Fetela kwa tshedimosetsong

Baengele ke Eng Kgotsa ke Bomang?

Baengele ke Eng Kgotsa ke Bomang?

Karabo ya Baebele

Baengele ke dibopiwa tse di maatla thata go gaisa batho. (2 Petere 2:11) Ba nna kwa legodimong kgotsa mo mafelong a semoya a a kgakala thata le lobopo. (1 Dikgosi 8:27; Johane 6:38) Ke gone ka moo ba bidiwang dibopiwa tsa semoya.—1 Dikgosi 22:21; Pesalema 18:10.

Baengele ba tswa kae?

Modimo o ne a dirisa Jesu yo Baebele e mmitsang “leitibolo la popo yotlhe,” go bopa baengele. Baebele e bua jaana fa e tlhalosa kafa Modimo a ileng a dirisa Jesu ka gone: “Dilo tsotlhe tse dingwe di ne tsa bopiwa ka ene kwa magodimong le mo lefatsheng, dilo tse di bonalang le dilo tse di sa bonaleng,” go akaretsa le baengele. (Bakolosa 1:13-17) Baengele ga ba nyale e bile ga ba kgone go tshola bana. (Mareko 12:25) Go na le moo, mongwe le mongwe wa ‘barwa bano ba Modimo wa boammaaruri’ o ile a bopiwa ka tlhamalalo.—Jobe 1:6.

Baengele ba ile ba bopiwa dingwagangwaga pele lefatshe le nna gone. Fa Modimo a bopa lefatshe, baengele ba ne ba ‘simolola go goa ba mmaka.’—Jobe 38:4-7.

Go na le baengele ba ba kae?

Baebele ga e bue sepe ka palo ya bone mme gone e bontsha gore ba bantsi fela thata. Ka sekai, moaposetoloi Johane o ne a bona ponatshegelo e mo go yone a neng a bona baengele ba le dimilione di le makgolokgolo.—Tshenolo 5:11.

A baengele ba na le maina le bokgoni jo bo sa tshwaneng?

Ee. Baebele e na le maina a baengele ba babedi: Mikaele le Gabariele. (Daniele 12:1; Luke 1:26) * Baengele bangwe ba ne ba dumela gore ba na le maina mme ga ba a ka ba a bolelela batho.—Genesise 32:29; Baatlhodi 13:17, 18.

Baengele ba na le bokgoni jo bo sa tshwaneng. Ba kgona go buisana. (1 Bakorintha 13:1) Ba kgona go akanya e bile ba kgona go tlhamela Modimo dipina tsa pako. (Luke 2:13, 14) Ba na le tshwanelo ya go itlhophela go dira se se siameng kgotsa se se sa siamang, jaaka re bona ka ba ba ileng ba ema Satane nokeng fa a ne a tlhanogela Modimo.—Mathaio 25:41; 2 Petere 2:4.

A baengele ba na le maemo a a farologaneng?

Ee. Moengele yo mogolo e bile a na le taolo go ba gaisa botlhe ke Mikaele. (Jude 9; Tshenolo 12:7) Boserafe ke baengele ba maemo a a kwa godimo ba ba nnang gaufi le setulo sa Bogosi sa ga Jehofa. (Isaia 6:2, 6) Ditšheruba le bone ke baengele ba maemo a a kwa godimo ba ba dirang ditiro tse di kgethegileng. Ka sekai, bangwe ba bone ba ile ba disa tshimo ya Edene fa Adame le Efa ba sena go lelekiwa mo go yone.—Genesise 3:23, 24.

A baengele ba kgona go thusa batho?

Ee, Modimo o dirisa baengele ba ba ikanyegang gore ba thuse batho gompieno.

A mongwe le mongwe wa rona o na le moengele yo a mo disitseng?

Le fa baengele ba thusa batlhanka ba Modimo go lwa le Satane, seo ga se reye gore Modimo o abetse Mokeresete mongwe le mongwe moengele yo a tla mo tlhokomelang. * (Mathaio 18:10) Baengele ga ba sireletse batlhanka ba Modimo mo tekong kgotsa mo thaelong epe fela e ba lebanang le yone. Baebele e bontsha gore gantsi Modimo o “dira tsela ya go tswa” fa re lebane le teko ka go naya motho botlhale le maatla a gore a kgone go itshoka.—1 Bakorintha 10:12, 13; Jakobe 1:2-5.

Dikgopolo tse di seng boammaaruri ka baengele

Kgopolo e e phoso: Baengele botlhe ba siame.

Boammaaruri: Baebele e bua ka “mephato ya meya e e boikepo” le “baengele ba ba neng ba leofa.” (Baefeso 6:12; 2 Petere 2:4) Baengele bao ke madimona a a neng a ema Satane nokeng fa a tlhanogela Modimo.

Kgopolo e e phoso: Baengele ga ba swe.

Boammaaruri: Satane le baengele ba ba bosula ba tlile go senngwa.—Jude 6.

Kgopolo e e phoso: Batho ba fetoga baengele fa ba swa.

Boammaaruri: Baengele ba bopilwe ke Modimo, ga se batho ba ba suleng ba bo ba tsosiwa. (Bakolosa 1:16) Batho ba ba swang ba bo ba tsosiwa gore ba ye go tshela kwa legodimong ba newa mpho ya go sa swe ke Modimo. (1 Bakorintha 15:53, 54) Ba na le maemo a a kwa godimo thata go gaisa a baengele.—1 Bakorintha 6:3.

Kgopolo e e phoso: Tiro ya baengele ke go direla batho.

Boammaaruri: Baengele ba ikobela ditaelo tsa Modimo e seng tsa batho. (Pesalema 103:20, 21) Jesu o ne a bolela gore o tla kopa Modimo gore a romele baengele go tla go mo thusa.—Mathaio 26:53.

Kgopolo e e phoso: Re ka kopa thuso mo baengeleng ka thapelo.

Boammaaruri: Re tshwanetse go rapela Jehofa Modimo fela e seng ope o sele. (Tshenolo 19:10) Re tshwanetse go rapela Modimo re dirisa leina la ga Jesu.—Johane 14:6.

^ ser. 10 Dibaebele tse dingwe di dirisa leina “Lusifa” mo go Isaia 14:12, mme batho bangwe ba akanya gore leina leno e ne e le la moengele mongwe yo morago a ileng a bidiwa Satane Diabolo. Le fa go ntse jalo, lefoko leo le kaya “yo o phatsimang” mo Sehebereng sa ntlhantlha. Ditemana tse di dikologileng temana eo ga di bue ka Satane, go na le moo, di bua ka losika lwa segosi la kwa Babelona lo Modimo a neng a tlile go lo tlontlolola ka ntlha ya boikgogomoso. (Isaia 14:4, 13-20) Mafoko a a reng “yo o phatsimang” a ne a dirisiwa go sotla bogosi joo fa bo sena go digiwa.

^ ser. 21 Batho bangwe ba akanya gore pego ya fa Petere a ne a ntshiwa mo kgolegelong e bontsha gore Petere o ne a na le moengele yo a neng a mo tlhokometse. (Ditiro 12:6-16) Le fa go ntse jalo, fa barutwa ba ne ba re “moengele wa ga [Petere]” ba ka tswa ba ne ba akanya gore moengele yoo o ne a tlile mo boemong jwa ga Petere e seng Petere ka boene.