Lekwalo la ga Jude 1:1-25

  • Ditumediso (1, 2)

  • Barutisi ba maaka ba tla atlholwa (3-16)

    • Mikaele o ngangisana le Diabolo (9)

    • Boporofeti jwa ga Enoke (14, 15)

  • Tswelelang lo le batho ba Modimo a ba ratang (17-23)

  • Galaletsang Modimo (24, 25)

 Nna Jude, motlhanka wa ga Jesu Keresete e bile ke le morwarraagwe Jakobe,+ ke kwalela ba ba biditsweng+ ba Modimo Rara a ba ratang e bile ba boloketswe Jesu Keresete:+  E kete lo ka okelediwa kutlwelobotlhoko le kagiso le lorato.  Baratwa, le fa ke ne ke dira bojotlhe go lo kwalela ka poloko e e re tswelang mosola rotlhe,+ ke bone go tlhokega gore ke lo kwalele ke lo kgothaletse gore lo lwe ka thata gore lo sireletse tumelo ya lona+ e e neng ya newa ba ba boitshepo gangwe fela.  Lebaka la me ke gore batho bangwe ba kukunetse mo gare ga lona, ba Dikwalo di sa bolong go bua gore ba tla atlholwa. Batho bano ga ba boife Modimo, ba fetola bopelonomi jwa Modimo wa rona go nna seipato sa go dira boitshwaro jo bo repileng jwa go sa kgathale*+ e bile ba itatola mong wa rona yo o esi fela, yo gape e leng Morena wa rona, Jesu Keresete.+  Le fa gone lo itse dilo tseno tsotlhe ka botlalo, ke batla go lo gopotsa gore le fa Jehofa* a ile a boloka batho ka go ba ntsha kwa lefatsheng la Egepeto,+ morago o ne a fedisa ba ba se nang tumelo.+  Mme le baengele ba ba ileng ba tlogela kabelo ya bone ya kwa tshimologong ba bo ba tlogela lefelo le ba tshwanetseng go nna kwa go lone,+ o ba golegile ka bosakhutleng mo lefifing le lentshontsho gore ba letele katlholo ya letsatsi le legolo.+  Ka tsela e e tshwanang, batho ba Sodoma le Gomora le metse e e e dikologileng, le bone ba ne ba dira boitsholo jo bo sa siamang jwa tlhakanelodikobo* ba bo ba diragatsa dikeletso tse di sa siamang tse e seng tsa tlholego.+ Metse eo e ne ya atlholwa ka go fedisiwa ka molelo, ka jalo ke sekao se se re tlhagisang.+  Le fa go ntse jalo, batho bano le bone ba nna ba akantse ka dilo tse di bosula, ba leswafatsa mebele ya bone le ya ba bangwe ka boitsholo jo bo sa siamang jwa tlhakanelodikobo, ba nyatsa bolaodi e bile ba kgoba ba Modimo a ba tlotlang.+  Mme e rile Mikaele+ moengele yo mogolo+ a ganetsana le Diabolo e bile a ngangisana le ene ka setopo sa ga Moshe,+ ga a ka a leka go mo atlhola ka mafoko a a kgobang,+ mme o ne a re: “A Jehofa* a go kgalemele.”+ 10  Batho bano bone ba kgala dilo tsotlhe tse tota ba sa di tlhaloganyeng.+ Mme dilo tsotlhe tse ka tlholego ba di tlhaloganyang, fela jaaka diphologolo tse di sa akanyeng,+ ke tsone dilo tse ba di dirang, tse di ba senyang. 11  Ruri go latlhega bone, ka gonne ba latetse tsela ya ga Kaine+ e bile ba itatlhetse mo tseleng e e sa siamang ya ga Balaame+ gore ba bone tuelo. Mme ba ne ba fedisiwa ka gonne ba ne ba bua dilo tse di sa siamang ka ba ba nang le taolo,+ fela jaaka Kora+ a ile a dira. 12  Banna bano ba nna ba ja le lona kwa meketeng e lo e dirang go bontsha bakaulengwe gore lo a ba rata.+ Le fa go ntse jalo, ba tshwana le mafika a a fitlhegileng kwa tlase ga metsi, ke badisa ba ba nnang ba akantse ka dimpa tsa bone fela;+ ke maru a a se nang metsi a a phailelwang kwa le kwa ke diphefo;+ ke ditlhare tse di se nang maungo mo bofelong jwa letlhabula, tse di omeletseng* e bile di kumotswe; 13  ke makhubu a lewatle a a galefileng a a kgwang lefulo la dilo tse di maswe tse di tshwanetseng go ba tlhabisa ditlhong;+ ke dinaledi tse di se nang tsela e e tlhomameng, tse di emetseng go latlhelwa mo lefifing le lentshontsho ka bosakhutleng.+ 14  Tota le motho wa bosupa go tswa kwa go Adame, e bong Enoke,+ le ene o ne a porofeta ka bone fa a ne a re: “Jehofa* o ne a tla le baengele ba gagwe ba ba boitshepo ba le bantsintsi*+ 15  go tla go atlhola botlhe,+ le go supa gore badirabosula botlhe ba molato ka ntlha ya ditiro tsotlhe tsa bone tse di bosula, tse ba di dirileng ka go sa boife Modimo, le ka ntlha ya dilo tsotlhe tse di tshosang tse baleofi ba ba dirang bosula ba di buileng ka ene.”+ 16  Batho bano ke bangongoregi,+ ba ba sa kgotsofaleleng se ba nang le sone mo botshelong, ba ba diragatsang dikeletso tsa bone tse di sa siamang+ e bile ba ikgogomosa ka tsela e e feteletseng, fa ba ntse ba galaletsa batho ba bangwe gore ba iponele molemo.+ 17  Mme lona baratwa, gakologelwang mafoko a pelenyana a neng a buiwa* ke baaposetoloi ba Morena wa rona Jesu Keresete, 18  fa ba ne ba tle ba lo reye ba re: “Mo motlheng wa bofelo go tla nna le basotli, ba ba diragatsang dikeletso tsa bone tse di sa siamang.”+ 19  Bano ke bone ba ba bakang dikgaogano,+ ba ba itshwarang jaaka diphologolo,* ba ba sa ikobeleng Modimo.* 20  Mme lona baratwa, nonotshang tumelo ya lona e e boitshepo thata lo bo lo rapele lo thusiwa ke moya o o boitshepo,+ 21  gore lo tswelele lo le batho ba Modimo a ba ratang,+ fa lo ntse lo letetse kutlwelobotlhoko ya Morena wa rona Jesu Keresete lo solofetse botshelo jo bo sa khutleng.+ 22  Gape tswelelang lo utlwela+ ba ba nang le dipelaelo botlhoko;+ 23  ba bolokeng+ ka go ba goga lo ba ntsha mo molelong. Mme nnang lo utlwele ba bangwe botlhoko, lo dira jalo ka poifo, lo ntse lo tlhoile boitshwaro jo bo leswafaditsweng ke boleo.*+ 24  Jaanong Modimo o kgona go lo disa gore lo se ka lwa kgopiwa e bile o kgona go dira gore lo eme lo se na molato+ mo lefelong la gagwe le le galalelang* ka boitumelo jo bogolo. 25  Ke ene fela Modimo wa rona le Mmoloki wa rona ka Jesu Keresete Morena wa rona, mme o tshwanelwa ke kgalalelo, tlotlomalo, maatla le taolo go tswa metlheng ya bogologolo e e se nang tshimologo le gone jaanong le ka bosakhutleng. Amen.

Dintlha Tse di Kwa Tlase

Kgotsa “boitshwaro jo bo tlhabisang ditlhong.” Ka Segerika, a·sel′gei·a. Bona Ditlhaloso Tsa Mafoko.
Seger., “tse di suleng gabedi.”
Kgotsa “diketekete di le masome.”
Kgotsa “dilo tse di neng tsa bolelelwa pele.”
Kgotsa “batho ba ba laolwang ke dikeletso tsa bone.”
Seger., “ba ba se nang moya.”
Seger., “lo ntse lo tlhoile seaparo se se leswafaditsweng ke nama.”
Seger., “mo kgalalelong ya gagwe.”