1. Ano an hinungdan nga nalipay hi Pablo ha mga Kristiano ha Korinto?

TUIG adto han 55 C.E. Hi apostol Pablo nakadto ha syudad han Troas, pero ginhihinunahuna la gihapon niya an kabugtoan ha Korinto. Temprano hito nga tuig, nasubo hiya han iya hinbaroan nga nag-aaragway hira. Hinigugma niya hira sugad hin iya mga anak, salit nagpadara hiya hin surat basi tadungon hira. (1 Kor. 1:11; 4:15) Ginhangyo liwat niya an iya igkasi-magburuhat nga hi Tito nga kumadto ha ira ngan katapos makigkita ha iya ha Troas basi isumat an nahitabo. Yana hi Pablo naghihinulat kan Tito ha Troas, kay karuyag gud niya hibaroan an kahimtang han kabugtoan ha Korinto. Kondi nasubo gud hi Pablo kay waray umabot hi Tito. Ano an ginbuhat ni Pablo? Kinadto hiya ha Masedonia ngan nalipay gud nga nagkita hira didto. Nagsumat hi Tito nga ginsunod han kabugtoan ha Korinto an sagdon ni Pablo ngan karuyag gud nira hiya makita. Han hinbatian ni Pablo iton maopay nga sumat, ‘nalipay hiya hin labi pa.’—2 Kor. 2:12, 13; 7:5-9.

2. (a) Ano an iginsurat ni Pablo ha mga taga-Korinto mahitungod han pagtoo ngan kalipay? (b) Ano nga mga pakiana an aton hihisgotan?

² Waray pag-iha katapos hito, nagsurat hi Pablo hin ikaduha nga surat ha mga taga-Korinto. Hiya nagsiring ha ira: “Diri ako nasiring nga kami an nagbubuot han iyo pagtoo, kondi mga igkasi-magburuhat kami para han iyo kalipay, kay natindog kamo nga marig-on tungod han iyo pagtoo.” (2 Kor. 1:24, NW) Ano an karuyag sidngon ni Pablo? Ngan ano an sadang magin epekto hito ha mga tigurang yana?

3. (a) Ano an karuyag sidngon ni Pablo han hiya nagsurat: “Natindog kamo nga marig-on tungod han iyo pagtoo”? (b) Paonan-o ginsusubad han mga tigurang yana an susbaranan ni Pablo?

³ Hi Pablo nag-unabi hin duha nga importante nga bahin han aton pagsingba—pagtoo ngan kalipay. Hinumdumi nga may kalabotan ha pagtoo, hiya nagsurat: “Diri ako nasiring nga kami an nagbubuot han iyo pagtoo, . . . kay natindog  kamo nga marig-on tungod han iyo pagtoo.” Iginpapakita hini nga mga pulong nga maaram hi Pablo nga an kabugtoan ha Korinto nagpapabilin nga marig-on, diri tungod ha iya o ha bisan hin-o nga tawo, kondi tungod han ira pagtoo ha Dios. Salit diri kinahanglan kontrolon ni Pablo an ira pagtoo, ngan diri niya karuyag buhaton ito. Nasarig hiya nga matinumanon hira nga mga Kristiano nga naruruyag magbuhat han husto. (2 Kor. 2:3) Yana, ginsusubad han mga tigurang an susbaranan ni Pablo pinaagi ha pagpahayag han ira pagsarig ha pagtoo ngan motibo han kabugtoan ha pag-alagad ha Dios. (2 Tes. 3:4) Imbes nga maghimo hin istrikto nga mga surundon para ha kongregasyon, an mga tigurang nasarig ha mga prinsipyo ha Kasuratan ngan ha mga instruksyon tikang ha organisasyon ni Jehova. An mga tigurang yana diri nagbubuot ha pagtoo han ira kabugtoan.—1 Ped. 5:2, 3.

4. (a) Ano an karuyag sidngon ni Pablo han hiya nagsurat: “Mga igkasi-magburuhat kami para han iyo kalipay”? (b) Paonan-o ginsusubad han mga tigurang yana an disposisyon ni Pablo?

⁴ Hi Pablo nagsiring liwat: “Mga igkasi-magburuhat kami para han iyo kalipay.” Hito nga mga pulong, iya gintutudlok an iya kalugaringon ngan an iya duok nga mga kaupod. Kay ano nga masisiring naton ito? Kay ha amo gihapon nga surat, iginpahinumdom ni Pablo ha mga taga-Korinto an duha han iya mga kaupod han hiya nagsiring: “Hi Jesu-Kristo . . . amon iginwali ha iyo, bisan iginwali nakon, ngan ni Silbano, ngan ni Timoteo.” (2 Kor. 1:19) Dugang pa, kon ginagamit ni Pablo ha iya mga surat an mga pulong nga “mga igkasi-magburuhat,” nagtutudlok ito pirme ha iya duok nga mga kaupod, sugad kanda Apolo, Akila, Prisila, Timoteo, Tito, ngan iba pa. (Roma 16:3, 21; 1 Kor. 3:6-9; 2 Kor. 8:23) Salit pinaagi ha pagsiring: “Mga igkasi-magburuhat kami para han iyo kalipay,” ginpasarig ni Pablo an kongregasyon ha Korinto nga karuyag niya ngan han iya mga kaupod nga buhaton an ngatanan nga ira mahihimo basi buligan an ngatanan nga membro hito nga magin malipayon. Yana, ito liwat an hingyap han mga tigurang. Karuyag nira buhaton an ngatanan nga ira mahihimo basi buligan an ira kabugtoan ha “pag-alagad upod an kalipay kan Jehova.”—Sal. 100:2; Fil. 1:25.

5. Ano an iginpakiana ha pipira nga kabugtoan? Ano an sadang naton hunahunaon samtang aton ginhihisgotan an ira mga baton?

⁵ Hinin bag-o la, an pipira nga madasigon nga kabugtoan ha iba-iba nga bahin han kalibotan ginpakianhan hini, “Ano an ginsiring ngan ginbuhat han usa nga tigurang nga nakabulig ha iyo nga magin mas malipayon?” Samtang aton ginhihisgotan an mga obserbasyon hini nga kabugtoan, itanding ito ha imo baton kon ikaw an ginpakianhan. Dugang pa, hunahunaon naton ngatanan kon paonan-o kita makakabulig basi magin malipayon an aton kongregasyon. *

6, 7. (a) Ano an usa nga paagi nga masusubad han mga tigurang hi Jesus, hi Pablo, ngan an iba pa nga surugoon han Dios? (b) Kay ano nga an paghinumdom han ngaran han kabugtoan nakakabulig basi magin mas malipayon hira?

⁶ Damu nga kabugtoan an nasiring nga nagigin mas malipayon hira kon an mga tigurang nagpapakita hin personal nga interes ha ira. Usa nga paagi nga ginbubuhat ito han mga tigurang amo an pagsubad han susbaranan ni David, ni Elihu, ngan ni Jesus. (Basaha an 2 Samuel 9:6; Job 33:1; Lukas 19:5.) An tagsa hini nga mga surugoon ni Jehova nagpakita hin sinsero nga interes ha iba pinaagi ha paggamit han ira ngaran. Hi Pablo liwat maaram nga importante an paghinumdom ngan paggamit han ngaran han iya mga igkasi-tumuroo. Ha kataposan han usa niya nga surat, sobra 25 nga kabugtoan an usa-usa nga iya ginngaranan ha iya pangumusta, upod na hi Persida, usa nga bugto nga babaye nga mahitungod ha iya hi Pablo nagsiring: “Pangumustaha niyo hi Persida nga hinigugma.”—Roma 16:3-15.

⁷ An iba nga tigurang nakukurian paghinumdom han mga ngaran. Kondi kon nangangalimbasog  hira pagbuhat hito, sugad hin ginsisidngan nira an ira mga igkasi-tumuroo, ‘Importante ka ha akon.’ (Eks. 33:17) Labi na nga makakabulig an mga tigurang nga magin mas malipayon an kabugtoan kon nahinunumdoman nira an ngaran han kabugtoan kon gintatawag pagkomento ha Pag-aram ha Barantayan o ha iba pa nga katirok.—Itanding an Juan 10:3.

8. Ano an usa nga importante nga paagi nga ginsubad ni Pablo an susbaranan ni Jehova ngan ni Jesus?

⁸ Hi Pablo nagpakita liwat hin interes ha iba pinaagi ha paghatag hin sinsero nga kumendasyon, nga amo an usa pa nga paagi basi mabuligan an kabugtoan nga magin mas malipayon. Salit ha amo gihapon nga surat diin gin-unabi ni Pablo an iya hingyap nga buligan an kabugtoan nga magin malipayon, hiya nagsiring: “Ipinaparayaw ko kamo!” (2 Kor. 7:4, Maopay nga Sumat) Tungod hito nga kumendasyon sigurado nga inabat an kabugtoan ha Korinto nga hinigugma hira. Iginpahayag liwat ni Pablo an sugad nga kumendasyon ha iba nga kongregasyon. (Roma 1:8; Fil. 1:3-5; 1 Tes. 1:8) Ha pagkamatuod, katapos unabihon hi Persida ha iya surat ha kongregasyon ha Roma, hiya nagsiring: “Nagbuhat [hiya] hin damu tungod ha Ginoo.” (Roma 16:12) Sigurado nga nadasig gud iton matinumanon nga bugto hito nga kumendasyon! Ha paghatag hin kumendasyon ha iba, ginsubad ni Pablo an susbaranan ni Jehova ngan ni Jesus.—Basaha an Markos 1:9-11; Juan 1:47; Pah. 2:2, 13, 19.

9. Kay ano nga an paghatag ngan pagkarawat hin kumendasyon nakakabulig basi magin mas malipayon an kongregasyon?

⁹ An mga tigurang yana maaram liwat nga importante nga ipahayag nira an ira apresasyon ha kabugtoan. (Prob. 3:27; 15:23) Ha kada panahon nga ginbubuhat ito han usa nga tigurang, sugad hin ginsisidngan niya an kabugtoan: ‘Nakita ko an imo ginbuhat. Importante ka ha akon.’ Kinahanglan mabatian han kabugtoan an nagpapasarig nga mga pulong han mga tigurang. Usa nga sister nga sobra 50 anyos an nagpahayag han inaabat han damu han hiya nagsiring: “Ha akon gintatrabahoan, talagsa gud la apresyaron an akon ginbubuhat. Malabyaw ngan mahilig makigkompetensya an akon mga katrabaho. Salit kon ginkukumendasyonan ako han usa nga tigurang ha akon nabuhat para ha kongregasyon, nakakarepresko gud ito ngan nakakapakusog! Inaabat ko nga hinigugma ako han akon langitnon nga Amay.” Puropariho liwat hito an gin-abat han usa nga brother nga solo nga kag-anak nga may duha nga anak. Hinin bag-o la kinasingkasing nga ginkumendasyonan hiya han usa nga tigurang. Ano an epekto hito ha brother? Hiya nagsiring: “Naparig-on gud ako han ginsiring han tigurang!” Oo, kon sinsero nga ginkukumendasyonan han usa nga tigurang an kabugtoan, iya ginpaparig-on hira ngan ginbubuligan nga magin mas malipayon. Sugad nga resulta, magkakaada hira dugang nga kusog nga magpadayon ha paglakat ha dalan ngadto ha kinabuhi ‘ngan diri manluya.’—Isa. 40:31.

10, 11. (a) Paonan-o masusubad han mga tigurang an susbaranan ni Nehemia? (b) Ano an mabulig ha usa nga tigurang ha paghatag hin espirituwal nga hatag kon nabisita ha kabugtoan?

¹⁰ Ano an usa pa nga importante nga paagi nga maipapakita han mga tigurang an ira personal nga interes ha kabugtoan ngan mabuligan hira nga magin mas malipayon? Pinaagi ha pagbulig dayon ha mga nanginginahanglan hin pagdasig. (Basaha an Buhat 20:28.) Kon ginbubuhat ito han mga tigurang, ira ginsusubad an matinumanon nga mga surugoon han Dios ha kadaan nga panahon. Pananglitan, tagda an ginbuhat han matinumanon nga paramangno nga hi Nehemia han iya nakita nga nagluya an espirituwalidad han iba nga iya igkasi-Judio. An Biblia nasiring nga binuhát dayon hiya ngan gindasig hira. (Neh. 4:14) Yana, ito liwat an karuyag buhaton han mga tigurang. Kon nanluluya an kabugtoan, ginbubuhat nira an ira mahihimo basi dasigon hira. Basi mabuhat ito, ginbibisita nira an kabugtoan ha ira mga balay kon igintutugot han kahimtang. Hito nga mga pagbisita, karuyag nira ‘maghatag hin  espirituhanon nga hatag’ ha kabugtoan. (Roma 1:11) Ano an mabulig ha mga tigurang ha pagbuhat hito?

¹¹ Antes bumisita, an usa nga tigurang kinahanglan maggahin hin panahon ha paghunahuna mahitungod han bugto nga iya bibisitahon. Ano an mga problema hito nga bugto? Ano an puydi isiring nga makakaparig-on ha iya? Ano nga teksto o eksperyensya han usa nga tawohan han Biblia an aplikado ha iya kahimtang? An abanse nga paghunahuna hito makakabulig ha tigurang nga maghisgot hin mapulsanon nga mga butang imbes nga makiistorya mahitungod han diri importante nga mga butang. Durante han pagbisita ha kabugtoan, an tigurang naghahatag ha ira hin higayon nga mag-istorya samtang namamati hiya hin maopay. (Jak. 1:19) Usa nga sister an nagsiring: “Nakakaliaw gud kon an usa nga tigurang namamati hin maopay.”—Luk. 8:18.

12. Hin-o ha kongregasyon an nagkikinahanglan hin pagdasig, ngan kay ano?

¹² Hin-o an magpapahimulos ha pagbisita han mga tigurang? Ginsagdonan ni Pablo an iya mga igkasi-tigurang nga mangnoan ‘an ngatanan nga panon.’ Oo, an ngatanan nga membro han kongregasyon nagkikinahanglan hin pagdasig, upod na an mga magwarali ngan mga payunir nga matinumanon nga nagbubuhat han ira ministeryo kada tuig. Kay ano nga nagkikinahanglan hira hin pagdasig han mga tigurang? Kay bisan kon marig-on an ira espirituwalidad, usahay naabat liwat hira nga baga hin diri na nira maiilob an mga problema dinhi hinin maraot nga kalibotan. Ha pag-ilustrar kon kay ano nga bisan an surugoon han Dios nga marig-on an pagtoo usahay bangin nagkikinahanglan hin bulig han usa nga kaupod, hisgotan naton an usa nga hitabo ha kinabuhi ni Hadi David.

13. (a) Ano nga kahimtang ni David an ginsalingabot ni Isbi-benob? (b) Kay ano nga nabuligan dayon ni Abisay hi David?

¹³ Waray pag-iha katapos dihogan sugad nga hadi an batan-on nga hi David, nakig-away hiya kan Goliat, usa nga higante nga tikang ha lahi han mga Repaim. Ginpatay han maisugon nga hi David an higante. (1 Sam. 17:4, 48-51; 1 Kron.  20:5, 8) Paglabay hin damu ka tuig, durante han usa nga girra kontra ha mga Pilisteohanon, nakig-away na liwat hi David ha usa nga higante, hi Isbi-benob, nga tikang liwat ha tribo han mga Repaim. (2 Sam. 21:16) Kondi hito nga higayon, hapit mapatay han higante hi David. Kay ano? Diri tungod kay nawara an kaisog ni David kondi tungod kay naubosan na hiya hin kusog. An asoy nasiring: “Hi David nagtikaluya.” Han nakita ni Isbi-benob nga nanluluya na hi David, hiya “naghunahuna pagpatay kan David.” Kondi antes gud bun-on han higante hi David, “hi Abisay an anak nga lalaki ni Seruya binmulig ha iya [kan David], ngan hinampak an Pilisteohanon, ngan patayon hiya.” (2 Sam. 21:15-17) Hapit na gud mamatay hi David! Sigurado nga mapasalamaton gud hiya nga ginbantayan hiya ni Abisay ngan ginbuligan dayon han nameligro an iya kinabuhi! Ano nga mga leksyon an aton hibabaroan hini nga asoy?

14. (a) Paonan-o naton nalalamposan an sugad-higante nga mga problema? (b) Paonan-o mabubuligan han mga tigurang an kabugtoan nga maibalik an ira kusog ngan kalipay? Paghatag hin ehemplo.

¹⁴ Ha bug-os nga kalibotan, kita nga katawohan ni Jehova nagbubuhat han aton ministeryo bisan pa han mga pag-ulang ni Satanas ngan han iya mga sakop. An pipira ha aton inatubang na hin sugad-higante nga mga problema. Kondi bug-os nga sinarig kita kan Jehova ngan nagkaada kusog nga magpabilin nga matinumanon hiton magkuri gud nga kahimtang, sugad la nga hi David nagkaada kusog ha pagpatay kan Goliat. Kondi usahay kinakapoy ngan nanluluya kita tungod han padayon nga pag-ato ha kalibotan ni Satanas. Ha sugad hito nga mga kahimtang, mas madali kita mahulop ngan namimeligro nga madaog han mga problema nga malalamposan unta naton ha iba nga kahimtang. Hito nga mga higayon, an napapanahon nga suporta han usa nga tigurang makakabulig basi maibalik an aton kalipay ngan kusog, sugad han naeksperyensyahan han damu nga kabugtoan. Usa nga payunir nga sobra 60 anyos an nagsiring: “May panahon hadto nga diri maopay an akon inaabat ngan ginkakapoy ako pagsangyaw. Nakita han usa nga tigurang nga nanluluya ako ngan iya ako gindaop. Makapadasig an amon pag-istorya basado ha usa nga teksto ha Biblia. Gin-aplikar ko an iya mga suhestyon, ngan nagpahimulos ako.” Hiya nagsiring liwat: “Mahigugmaon gud ito nga tigurang nga iya nakita nga nanluluya ako ngan iya ako ginbuligan!” Oo, makalilipay hibaroan nga may mga tigurang kita nga mahigugmaon nga nagbabantay ngan pirme andam bumulig ha aton, sugad la nga hi Abisay andam bumulig kan David.

15, 16. (a) Kay ano nga hinigugma gud hi Pablo han iya mga igkasi-tumuroo? (b) Kay ano nga hinigugma naton an aton mga tigurang?

¹⁵ Maduruto gud an mga tigurang. Usahay diri hira nahingangaturog tungod han kabaraka ha kabugtoan, ngan bangin bumuhát hira ha hilarom nga kagab-ihon basi ig-ampo o buligan an kabugtoan. (2 Kor. 11:27, 28) Bisan pa hito, malipayon nga gintutuman nira hin bug-os an ira responsabilidad, sugad han ginbuhat ni Pablo. Hiya nagsurat ha mga taga-Korinto: “Ako tungod ha daku nga kalipay maghahalad ngan ighahalad tungod ha iyo mga kalag.” (2 Kor. 12:15) Oo, tungod han gugma ni Pablo ha kabugtoan, bug-os nga ‘iginhalad’ niya an iya kalugaringon, o gin-gamit an bug-os niya nga kusog, ha pagparig-on ha ira. (Basaha an 2 Korinto 2:4; Fil. 2:17; 1 Tes. 2:8) Diri urusahon nga hinigugma gud hiya han kabugtoan!—Buh. 20:31-38.

¹⁶ Sugad nga mga surugoon han Dios yana, hinigugma liwat naton an aton mga tigurang ngan nagpapasalamat kita kan Jehova nga iya igintagana hira. Nabulig hira ha aton nga magin mas malipayon pinaagi ha pagpakita hin personal nga interes ha aton. Nadadasig kita han ira mga pagbisita. Ngan mapasalamaton kita nga andam hira bumulig ha aton ha mga panahon nga naabat kita nga baga hin diri na naton maiilob an mga problema dinhi hini nga kalibotan. Oo, an sugad hini nga mga tigurang tinuod gud nga ‘mga igkasi-magburuhat para han aton kalipay.’