Baefeso 6:1-24

  • Kgakololo e e newang bana le batsadi (1-4)

  • Kgakololo e e newang batlhanka le beng (5-9)

  • Diaparo tse di feletseng tsa ntwa tse di tswang kwa Modimong (10-20)

  • Ditumediso tsa bofelo (21-24)

6  Bana, utlwang batsadi ba lona+ go dumalana le thato ya Morena,* ka gonne seno se siame.  Taelo ya ntlha e e nang le tsholofetso ya re, “Tlotla rrago le mmago+  gore dilo di go tsamaele sentle* le gore o tle o tshele lobaka lo loleele mo lefatsheng.”  Lona borre, lo se ka lwa tshwenya bana ba lona,+ mme tswelelang lo ba godisa ka go ba otlhaya le go ba kaela*+ ka tsela e Jehofa* a batlang ka yone.+  Batlhanka, utlwang beng ba lona ba ba mo lefatsheng,+ lo ba tlotle e bile lo ba boife, mme lo ba ikobele ka dipelo tsotlhe jaaka lo ikobela Keresete,  e seng fela fa lo lebilwe ke batho gore lo ba kgatlhe,*+ mme lo dire jalo ka gonne lo le batlhanka ba ga Keresete, lo dira thato ya Modimo ka pelo yotlhe le ka maatla otlhe.+  Direlang beng ba lona ka go rata jaaka e kete lo direla Jehofa*+ e seng batho,  gonne lo a itse gore sengwe le sengwe se se molemo se lo se dirang, e ka tswa lo le batlhanka kgotsa lo se batlhanka, Jehofa* o tla lo duela ka ntlha ya sone.+  Mme lona beng, tswelelang lo tshwara batlhanka ka tsela e e tshwanang, lo sa ba tshosetse, ka gonne lo a itse gore Mong wa bone le wa lona o kwa magodimong,+ mme o tsaya batho ka go lekana. 10  La bofelo, e kete Morena a ka lo naya maatla+ a dirisa nonofo ya gagwe e kgolo. 11  Aparang diaparo tsa ntwa tse di feletseng+ tse di tswang kwa Modimong gore lo tle lo kgone go ema lo tiile. Fa lo dira jalo lo tla kgona go emelana le maano* a a boferefere a ga Diabolo; 12  ka gonne ga re lwe+ le batho, mme re lwa le dipuso, le balaodi, le babusi ba lefatshe leno le le mo lefifing, le meya e e bosula+ e e kwa magodimong. 13  Ka ntlha ya seno, aparang diaparo tsa ntwa tse di feletseng tse di tswang kwa Modimong,+ gore lo tle lo kgone go itsetsepela fa mmaba a lo tlhasela,* le gore fa lo sena go dira sengwe le sengwe, lo eme lo tiile. 14  Ka jalo, emang lo tiile, lo ipofile ka lebanta la boammaaruri mo lothekeng,+ mme lo apere seiphemelo sa sehuba sa tshiamo,+ 15  le dinao tsa lona di ikemiseditse go ya go rera dikgang tse di molemo tsa kagiso.+ 16  Kwantle ga dilo tseno tsotlhe, tsayang thebe e kgolo ya tumelo,+ e lo tla e dirisang go tima metswi* yotlhe e e fisang e e konopiwang ke Satane.*+ 17  Gape, rwalang tlhoro ya phemelo ya poloko,+ lo bo lo tsaya tšhaka ya moya, e leng lefoko la Modimo,+ 18  mme lo tswelele lo rapela ka lobaka longwe le longwe+ lo tlhotlhelediwa ke moya o o boitshepo, lo rapela dithapelo tsa mefuta e e farologaneng e bile lo rapela ka tlhoafalo.*+ Mme gore lo dire jalo, nnang lo tsogile e bile ka metlha lo rapelela botlhe ba ba boitshepo ka tlhoafalo. 19  Le nna lo nthapelele, gore fa ke bua ke newe mafoko a a tshwanetseng, gore ke tle ke kgone go bua ka bopelokgale fa ke itsise sephiri se se boitshepo sa dikgang tse di molemo,+ 20  tse ke leng moemedi wa tsone+ ke bofilwe ka dikeetane, le gore ke tle ke bue ka tsone ka bopelokgale jaaka ke tshwanetse go bua. 21  Jaanong Tikiko,+ mokaulengwe yo o rategang e bile e le modiredi yo o ikanyegang mo Moreneng, o tla lo bolelela sengwe le sengwe ka nna le gore ke tsoga jang.+ 22  Ke mo romela kwa go lona ka jone boikaelelo jono, gore lo tle lo itse gore re tsoga jang le gore a lo gomotse. 23  E kete bakaulengwe ba ka nna le kagiso le lorato mmogo le tumelo e e tswang kwa Modimong Rara le Morena wa rona Jesu Keresete. 24  E kete bopelonomi jo bogolo* bo ka nna le botlhe ba ba ratang Morena wa rona Jesu Keresete ka lorato lo lo sa feleng.

Dintlha Tse di Kwa Tlase

Kgotsa “mo Moreneng.”
Kgotsa “gore o tle o atlege.”
Seger., “lo tlhoma mogopolo mo.”
Seger., “e seng ka go direla fa lo lebilwe jaaka bakgatlhi ba batho.”
Seger., “ditiro.”
Seger., “mo letsatsing le le bosula.”
Kgotsa “dimmisaele.”
Seger., “yo o boikepo.” Bona Ditlhaloso Tsa Mafoko.
Kgotsa “lo dira mekokotlelo.”