN.
ABONUAN SA:
ZEZI YOLI BE NGA BE LIKA WIE TI WUWA’N ANNZƐ BE TI FƆLƐFUƐ’M BE JUEJUE.—MATIE 11:5, 6; ZAN 5:3-9.
KASIƐ:
“Cɛcɛwafuɛ’m bé tú kpɛ́n kɛ flete mun sa.”—EZAI 35:6.
LIKE NGA I SƆ’N KLE E’N:
BE NGA BE LIKA WIE TI WUWA’N ANNZƐ BE TI FƆLƐFUƐ’N BÉ YÓ JUEJUE.
ABONUAN SA:
ZEZI YOLI SRAN KPANNGBAN MƆ BE TUKPACƐ’N TI FANUNFANUN’N BE JUEJUE.—MARK 1:32-34; LIK 4:40.
KASIƐ:
“[Sran fi] su se-man kɛ: ‘N kpinndin-man.’”—EZAI 33:24.
LIKE NGA I SƆ’N KLE E’N:
TUKPACƐ NG’Ɔ SACI SRAN’N I KWLAA WÍE SRAN’M BE SU. É YÓ JUEJUE MLƆNMLƆN.
ABONUAN SA:
ZEZI ƝANNIN KWLALƐ NINNGE KƐ AUNMUAN NIN NZUE SA’N BE SU.—MATIE 8:23-27; LIK 8:22-25.
KASIƐ:
“Sɛ min sran’m be kplan sua’n, bé trán be nun, sɛ be ta vinyi’n, bé dí i su mma. Be su fɛ-man ngbɛn.”—EZAI 65:21, 23.
“Sran’m be su tin-man amun su fii kun, i ti srɛ su kun-man amun. Amún nyán amun ti sa sroesroe’m be nun, afin be su kun-man amun srɛ kun.”—EZAI 54:14.
LIKE NGA I SƆ’N KLE E’N:
BE SU WUNMAN SA SROESROE KƐ ASIƐ’N M’Ɔ KEJE’N SA’N KUN.
ABONUAN SA:
ZEZI CƐNNIN SRAN WIE MƆ BE WULI’N.—MATIE 9:18-26; LIK 7:11-17.
KASIƐ:
“Cɛn wie lele be kwlaa nga be o ndia nun’n, [...] bé fín ndia’n nun fíte.”—ZAN 5:28, 29.
“Be nga be wuli bɔ be o jenvie’n nun’n, ɔ yi be mannin. Be nga be o wie’n nin blɔlɔ’m be sa nun’n, be yi be mannin.”—SA NGLO YILƐ 20:13.
LIKE NGA I SƆ’N KLE E’N:
BÉ CÉN E AWLƐN SU SRAN NGA BE WULI’N.
