1. Isaysay kon kay ano nga importante nga magin mabinantayon kita ha oras ngan ha nahitatabo ha aton palibot. (Kitaa an retrato hini nga pahina.)

MAGTITIKANG na an programa han kombensyon. An tsirman kumadto na ha podyum ngan gin-abiabi an ngatanan. Panahon na nga lumingkod ngan pamatian an makaruruyag nga musika han orkestra han Watchtower, ngan labaw ha ngatanan, iandam an hunahuna ngan kasingkasing para ha mga pahayag. Pero kumusta man kon an pipira nga indibiduwal damu an ginbubuhat, naglilinakat-lakat, o nagpipinakiistorya ha ira kasangkayan, ngan diri maaram nga nagtitikang na an programa? Matin-aw nga diri hira makakagbantay kon ano na an oras ngan kon ano na an nahitatabo ha ira palibot. Ini nga kahimtang mahimo makabulig ha aton nga mas masabtan an pagkaimportante han pagbantay ha mas daku nga panhitabo nga hirani na umabot. Ano ito nga panhitabo?

2. Kay ano nga ginsidngan ni Jesus an iya mga disipulo nga “padayon nga magbantay”?

² Han nakiistorya hi Jesus ha iya mga disipulo may kalabotan ha “ikatarapos hini nga sistema,” gin-aghat niya hira: “Padayon nga magbantay, padayon nga mag-mata, kay diri kamo maaram kon  san-o an itinanda nga panahon.” Katapos, pauroutro niya hira nga ginpahamangnoan: “Padayon nga magbantay.” (Mat. 24:3; basaha an Marcos 13:32-37.) Ha pariho nga asoy ha libro ni Mateo, ginpahamangnoan ni Jesus an iya mga sumurunod nga magpabilin nga alerto: “Padayon nga magbantay, kay diri kamo maaram kon ano nga adlaw maabot an iyo Ginoo. . . . Mag-andam liwat kamo kay an Anak han tawo maabot ha oras nga diri niyo ginlalaoman.” Nagsiring hiya utro: “Padayon kamo nga magbantay kay diri kamo maaram han adlaw ngan han oras.”​—Mat. 24:42-44; 25:13.

3. Kay ano nga ginsusunod gud naton an pahamangno ni Jesus?

³ Sugad nga mga Saksi ni Jehova, ginsusunod gud naton an pahamangno ni Jesus. Maaram kita nga nagkikinabuhi kita ha kataposan nga mga adlaw ngan hirani na gud “an daku nga kasakitan”! (Dan. 12:4; Mat. 24:21) Nakikita naton an makangingirhat nga mga girra, kalyap nga imoralidad ngan karaotan, nagtitikadamu nga nawuwurok tungod han relihiyon, kakulang hin pagkaon, sakit, ngan linog nga nahitatabo ha iba-iba nga nasud. Maaram kita nga padayon nga iginsasangyaw han katawohan ni Jehova ha bisan diin an makatirigamnan nga mensahe han Ginhadian. (Mat. 24:7, 11, 12, 14; Luc. 21:11) Ginpapamulat gud naton an pag-abot han Ginoo ngan an katumanan han katuyoan han Dios.​—Mar. 13:26, 27.

4. (a) Kay ano makakasiring kita nga maaram na yana hi Jesus kon san-o an Armagedon? (b) Bisan diri kita maaram kon san-o magtitikang an daku nga kasakitan, ha ano kita makakasiguro?

⁴ Maaram kita han eksakto nga oras han pagtikang han tagsa nga sesyon han kombensyon. Pero may kalabotan ha daku nga kasakitan, bisan ano an aton himoon diri gud naton mahibabaroan an eksakto nga tuig, labi na an adlaw ngan oras han pagtikang hito. Han nakanhi hi Jesus ha tuna, hiya nagsiring: “Mahitungod hito nga adlaw ngan oras waray maaram, bisan an mga anghel ha langit o an Anak, kondi an Amay la.” (Mat. 24:36) Pero gintagan na han Dios hin awtoridad an Kristo basi makiggirra ha kalibotan ni Satanas. (Pah. 19:11-16) Salit makatadunganon la nga hunahunaon nga maaram na yana hi Jesus kon san-o an Armagedon. Pero kita, diri kita maaram hito. Importante gud nga padayon nga magin mabinantayon kita tubtob nga umabot an daku nga kasakitan. Pero may kalabotan hito nga panhitabo, igintanda na ni Jehova an eksakto nga panahon ha pagpahinabo hito. Nagtitikahirani ito kada adlaw, ngan ‘diri ito maglalangan.’ (Basaha an Habakuk 2:1-3.) Kay ano nga makakasiguro kita hini?

5. Paghatag hin ehemplo nga nagpapakita nga pirme natutuman an mga tagna ni Jehova ha eksakto nga panahon.

⁵ Pirme gud natutuman an mga tagna ni Jehova ha eksakto nga panahon! Tagda an eksakto nga panahon han gintalwas niya an mga Israelita tikang ha Ehipto. May kalabotan han Nisan 14, 1513 B.C.E., hi Moises nagsiring: ‘Katapos han upat ka gatos katloan ka tuig [430], hito ngahaw nga adlaw nahinabo nga an ngatanan nga kasundalohan ni Jehova ginawas tikang ha tuna ha Ehipto.’ (Eks. 12:40-42) An 430 ka tuig nagtikang han naimplementar an kasabotan ni Jehova kan Abraham han 1943 B.C.E. (Gal. 3:17, 18) Paglabay hin pipira ka panahon, hi Jehova nagsiring kan Abraham: “Hibaroi ha kamatuoran nga an imo mga katulinan magigin dumuruong ha tuna nga diri ira, ngan mag-aalagad ha ira; ngan ira pagsasakiton hira hin uupat ka gatos ka tuig [400].” (Gen. 15:13; Buh. 7:6) An 400 ka tuig nga pagpakuri matin-aw nga nagtikang han 1913 B.C.E. han gintratar hin maraot ni Ismael hi Isaac han ginlutas hi Isaac, ngan natapos ito han nakagawas an mga Israelita tikang ha Ehipto han 1513 B.C.E. (Gen. 21:8-10; Gal. 4:22-29) Oo, 400 ka tuig antes pa, igintanda na ni Jehova an eksakto nga panahon ha pagtalwas ha iya katawohan!

6. Kay ano nga makakasiguro kita nga tatalwason ni Jehova an iya katawohan?

 ⁶ Hi Josue nga kaupod hadton mga gintalwas tikang ha Ehipto nagpahinumdom ha ngatanan nga Israelita: “Maaram kamo ha ngatanan niyo nga mga kasingkasing ngan ha ngatanan niyo nga mga kalag, nga waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo, waray usa nga butang nga nakawang hini.” (Jos. 23:2, 14) Makakasiguro kita nga tutumanon liwat ni Jehova an iya saad nga tatalwason kita niya tikang ha daku nga kasakitan. Pero kon karuyag naton nga matalwas ha kabungkagan hini nga sistema, kinahanglan naton padayon nga magbantay.

7, 8. (a) Ano an papel han magbarantay ha kadaan nga panahon, ngan ano nga leksyon an aton hibabaroan tikang hito? (b) Paghatag hin ehemplo han posible mahitabo kon mahingaturog an magbarantay.

⁷ May mahibabaroan kita nga leksyon tikang ha kadaan nga panahon may kalabotan ha pagkaimportante han pagin mabinantayon. Hadto, kadam-an han dagku nga syudad​—pariho han Jerusalem—​ginpapalibotan hin higtaas nga pader. Ito nga mga pader nagpapanalipod ha syudad basi diri masulod han mga kaaway ngan ha igbaw hito nakikita han mga magbarantay an mga lugar nga nakapalibot ha syudad. May mga magbarantay nga nakapwesto ha mga pader ngan ganghaan adlaw ngan gab-i. Ginpapahamangnoan nira an mga umurukoy han syudad kon may nakikita hira nga peligro. (Isa. 62:6) Salit importante nga magpabilin nga nagmamata ngan atentibo an mga magbarantay tungod kay kinabuhi an nahidadabi.​—Esek. 33:6.

⁸ An Judio nga historyador nga hi Josephus nagsiring nga han 70 C.E. nasakop han Romano nga kasundalohan an Torre han Antonia, nga sumpay han pader han Jerusalem kay nahingaturog an mga magbarantay han ganghaan! Tungod hito, nakasulod ha templo an kasundalohan ngan ginsunog ito. Ini an kataposan nga bahin han pinakadaku nga kasakitan nga naeksperyensyahan han mga Judio.

9. Ano an diri hinbabaroan han kadam-an nga tawo yana?

⁹ Kadam-an han mga nasud yana an nagbubutang hin “mga magbarantay” pinaagi hin mga sundalo nga nagpapatrolya ha mga giutan han nasud ngan hin moderno nga mga surveillance camera. Ginbubuhat nira ito basi diri makasulod ha ira teritoryo an mga kaaway nga mahimo magin tarhog ha ira nasud. Pero an nakikita la hito nga “mga magbarantay” amo adton peligro nga mahihimo han tawhanon nga gobyerno. Diri hira maaram nga naeksister ngan nagios na an langitnon nga Ginhadian han Dios ilarom ha pagmando han Kristo nga pinaagi hito huhukman an ngatanan nga nasud, ngan hirani na gud ito mahitabo. (Isa. 9:6, 7; 56:10; Dan. 2:44) Ha luyo nga bahin, kon magpapabilin kita nga alerto ngan nagmamata ha espirituwal, magigin andam kita anoman nga adlaw umabot an paghukom.​—Sal. 130:6.

10, 11. (a) Ha ano kita sadang mag-ikmat, ngan kay ano? (b) Kay ano nga natoo ka nga gin-iimpluwensyahan han Yawa an mga tawo nga igbalewaray an mga tagna ha Biblia?

¹⁰ Handurawa an magbarantay nga nag-aagma ha bug-os nga gab-i. Ha ikatarapos han iya pagbantay, inaabat na niya an sobra nga kakapoy ngan kapiraw. Ha pariho nga paagi, samtang mas nagtitikahirani kita ha kataposan hini nga sistema, nagigin mas makuri para ha aton an pagpabilin nga nagmamata. Makasurubo gud kon diri kita padayon nga magbantay! Hisgotan naton an tulo nga butang nga mahimo magpaluya han aton determinasyon nga padayon nga magin alerto ngan mabinantayon.

 ¹¹ Gin-iimpluwensyahan han Yawa an mga tawo basi mawad-an hin interes ha espirituwal. Antes mamatay hi Jesus, tulo ka beses nga ginpahamangnoan niya an iya mga disipulo mahitungod ha “magmarando hini nga kalibotan.” (Juan 12:31; 14:30; 16:11) Maaram hi Jesus nga padayon nga gin-iimpluwensyahan han Yawa an hunahuna han mga tawo basi diri hira umabat hin pagkaapurado nga amo an ginpapabug-atan han mga tagna han Dios ha tidaraon. (Sep. 1:14) Ginbubuta ni Satanas an hunahuna han mga tawo pinaagi han imperyo han buwa nga relihiyon ha kalibotan. Ano an imo naoobserbaran kon nakikiistorya ka ha mga tawo? Diri ba nabubutahan na gud han Yawa an mga hunahuna han mga diri-tumuroo may kalabotan ha kataposan hini nga sistema ngan han kamatuoran nga nagmamando na yana an Kristo ha Ginhadian han Dios? (2 Cor. 4:3-6) Makapira ka na makabati nga may nagsiring, “Diri ako interesado”? Kasagaran na nga an mga tawo nadiri pamati kon ginsusumatan naton hira han mahitatabo hini nga kalibotan.

12. Kay ano nga diri naton sadang tugotan an Yawa nga limbongan kita?

¹² Ayaw tuguti nga an kawaray-interes han mga tawo magpaluya han imo determinasyon nga magpabilin nga nagmamata. Maaram ka nga importante gud ito. Hi Pablo nagsurat ha iya mga igkasi-tumuroo: “Maaram gud kamo nga an adlaw ni Jehova sigurado nga maabot sugad hin kawatan ha gab-i.” (Basaha an 1 Tesalonica 5:1-6.) Ginpahamangnoan kita ni Jesus: “Pag-andam . . . kamo, kay an Anak han tawo maabot ha oras nga diri niyo ginlalaoman.” (Luc. 12:39, 40) Diri na mag-iiha, lilimbongan ni Satanas an mga tawo nga tumoo nga may-ada “kamurayawan ngan kasigurohan” ha kalibotan. Kumusta man kita? Magigin andam kita ha adlaw han paghukom han Dios ngan diri kita malilimbongan pariho ha iba kon ‘padayon kita nga mag-aagma ngan titipigan naton an aton maopay nga panhunahuna.’ Salit importante nga basahon naton an Pulong han Dios kada adlaw ngan pamalandungon an iginsusumat ha aton ni Jehova.

13. Paonan-o an espiritu han kalibotan nakakaapekto ha mga tawo, ngan ano an aton mahihimo basi diri kita maimpluwensyahan hito?

¹³ An espiritu han kalibotan nagpapahinabo nga mahingaturog ha espirituwal an mga tawo. Damu an sagipo hinduro ha ira adlaw-adlaw nga mga buruhaton salit diri na hira “mahunahunaon han ira espirituwal nga panginahanglan.” (Mat. 5:3) Nakapokus na hira ha mga igintatanyag  han kalibotan nga nag-aaghat han ‘hingyap han unod ngan han hingyap han mga mata.’ (1 Juan 2:16) Dugang pa, nagtitikadamu an mga kaliawan nga nagdadani ha mga tawo nga ‘higugmaon an kalipayan,’ ngan mas nagtitikaduro an mga pagsulay. (2 Tim. 3:4) Ini an hinungdan nga ginsidngan ni Pablo an mga Kristiano nga ‘diri magplinano para ha mga hingyap han unod’ kay nagpapahinabo ito nga mahingaturog an usa ha espirituwal.​—Roma 13:11-14.

14. Ano nga pahamangno an aton mababasa ha Lucas 21:34, 35?

¹⁴ Imbes nga magpaimpluwensya ha espiritu han kalibotan, nagpapagiya kita ha espiritu han Dios, nga pinaagi hito ginbubuligan kita nga mas masabtan an mga mahitatabo ha tidaraon. ^[1] (1 Cor. 2:12) Pero kinahanglan kita magbantay kay bisan an simple nga mga butang mahimo magpakaturog ha aton ha espirituwal. (Basaha an Lucas 21:34, 35.) Bangin tamayon kita han iba tungod han aton padayon nga pagbantay, pero diri ito sadang makagwara han aton pag-abat hin pagkaapurado. (2 Ped. 3:3-7) Lugod, kinahanglan regular kita nga makig-upod ha aton mga igkasi-Kristiano ha mga katirok ha kongregasyon basi magiyahan han espiritu han Dios.

15. Ano an nahitabo kanda Pedro, Santiago, ngan Juan, ngan paonan-o ito posible mahitabo ha aton?

¹⁵ An aton pagin diri hingpit mahimo magpaluya han aton determinasyon nga magpabilin nga alerto. Maaram hi Jesus nga may tendensya an diri hingpit nga mga tawo nga madaog han ira mga kaluyahan. Tagda an nahitabo han gab-i antes hi Jesus patayon. Basi makapabilin nga matinumanon, kinahanglan niya mangaro hin bulig ha iya langitnon nga Amay. Ginsidngan niya hira Pedro, Santiago, ngan Juan nga ‘magpadayon ha pagbantay’ samtang nag-aampo hiya. Pero waray nira masabti an pagkaimportante han pagsugot hito. Imbes nga magbantay, nagpadara hira han ira kakapoy ngan nanhingaturog. Kapoy liwat hi Jesus, pero nagpabilin hiya nga nagmamata pinaagi ha pag-ampo ha iya Amay. Ito liwat unta an ginbuhat han iya mga kaupod.​—Mar. 14:32-41.

16. Sumala ha Lucas 21:36, ano an ginsiring ni Jesus nga sadang naton buhaton basi ‘makapadayon nga nagmamata’?

¹⁶ Basi ‘makapadayon nga nagmamata’ ha espirituwal, labaw pa an ginkikinahanglan ha pagkaada maopay nga motibo. Pipira ka adlaw antes an mga panhitabo ha hardin han Getsemani, ginsidngan ni Jesus an amo gihapon nga mga disipulo nga mangamuyo kan Jehova. (Basaha an Lucas 21:36.) Salit basi makapabilin nga alerto ha espirituwal, kinahanglan liwat naton magpabilin nga nagmamata pinaagi ha pag-ampo.​—1 Ped. 4:7, ftn.

17. Paonan-o naton masisiguro nga andam kita ha mahitatabo ha tidaraon?

¹⁷ Tungod kay nagsiring hi Jesus nga an kataposan “maabot ha oras nga diri [naton] ginlalaoman,” kinahanglan diri gud kita kumaturog ha espirituwal ngan mangalimbasog nga magkaada han makaruruyag nga mga butang nga igintatanyag ni Satanas ngan han iya kalibotan, nga ginhihingyap han aton diri hingpit nga unod. (Mat. 24:44) Pinaagi han Biblia, ginsusumatan kita han Dios ngan han Kristo kon ano an mahitatabo ha tidaraon ngan kon paonan-o kita padayon nga magigin mabinantayon. Kinahanglan kita magpokus ha aton espirituwalidad, ha aton relasyon kan Jehova, ngan ha mga buruhaton han Ginhadian. Kinahanglan magin mabinantayon kita ha oras ngan ha mga panhitabo basi magin andam kita ha mahitatabo ha tidaraon. (Pah. 22:20) Kinabuhi naton an nahidadabi!