1, 2. Март ајынын 31-и инсанлары бирләшдирән һансы әламәтдар мәрасим кечириләҹәк? (Мәгаләнин әввәлиндәки шәклә бахын.)

2018-ҹи ил март ајынын 31-и, ҝүн гүруба енән әрәфәләрдә Аллаһын милјонларла хидмәтчиси вә һәгигәтлә марагланан инсанлар топлашыб Иса Мәсиһин өлүмүнү анма мәрасимини гејд едәҹәкләр. Һәр ил гејд олунан бу мәрасим инсанлары бирләшдирән тәдбирләрин ән әламәтдарыдыр!

² Ҝүнәш шәргдән гәрбә доғру һәрәкәт едиб саатлар бир-бирини әвәз етдикҹә мүхтәлиф өлкәләрдә милјонларла инсанын бу мәрасимә гатылмасы шүбһәсиз ки, Јеһова Аллаһын вә Иса Мәсиһин үрәјини даға дөндәрир. Мүгәддәс Китабда хәбәр верилмишди ки, «һәр халга, һәр тајфаја, һәр үммәтә вә һәр дилә мәнсуб адамлардан ибарәт, һеч кәсин сајмаға гадир олмадығы бөјүк бир издиһам» уҹадан һајгыраҹаг: «Хиласымыза ҝөрә тахтда отуран Аллаһымыза вә Гузуја борҹлујуг» (Вәһј 7:9, 10). Анма мәрасими бу ајәләрин руһуна ујғун олараг Аллаһын вә Мәсиһин шаныны уҹалтмаг үчүн мисилсиз бир фүрсәтдир.

3. Бу мәгаләдә һансы суалларын ҹавабыны тапаҹағыг?

 ³ Бу мәгаләдә анма мәрасими илә бағлы нөвбәти суаллар ҹавабландырылаҹаг: 1) Анма мәрасиминдән там фајдаланмаг үчүн бу тәдбирә неҹә һазырлаша биләрик? 2) Анма мәрасими Аллаһын халгыны неҹә бирләшдирир? 3) Һәр биримиз бу бирлијә неҹә төһфә верә биләрик? 4) Анма мәрасими нә вахта кими гејд олунаҹаг?

4. Нәјә ҝөрә әлимиздән ҝәләни едиб анма мәрасиминдә иштирак етмәлијик?

⁴ Биз илк нөвбәдә анма мәрасиминдә иштирак етмәјин ваҹиблијини дәрк етмәлијик. Јаддан чыхармајаг ки, јығынҹагларда иштирак етмәк ваҹиб ибадәтдир. Шүбһәсиз, Јеһова Аллаһ вә Иса Мәсиһ илин бу ән мүһүм јығынҹағына кимин ҝәлиб, кимин ҝәлмәдијинә фикир верир. Әлбәттә, имкан дахилиндә, һәр биримиз бу мәрасимә ҝәләнләрин сырасында олмаг истәјәрдик. Әҝәр ибадәтләримизин гәдрини билиб буну әмәлдә ҝөстәририксә, адымыз Јеһова Аллаһын дәрҝаһындакы «хатирә китабы»на, јәни әбәди һәјат варисләринин адынын јазылдығы «һәјат китабы»на даһа мөһкәм һәкк олунур (Мәл. 3:16; Вәһј 20:15).

5. Анма мәрасими јахынлашдыгҹа иман јолунда олуб-олмадығымызы неҹә јохлаја биләрик?

⁵ Анма мәрасими јахынлашдыгҹа јахшы оларды, хүсуси вахт ајырыб Јеһова Аллаһла мүнасибәтимизин нә вәзијјәтдә олдуғу барәдә ҹидди дүшүнәк. Әлбәттә ки, бунунла әлагәдар дуа етмәк дә чох мүнасиб оларды. (2 Коринфлиләрә 13:5 ајәсини охујун.) Бизә бујрулур ки, иман јолунда олуб-олмадығымызы јохлајаг. Буну етмәк үчүн өзүмүздән сорушмалыјыг: «Мән һәгигәтән дә инаныраммы ки, бизим тәшкилатымыз Аллаһын Өз ирадәсини иҹра етмәк үчүн сечдији јеҝанә тәшкилатдыр? Инсанлара Падшаһлыг мүждәсини чатдырмаг, онлара тәлим вермәк үчүн әлимдән ҝәләни едирәмми? Һәјат тәрзимдән ҝөрүнүрмү ки, мән ахырзаманда јашадығыма, Шејтан сәлтәнәтинин сона чатдығына, доғрудан да, инанырам? Јеһова Аллаһа вә Иса Мәсиһә етибарым вәфтиз олдуғум вахтдакы кими ҝүҹлүдүрмү?» (Мәт. 24:14; 2 Тим. 3:1; Ибр. 3:14). Өзүмүзә бу ҹүр суаллар вермәклә «өзүнүзү сынајын» ҝөстәришинә әмәл етмиш олуруг.

6. а) Әбәди һәјата апаран јеҝанә јол һансыдыр? б) Бир гардашымыз һәр ил анма мәрасиминә неҹә һазырлашыр вә биз неҹә һазырлаша биләрик?

⁶ Анма мәрасиминә һазырлашмаг үчүн һәмчинин нәшрләримиздән бу тәдбирлә бағлы мәгаләләр охујуб онун әһәмијјәтини өзүмүзә хатырлатмалыјыг. (Јәһја 3:16; 17:3 ајәләрини охујун.) Әбәди һәјата апаран јеҝанә јол Јеһованы танымаг вә Онун Оғлу Иса Мәсиһә иман етмәкдир. Буна ҝөрә јахшы оларды ки, анма мәрасими әрәфәсиндә бизи Јеһоваја вә Исаја јахынлашдыраҹаг мөвзулар сечиб арашдыраг. Мәсәлән, узун илләрдир ағсаггал кими хидмәт едән бир гардаш анма мәрасиминә, еләҹә дә Јеһова вә Исанын бизә изһар етдикләри мәһәббәтә һәср олунан «Ҝөзәтчи гүлләси» мәгаләләрини топлајыб сахлајыр. Һәр ил о, бу мәгаләләри тәзәдән охујур вә Исанын өлүмүнү гејд етмәјин әһәмијјәтинин дәринлијинә варыр. О, һәм дә өз архивини даима тәзәләјир. Гардаш дејир ки, һәр ил бу мәгаләләри вә «Мүгәддәс Јазылары һәр ҝүн арашдырын» брошүрүндә анма мәрасими илә бағлы истинад олунан ајәләри охумагла јени шејләр өјрәнир. Ән өнәмлиси исә бу мүталиәнин сајәсиндә илдән-илә онун Јеһова Аллаһа вә Иса Мәсиһә мәһәббәти дәринләшир. Биз дә бу ҹүр мүталиә ҹәдвәли тәртиб етмәклә Аллаһа вә Мәсиһә мәһәббәтимизи, миннәтдарлығымызы ҝүҹләндирәр, анма мәрасиминдән там фајдалана биләрик.

7. а) Ағанын шам јемәји адланан мәрасим биринҹи дәфә кечириләндә Иса Мәсиһ нә һагда дуа етмишди? б) Јеһованын Иса Мәсиһин дуасына ҹаваб вердијини нә ҝөстәрир?

⁷ Ағанын шам јемәји адланан мәрасим  биринҹи дәфә кечириләндә Иса Мәсиһ Аллаһдан дуада давамчылары үчүн бирлик диләмишди. О истәјирди ки, онунла Атасынын арасындакы вәһдәт онларда да олсун. (Јәһја 17:20, 21 ајәләрини охујун.) Бәли, Јеһова севимли оғлунун дуасына ҹаваб верди. Ибадәт ҝөрүшләримиз Исанын давамчыларынын бирлијинә нишанәдир. Анма мәрасими исә бу бирлијин ән бариз нүмунәсидир. Һәмин ҝүн бүтүн дүнјада фәргли халглардан, иргләрдән олан милјонларла инсан ибадәт евләринә топлашыр. Бунунла да ҝөстәрирләр ки, Исаны Аллаһын ҝөндәрдијинә инанырлар. Лакин бәзи өлкәләрдә мүхтәлиф иргләрин бир јердә ибадәт етмәси ҝөрүнмәмиш һадисәдир, бәзи ҹәмијјәтләрдә исә буна һәгарәтлә бахырлар. Амма өнәмли олан Аллаһын вә Мәсиһин мүнасибәтидир. Онлар арамыздакы бу бирлији ҝөрәндә үрәкләри шад олур!

8. Јеһова Аллаһ халгы арасындакы бирликлә бағлы Һизгијал пејғәмбәрә һансы хәбәри назил етмишди?

⁸ Бизим үчүн исә арамыздакы бирлик һеч дә тәәҹҹүблү дејил, чүнки Јеһова бу барәдә Һизгијал пејғәмбәр васитәсилә хәбәр вериб. О, пејғәмбәрә үстүндә «Јәһуда... үчүн» вә «Јусиф үчүн» јазысы олан ики чубуғу бирләшдирмәји бујурмушду. (Һизгијал 37:15—17 ајәләрини охујун.) Бунунла бағлы «Ҝөзәтчи гүлләси» журналынын 2016-ҹы ил ијул сајында дәрҹ олунан «Охуҹуларын суаллары» рубрикасында јазылыб: «Јеһова Һизгијал пејғәмбәрә Исраил халгынын вәд олунмуш дијара гајыдандан сонра бирләшәҹәјини хәбәр вермишди. Бу, һәмчинин Аллаһын халгынын ахырзаманда бирләшәҹәјинә даир пејғәмбәрлик иди».

9. Һизгијалын бирлик барәдә сөјләдији пејғәмбәрлик һәр ил анма мәрасиминдә өз тәсдигини неҹә тапыр?

⁹ 1919-ҹу илин әввәлләриндән башлајараг Јеһова Аллаһ илк нөвбәдә Јәһуда чубуғу илә символизә олунан мәсһ олунмуш мәсиһиләри тәдриҹән јенидән тәшкил едиб бирләшдирди. Вахт кечдикҹә мәсһ олунмуш мәсиһиләрә Јусиф чубуғу илә символизә олунан јер үзү үмидинә малик мәсиһиләр гошулмаға башлады. Беләҹә, бу ики груп «бир сүрүдә» бирләшди (Јәһ. 10:16; Зәк. 8:23). Јеһова вәд етмишди ки, ики чубуғу бирләшдириб әлиндә бир чубуг едәҹәк (Һизг. 37:19). Бу ҝүн һәр ики груп бир падшаһын, Јеһованын пејғәмбәрликдә «гулум Давуд» адландырдығы Иса Мәсиһин рәһбәрлији алтында Аллаһа бирликдә ибадәт едир (Һизг. 37:24, 25). Һәр ил мәсһ олунмуш мәсиһиләр вә јердә јашамаға үмид едән мәсиһиләр анма мәрасимини гејд етмәк үчүн бир јерә топлашанда Һизгијалын бирлик барәдә сөјләдији пејғәмбәрлик өз тәсдигини тапыр. Бәс бирлијә ҹан атмаг вә бу бирлији горумаг үчүн һәр биримиз өз тәрәфимиздән нә едә биләрик?

10. Бирлијә ҹан атдығымызы неҹә ҝөстәрә биләрик?

¹⁰ Бирлијә ҹан атмаг үчүн биз илк нөвбәдә тәвазөкар олмалыјыг. Иса Мәсиһ давамчыларыны өзләрини алчалдыб тәвазөкар олмаға сәсләјирди (Мәт. 23:12). Әҝәр биз дахилән садә, тәвазөкар инсаныгса, һеч вахт дүнјадакы инсанлар кими өзүмүзү башгаларындан үстүн сајмајаҹағыг. Тәвазөкарлыг бизә јығынҹагдакы мәсул гардашлара табе олмаға көмәк едәҹәк. Бу ҹүр итаәткарлыг руһу јығынҹағын бирлији үчүн чох әһәмијјәтлидир. Ән әсасы исә, тәвазөкар инсан Аллаһын севдији бәндәләрдәндир, «чүнки Аллаһ мәғрурлара гаршы чыхыр, тәвазөкарлара исә лүтф ҝөстәрир» (1 Бут. 5:5).

11. Анма мәрасиминдә истифадә олунан символларын мәнасы барәдә дүшүнмәк бизә бирлијә ҹан атмаға неҹә көмәк едә биләр?

¹¹ Бизә бирлијә ҹан атмаға көмәк едәҹәк нөвбәти аддым анма мәрасиминдә истифадә олунан символларын, мајасыз чөрәјин вә гырмызы шәрабын мәнасы барәдә дүшүнмәкдир. Буну биз анма мәрасиминдән әввәл,  хүсусилә дә мәрасим вахты едә биләрик (1 Кор. 11:23—25). Билдијимиз кими чөрәк Мәсиһин уғрумузда гурбан вердији ҝүнаһсыз бәдәнини, шәраб исә төкүлән ганыны тәмсил едир. Амма биз буну, садәҹә бир мәлумат кими гаврамагла кифајәтләнмәмәлијик. Бунун мәнасы чох дәриндир. Мәсиһин фидјә гурбанлығы ики бөјүк мәһәббәтин — Јеһова Аллаһын вә Иса Мәсиһин мәһәббәтинин тәҹәссүмүдүр. Аллаһ бизи хилас етмәк үчүн Оғлуну гурбан вериб. Мәсиһ исә бизә ҝөрә көнүл хошлуғу илә өз ҹанындан кечиб. Дүнјада бундан ҝүҹлү мәһәббәт ола билмәз! Бу барәдә дәриндән дүшүнмәк, бизи онларын бу мәһәббәтинә гаршылыг вермәјә тәшвиг едәҹәк. Беләҹә, һәр биримизин Јеһова Аллаһа бәсләдији мәһәббәт бир ип кими бизи бир-биримизә бағлајыб арамыздакы бирлији мөһкәмләндирәҹәк.

12. Борҹларыны ҝери алмаг истәјән падшаһ мәсәлиндән нә өјрәнирик?

¹² Бирлијә ҹан атмағын үчүнҹү јолу башгаларыны үрәкдән бағышламагдыр. Хәтримизә дәјән инсаны бағышлајанда ҝөстәририк ки, Исанын гурбанлығы әсасында бизим ҝүнаһларымызы бағышладығы үчүн Јеһоваја миннәтдарыг. Бу фикри Исанын Мәтта 18:23—34 ајәләриндә чәкдији мәсәл јахшы ҝөстәрир. Ҝәлин өзүмүздән сорушаг: «Мән Исанын нәсиһәтинә әмәл етмәјә нә дәрәҹәдә гәрарлыјам? Диндашыма сәбир вә анлајышла јанашмаға чалышыраммы? Мәнә јара вуран диндашымы бағышламаға һазыраммы?» Дүздүр, ҝүнаһын дәрәҹәси олур вә елә ҝүнаһлар вар ки, фани инсана бунлары бағышламаг чох чәтиндир. Анҹаг јухарыдакы мәсәлдән ҝөрүрүк ки, Аллаһ биздән буну ҝөзләјир. (Мәтта 18:35 ајәсини охујун.) Иса Мәсиһ ајдын ҝөстәрди ки, әҝәр биз бағышламаға әсас олан јердә гардашымызы бағышламырыгса, Јеһова да бизи бағышламајаҹаг. Бәли, бу чох ҹидди мәсәләдир! Беләликлә, Иса пејғәмбәрин тәлимләринә мүвафиг давраныб башгаларыны бағышлајанда арамыздакы мисилсиз бирлији горумуш олуруг.

13. Бирлик сүлһпәрвәрликдән неҹә асылыдыр?

¹³ Башгаларыны бағышлајан инсан сүлһпәрвәр инсандыр. Һәвари Булус ҝөстәриш вермишди: «Сүлһүн бирләшдириҹи телләри арасында  руһун вердији бирлији горумаға үрәкдән чалышын» (Ефес. 4:3). Анма мәрасими әрәфәсиндә, әләлхүсус мәрасимин өзүндә башгалары илә неҹә рәфтар етдијимиз барәдә дүшүнмәјимиз јахшы оларды. Өзүмүздән соруша биләрик: «Давранышымдан ҝөрүнүрмү ки, мән башгаларына үрәјимдә кин бәсләмирәм? Сүлһә, бирлијә ҹидд-ҹәһдлә ҹан атыраммы?» Бәли, Ағанын шам јемәји әрәфәси бу суалларын үзәриндә дүшүнмәјин әсл вахтыдыр.

14. Мәһәббәтлә бир-биримизә гаршы дөзүмлү олмаг нә демәкдир?

¹⁴ Бирлијә ҹан атмағын дөрдүнҹү јолу мәһәббәт саһиби Јеһова Аллаһ кими мәһәббәтлә давранмагдыр (1 Јәһ. 4:8). Кимсә диндашы һаггында дејә биләр: «Она дөзәрәм, амма севә билмәрәм». Лакин белә дүшүнҹә һәвари Булусун «мәһәббәтлә бир-биринизә гаршы дөзүмлү» олун ҝөстәришинә зидд оларды (Ефес. 4:2). Һәвари, садәҹә бир-биринизә гаршы дөзүмлү олун демәмишди. О, мәһәббәтлә дөзүмлү олун демишди. Ҝөрүндүјү кими бунлар фәргли шејләрдир. Бизим јығынҹаглар мүхтәлиф инсанлардан ибарәтдир, һамысыны да Јеһова Өзүнә ҹәлб едиб (Јәһ. 6:44). Јеһова бу инсанлара мәһәббәт бәсләјир ки, онлары Өзүнә ҹәлб едиб. Әҝәр Аллаһ онлары севирсә, биз неҹә дејә биләрик ки, мән филанкәси севә билмәрәм?! Јеһова бизә диндашларымызы севмәји әмр едир. Онлардан бу мәһәббәти әсирҝәмәјә һаггымыз јохдур (1 Јәһ. 4:20, 21).

15. Һарадан билирик ки, анма мәрасими әбәдијјән гејд олунмајаҹаг?

¹⁵ Бир ҝүн ҝәләҹәк, анма мәрасимини сонунҹу дәфә гејд едәҹәјик. Буну һарадан билирик? Һәвари Булусун коринфлиләрә үнванладығы биринҹи мәктубдан. О, бу мәктубда мәсһ олунмуш мәсиһиләрә јазмышды ки, онлар һәр ил Мәсиһин өлүмүнү анмагла «Аға ҝәләнәдәк... онун өлүмүнү бәјан етмиш» олурлар (1 Кор. 11:26). Һәвари «Аға ҝәләнәдәк» дејәндә һансы вахты нәзәрдә тутурду? Иса Мәсиһ өзү ахырзаманла бағлы пејғәмбәрлијиндә өз ҝәлиши һагда данышмышды. Булус елә һәмин вахты нәзәрдә тутурду. Мәсиһ бизи јахын ҝәләҹәкдә ҝөзләјән бөјүк мүсибәт барәдә демишди: «Ҝөјдә инсан Оғлунун рәмзи пејда олаҹаг. Јер үзүнүн бүтүн гәбиләләри кәдәр ичиндә синә дөјәҹәк, инсан Оғлунун гүдрәтлә, ҹалал ичиндә булудларын үзәриндә ҝәлдијини ҝөрәҹәк. [Иса] ҝүҹлү кәрәнај сәси илә өз мәләкләрини ҝөндәрәҹәк вә онлар дүнјанын дөрд тәрәфиндән, ҝөјүн бир уҹундан о бири уҹунадәк Онун сечдикләрини јығаҹаглар» (Мәт. 24:29—31). Сечилмишләрин јығылмасы һәмин вахт һәлә јер үзүндә јашајан мәсһ олунмуш мәсиһиләрин ҝөјләр мүкафатыны алмасыдыр. Бу јығым бөјүк мүсибәтин илк мәрһәләси кечәндән сонра, Армаҝеддондан исә әввәл баш верәҹәк. Армаҝеддон вахты мәсһ олунмушларын һамысы, 144 000 нәфәр Мәсиһлә бирҝә јерин падшаһларынын мәһвиндә иштирак едәҹәк (Вәһј 17:12—14). Мәсиһин мәсһ олунмуш давамчыларыны ҝөјә апармаздан әввәл кечирилән анма мәрасими сон анма мәрасими олаҹаг.

16. Нәјә ҝөрә үзүмүзә ҝәлән анма мәрасиминдә иштирак етмәјимиз ваҹибдир?

¹⁶ Ҝәлин мәгсәд гојаг ки, мартын 31-и кечириләҹәк анма мәрасимини бурахмајаг. Һәр заман арамыздакы бирлији горумаға чалышаг вә дуаларымызда Аллаһдан бунун үчүн көмәк истәјәк. (Зәбур 133:1 ајәсини охујун.) Һәмчинин нәзәрә алаг ки, анма мәрасими әбәдијјән гејд олунмајаҹаг, бир ҝүн сонунҹу анма мәрасимини кечирәҹәјик. Одур ки, ҝәлин әлимиздән ҝәләни едиб бу мәрасимдә иштирак едәк вә арамыздакы бирлији гијмәтләндирдијимизи ҝөстәрәк.