Dikgosi wa Ntlha 8:1-66

  • Letlole le tlisiwa mo tempeleng (1-13)

  • Solomone o bua le batho (14-21)

  • Thapelo ya ga Solomone ya go kgakola tempele (22-53)

  • Solomone o segofatsa batho (54-61)

  • Ditlhabelo le moletlo wa go kgakola tempele (62-66)

8  Ka nako eo, Solomone o ne a phutha+ bagolwane ba Iseraele, ditlhogo tsotlhe tsa ditso, e leng dikgosana tsa Iseraele tsa dikgotla tsa bone.+ Ba ne ba tla kwa go Kgosi Solomone kwa Jerusalema gore ba ntshe letlole la kgolagano ya ga Jehofa kwa Motseng wa ga Dafide,+ e leng Siona.+  Banna botlhe ba Iseraele ba ne ba phuthegela fa pele ga ga Kgosi Solomone kwa moletlong* mo kgweding ya Ethanime,* e leng kgwedi ya bosupa.+  Ka jalo, bagolwane botlhe ba Iseraele ba ne ba tla, mme baperesiti ba ne ba tsaya Letlole.+  Ba ne ba tla le Letlole la ga Jehofa, tente ya bokopanelo+ le dilwana tsotlhe tse di boitshepo tse di neng di le mo tenteng. Baperesiti le Balefi ba ne ba tla le tsone.  Kgosi Solomone le phuthego yotlhe ya Baiseraele ba ba neng ba laetswe go tla go kopana le ene, ba ne ba le fa pele ga Letlole. Ka jalo, go ne ga ntshiwa ditlhabelo+ tsa dinku le dikgomo tse dintsi mo di neng di ka se balwe.  Go tswa foo, baperesiti ba ne ba tlisa letlole la kgolagano ya ga Jehofa mo lefelong la lone,+ mo phaposing e e kwa tengteng ya ntlo, e leng lefelo la Boitshepo Jwa Maitshepo, ka fa tlase ga diphuka tsa ditšheruba.+  Ka jalo, ditšheruba di ne di tsharololetse diphuka tsa tsone mo godimo ga lefelo la Letlole, mo e leng gore ditšheruba di ne tsa khurumetsa Letlole le dikota tsa lone.+  Dikota+ tseo di ne di le ditelele mo e leng gore dintlha tsa dikota tseo di ne di bonala go tswa kwa lefelong la Boitshepo fa pele ga phaposi e e kwa tengteng, le fa go ntse jalo, di ne di sa bonale go tswa kwa ntle. Mme di sa ntse di le koo go fitlha mo letsatsing leno.  Go ne go se na sepe mo Letloleng fa e se dikwalelo tse pedi tsa maje+ tse Moshe a neng a di tsenya mo go lone+ kwa Horeba, ka nako ya fa Jehofa a ne a dira kgolagano+ le batho ba Iseraele fa ba ne ba tswa mo lefatsheng la Egepeto.+ 10  E rile baperesiti ba tswa mo lefelong le le boitshepo, leru+ le ne la tlala mo ntlong ya ga Jehofa.+ 11  Baperesiti ba ne ba sa kgone go ema gore ba dire tiro ya bone ka ntlha ya leru, ka gonne kgalalelo ya ga Jehofa e ne e tletse mo ntlong ya ga Jehofa.+ 12  Ka yone nako eo, Solomone o ne a re: “Jehofa, o ne wa re o tla nna mo lefifing le lentshontsho.+ 13  Ke kgonne go go agela ntlo e ntle thata, lefelo le le tlhomameng gore o nne mo go lone ka bosakhutleng.”+ 14  Go tswa foo, kgosi e ne ya retologa mme ya leba Baiseraele botlhe ba ba neng ba eme foo, mme e ne ya ba segofatsa.+ 15  E ne ya re: “E kete Jehofa, Modimo wa Iseraele a ka bakwa, ene yo o solofeditseng rre e bong Dafide ka molomo wa gagwe le yo o diragaditseng ka seatla sa gagwe, a re, 16  ‘Go tloga mo letsatsing le ke ntshitseng batho ba me ba Iseraele kwa Egepeto ka lone, ga ke a ka ka tlhopha motse ope mo ditsong tsotlhe tsa Iseraele o ke tla agang ntlo mo go one gore leina la me le tswelele le le mo go one,+ le fa go ntse jalo, ke tlhophile Dafide gore a okamele batho ba me ba Iseraele.’ 17  Mme Dafide rre, o ne a eleditse ka pelo yotlhe go agela leina la ga Jehofa, Modimo wa Iseraele ntlo.+ 18  Mme gone, Jehofa o ne a raya rre a re, ‘O ne wa eletsa go agela leina la me ntlo, mme o dirile sentle ka go eletsa seno mo pelong ya gago. 19  Le fa go ntse jalo, ga o kitla o nkagela ntlo, mme morwao yo o tla mo tsholelwang* ke ene yo o tla agelang leina la me ntlo.’+ 20  Jehofa o ne a diragatsa tsholofetso e a e dirileng, ka gonne ke ne ka tlhatlhama rre mme ka nna mo setulong sa bogosi sa Iseraele, fela jaaka Jehofa a solofeditse. Gape ke agetse leina la ga Jehofa, Modimo wa Iseraele ntlo+ 21  mme ke ne ka tlhoma lefelo gone gore go bewe Letlole le le nang le kgolagano+ e Jehofa a neng a e dira le borraaronamogolo, fa a ne a ba ntsha kwa lefatsheng la Egepeto.” 22  Go tswa foo, Solomone o ne a ema fa pele ga sebeso sa ga Jehofa fa pele ga phuthego yotlhe ya Iseraele a bo a otlololela diatla tsa gagwe kwa magodimong,+ 23  mme o ne a re: “Wena Jehofa, Modimo wa Iseraele, ga go na Modimo ope yo o tshwanang le wena+ kwa magodimong kwa godimo kgotsa mo lefatsheng fa tlase, wena yo o bolokang kgolagano le yo o bontshang batlhanka ba gago ba ba tsamayang fa pele ga gago ka pelo yotlhe+ ya bone lorato lo lo sa kgaotseng.+ 24  O diragaditse tsholofetso e o e diretseng motlhanka wa gago, e bong Dafide rre. O ne wa dira tsholofetso ka molomo wa gago, mme mo letsatsing leno o e diragaditse ka seatla sa gago.+ 25  Mme jaanong, wena Jehofa, Modimo wa Iseraele, diragatsa tsholofetso e o neng wa e direla Dafide motlhanka wa gago e bong rre fa o ne o re: ‘Ka metlha go tla nna go na le monna wa losika lwa gago mo setulong sa bogosi sa Iseraele, fa fela bomorwao ba ka ela tlhoko tsela ya bone mme ba tsamaya mo ditseleng tsa me, fela jaaka o tsamaile fa pele ga me.’+ 26  Mme jaanong tlhe Modimo wa Iseraele, tsweetswee, diragatsa tsholofetso e o e diretseng Dafide motlhanka wa gago e bong rre. 27  “A mme gone Modimo o tla nna mo lefatsheng?+ Magodimo, tota legodimo la magodimo, le ka se go tshole;+ mme ruri ntlo eno e ke e agileng e nnye tota go ka go tshola!+ 28  Jaanong tlhe Jehofa, Modimo wa me, reetsa thapelo ya me le kopo ya me ya gore o nkamogele, mme o reetse selelo sa me sa go kopa thuso le thapelo e ke e rapelang fa pele ga gago gompieno. 29  E kete matlho a gago a ka leba mo ntlong eno bosigo le motshegare, mo lefelong le o neng wa bua ka lone wa re, ‘Leina la me le tla nna gone,’+ gore o reetse thapelo e ke e rapelang ke lebile mo lefelong leno.+ 30  Mme o reetse dikopo tsa me nna motlhanka wa gago tsa gore o nkamogele le kopo e e dirwang ke batho ba gago ba Iseraele fa ba rapela ba lebile mo lefelong leno, mme e kete o ka utlwa o le kwa lefelong le o nnang kwa go lone kwa magodimong;+ e kete o ka utlwa o bo o re itshwarela.+ 31  “Fa mongwe a leofela motho yo mongwe mme a laelwa gore a dire maikano* a bo a patelesega go diragatsa maikano* ao, mme fa a tla fa pele ga sebeso sa gago mo ntlong eno ka nako ya fa a sa ntse a le mo maikanong* ao,+ 32  foo e kete o ka utlwa o le kwa magodimong mme o dire sengwe o bo o atlhola batlhanka ba gago ka go bolela gore yo o bosula o molato,* o bo o mo otlhaela se a se dirileng, le ka go bolela gore yo o siameng ga a na molato* o bo o mo duela go ya ka tshiamo ya gagwe.+ 33  “Fa batho ba gago ba Iseraele ba fenngwa ke mmaba ka gonne ba ne ba ntse ba go leofela,+ mme ba boela kwa go wena, ba galaletsa leina la gago,+ ba rapela ba bo ba kopa gore o ba amogele mo ntlong eno,+ 34  foo e kete o ka utlwa o le kwa magodimong mme o itshwarele boleo jwa batho ba gago ba Iseraele mme o ba busetse mo lefatsheng le o neng wa le naya borraabonemogolo.+ 35  “Fa magodimo a tswetswe mme go se na pula epe+ ka gonne ba ne ba nna ba go leofela,+ mme ba rapela mo lefelong leno, ba galaletsa leina la gago ba bo ba boa mo boleong jwa bone ka gonne o ba kokobeditse,*+ 36  foo e kete o ka utlwa o le kwa magodimong mme wa itshwarela boleo jwa batlhanka ba gago, jwa batho ba gago ba Iseraele, ka gonne o tla ba ruta+ tsela e e molemo e ba tshwanetseng go tsamaya mo go yone; mme o nese pula mo lefatsheng+ la gago le o le neileng batho ba gago gore e nne boswa jwa bone. 37  “Fa go ka nna le leuba mo lefatsheng+ kgotsa bolwetse jwa leroborobo, mogote o o babolang, mouta,+ lesogodi la tsie kgotsa tsie e e senyang;* kgotsa fa mmaba wa bone a ba tlhasela mo motseng ope fela wa lefatshe leo* kgotsa fa go nna le mofuta ope fela wa petso kgotsa bolwetse,+ 38  thapelo epe fela, kopo epe fela ya go bona kamogelo+ e e ka nnang ya dirwa ke motho ope kgotsa ke batho botlhe ba gago ba Iseraele (ka gonne mongwe le mongwe o itse petso ya pelo ya gagwe)+ fa ba otlololela diatla tsa bone ntlheng ya ntlo eno, 39  foo e kete o ka utlwa o le kwa magodimong, e leng lefelo le o nnang kwa go lone,+ mme e kete o ka ba itshwarela+ o bo o ba thusa; mme o duele mongwe le mongwe go ya ka ditsela tsotlhe tsa gagwe,+ ka gonne o itse pelo ya gagwe (wena o le esi o itse pelo ya motho mongwe le mongwe ka botlalo),+ 40  gore ba go boife malatsi otlhe fa ba ntse ba tshela mo lefatsheng le o le neileng borraaronamogolo. 41  “Gape, fa motswakwa yo e seng mongwe wa batho ba gago ba Iseraele e bile a tswa kwa lefatsheng le le kgakala ka ntlha ya leina la gago*+ 42  (ka gonne ba tla utlwela ka leina la gago le legolo+ le ka seatla sa gago se se nonofileng le ka letsogo la gago le le otlolotsweng), mme a tla a bo a rapela a lebile mo ntlong eno, 43  foo e kete o ka reetsa o le kwa magodimong, e leng lefelo le o nnang kwa go lone,+ mme o dire sotlhe se motswakwa a se kopang mo go wena, gore ditšhaba tsotlhe tsa lefatshe di tle di itse leina la gago mme di go boife+ fela jaaka batho ba gago ba Iseraele ba dira, le gore ba tle ba itse gore leina la gago le bidiwa mo ntlong eno e ke e agileng. 44  “Fa batho ba gago ba ya go lwa le mmaba wa bone ka tsela e o ba romang ka yone,+ mme ba rapela+ Jehofa ba lebile ntlheng ya motse ono o o o tlhophileng+ le ntlheng ya ntlo eno e ke e agetseng leina la gago,+ 45  foo o utlwe thapelo ya bone o le kwa magodimong le kopo ya bone ya gore o ba amogele mme o ba lwele. 46  “Fa ba go leofela (ka gonne ga go na motho ope yo o sa leofeng),+ mme o ba galefela thata o bo o ba tsenya mo seatleng sa mmaba yo o tla ba isang botshwarwa kwa lefatsheng la gagwe, le le kgakala kgotsa le le gaufi;+ 47  mme fa ba itharabologelwa ba le kwa lefatsheng le ba neng ba isitswe botshwarwa kwa go lone,+ ba bo ba boela kwa go wena+ mme ba kopa gore o ba amogele ba le kwa lefatsheng la batho ba ba neng ba ba isitse botshwarwa+ ba re, ‘Re leofile e bile re dirile phoso; re dirile bosula,’+ 48  mme fa ba boela kwa go wena ka pelo ya bone+ yotlhe le ka moya wa bone otlhe ba le kwa lefatsheng la baba ba bone ba ba neng ba ba isitse botshwarwa, mme ba go rapela ba lebile ntlheng ya lefatshe la bone le o neng wa le naya borraabonemogolo le kwa motseng o o o tlhophileng le kwa ntlong e ke e agetseng leina la gago,+ 49  foo o ntse o le kwa magodimong, e leng lefelo le o nnang kwa go lone,+ o utlwe thapelo ya bone le kopo ya bone ya gore o ba amogele mme o ba thuse, 50  mme o itshwarele batho ba gago ba ba go leofetseng, o itshwarele melato yotlhe e ba go e diretseng. O tla dira gore e nne batho ba ba tlhomogelwang pelo fa pele ga batho ba ba ba isitseng botshwarwa mme ba tla ba tlhomogela pelo+ 51  (ka gonne ke batho ba gago le boswa jwa gago,+ ba o ba ntshitseng kwa Egepeto,+ mo molelong o mogolo o o nyerolosang tshipi).+ 52  E kete ditsebe tsa gago di ka reetsa kopo ya motlhanka wa gago ya gore o mo amogele+ le kopo ya batho ba gago ba Iseraele ya gore o ba amogele, ka go ba reetsa nako nngwe le nngwe fa ba go bitsa.*+ 53  Gonne o ba tlhaotse mo ditšhabeng tsotlhe tsa lefatshe+ gore e nne boswa jwa gago, fela jaaka o buile ka Moshe motlhanka wa gago fa o ne o ntsha borraaronamogolo kwa Egepeto, wena Morena Molaodimogolo Jehofa.” 54  Mme fela fa Solomone a fetsa go rapela thapelo eno yotlhe le go isa kopo ya go amogelwa kwa go Jehofa, o ne a ema a tswa fa pele ga sebeso sa ga Jehofa fa a neng a ntse a khubame gone a otlololetse diatla kwa magodimong.+ 55  Go tswa foo, o ne a ema mme a segofatsa phuthego yotlhe ya Iseraele ka lentswe le le kwa godimo, a re: 56  “A go bakwe Jehofa, yo o neileng batho ba gagwe ba Iseraele lefelo la boikhutso, fela jaaka a solofeditse.+ Ga go na lefoko lepe la tsholofetso yotlhe ya gagwe e e molemo e a neng a e dira ka Moshe motlhanka wa gagwe le le sa diragalang.+ 57  E kete Jehofa, Modimo wa rona a ka nna le rona fela jaaka a ne a na le borraaronamogolo.+ E kete a ka se re latlhe le fa e le go re tlogela.+ 58  E kete a ka gogela dipelo tsa rona kwa go ene,+ gore re tsamaye mo ditseleng tsotlhe tsa gagwe le go boloka ditaelo tsa gagwe, melao ya gagwe le dikatlholo tsa gagwe, tse a neng a laela borraaronamogolo gore ba di ikobele. 59  Mme e kete mafoko ano a me a ke a buileng ke kopa Jehofa gore a re amogele, Jehofa, Modimo wa rona a ka a gopola bosigo le motshegare, gore a tle a atlholele motlhanka wa gagwe le batho ba gagwe ba Iseraele jaaka go tlhokega letsatsi le letsatsi, 60  gore ditšhaba tsotlhe tsa lefatshe di tle di itse gore Jehofa ke Modimo wa boammaaruri.+ Ga go na ope yo mongwe!+ 61  Ka jalo, lo direle Jehofa, Modimo wa rona ka pelo yotlhe+ ka go tsamaya mo melaong ya gagwe le ka go boloka ditaelo tsa gagwe jaaka mo letsatsing leno.” 62  Morago ga moo, kgosi le Baiseraele botlhe ba ne ba ntsha setlhabelo se segolo fa pele ga ga Jehofa.+ 63  Solomone o ne a ntshetsa Jehofa ditlhabelo tseno tsa go abelana:+ O ne a ntsha dikgomo di le 22 000 le dinku di le 120 000. Ka jalo, kgosi le Baiseraele botlhe ba ne ba kgakola ntlo ya ga Jehofa.+ 64  Mo letsatsing leo, kgosi e ne ya tshwanelwa ke go dira gore karolo e e fa gare ya lolwapa lo lo fa pele ga ntlo ya ga Jehofa e nne boitshepo, ka gonne ke gone kwa a neng a tshwanetse go ntshetsa ditlhabelo tse di fisiwang, ditlhabelo tsa dijo tsa ditlhaka le mafura a ditlhabelo tsa go abelana gone, ka ntlha ya gore sebeso+ sa kopore se se fa pele ga ga Jehofa se ne se le sennye thata go ka tshola ditlhabelo tse di fisiwang, ditlhabelo tsa dijo tsa ditlhaka le mafura+ a ditlhabelo tsa go abelana. 65  Ka nako eo, Solomone o ne a dira moletlo+ a na le Iseraele yotlhe, phuthego e kgolo go simolola kwa Lebo-hamathe* go ya go fitlha kwa Molapong wa Egepeto,+ fa pele ga ga Jehofa, Modimo wa rona ka malatsi a le 7 le ka malatsi a mangwe a le 7, palo ya malatsi a le 14. 66  Mo letsatsing le le latelang,* o ne a naya batho tsela, mme ba ne ba eleletsa kgosi masego ba bo ba ya kwa magaeng a bone ba itumetse e bile dipelo tsa bone di phophoma ka boitumelo ka ntlha ya molemo+ otlhe o Jehofa a neng a o bontshitse motlhanka wa gagwe e bong Dafide le batho ba gagwe ba Iseraele.

Dintlha Tse di Kwa Tlase

Go tewa Moletlo wa Diobo.
Seheb., “morwao, yo o tswang mo dinôkeng tsa gago.”
Kgotsa “mme motho yo o leofetsweng a mo hutsa.” Go tewa maikano a kotlhao ya one e leng phutso fa a ikanne ka maaka kgotsa a sa a diragatsa.
Seheb., “phutso.”
Seheb., “phutso.”
Seheb., “bosula.”
Seheb., “o siame.”
Kgotsa “bogisitse.”
Kgotsa “ditsiakgope.”
Seheb., “mo lefatsheng la dikgoro tsa gagwe.”
Kgotsa “tsela e o itsegeng ka yone.”
Kgotsa “ka go ba reetsa fa ba go kopa sepe fela.”
Kgotsa “kwa kgorong ya Hamathe.”
Seheb., “la borobedi,” go tewa letsatsi le le tlang morago ga malatsi a le supa a bofelo.