Proverbios 6:1-35
6 A̱ʼdióʼ, á mu niraxná ajngáaʼ rí matani̱i̱ gidxawúu i̱mba̱a̱,+ga̱jma̱a̱ á mu nimbánaaʼ ga̱jma̱a̱ʼ mbáa bi̱ tsétatsiniiʼ,+
2 á mu dí nitaxúdaminaʼ matani̱, ga̱jma̱a̱ ajngáa dí niratá na̱jkha̱núnanindxu̱u̱ xóo mbá tsáʼkhá náa ikháán,+
3 a̱ʼdióʼ, xígi̱ kaʼnii gátani̱ mu matani̱ kríyamínáʼ,numuu dí xúgi̱ xa̱bu̱ buʼko̱ eʼtáñajuaanʼ:
Ayuʼ, ataxruígúminaʼ ga̱jma̱a̱ aratakáñíí dí magáwíinʼ a̱jkiu̱u̱n kaʼyaaʼ.+
4 Xánuʼ ni má xátruguáá idaaʼá mu xóó tsítanimbáníí rígi̱.
5 Atani̱ kríyamínáʼ xóo eʼni aña̱ʼ* náa ñawúunʼ xa̱bu̱ bi̱ naguguiin xujkhúʼ,ga̱jma̱a̱ xóo eʼni kríyamínáʼ mbáa ñu̱ʼu̱ náa ñawúunʼ bi̱ naguguiin ñu̱ʼu̱.
6 Ikháán i̱ʼska,+ ataxuʼmaminaʼ náa ajkuáan,atayáá xóo eʼni ga̱jma̱a̱ gajmañaaʼ.
7 Maski ajndu na̱nguá gíʼdaa bi̱ naxiéjuunʼ, bi̱ kayá edxu̱u̱ náa ikhaa ga̱jma̱a̱ bi̱ naʼtáñajuunʼ,
8 nagímbóó ganitsu índo̱ naʼni ruʼphu+ga̱jma̱a̱ nagujxi̱i̱ ganitsu índo̱ naxtagijxi̱i̱ rí nijuiʼdu.
9 Ikháán i̱ʼska, lá mata̱ba̱a̱ʼ má xúʼko̱ ráʼ.
Nguáná gárajxu̱u̱n rá.
10 Dí mi̱nuʼ mbá xngaa, dí mata̱ba̱a̱ʼ mbá xngaa,ga̱jma̱a̱ dí jchá ráʼaminaʼ mu mbi̱ya̱a̱ jxa̱a̱ʼ mbá xngaa...,+
11 ikhú nda̱a̱ tsu̱ma̱ gáʼkha̱nú dí maʼni maguanáaʼ ngínáá xóo gáʼkha̱nú mbáa kuʼwáʼ,ga̱jma̱a̱ xóo mbáa xa̱bu̱ bi̱ kayá ajua̱nʼ maʼga̱ kagu̱u̱ mitsínguánʼ mbá xúgíʼ dí xtaʼdáá.+
12 Mbáa xa̱bu̱ bi̱ nda̱a̱ rí ejmaa ga̱jma̱a̱ ra̱májáanʼ jngruigo̱o̱ gi̱i̱ ñuʼún raʼni nduwaʼ,+
13 narugoo mbá iduu,+ naʼni seña ga̱jma̱a̱ rajkhúu ma̱ngaa naʼni ñawúunʼ.
14 Xkawiʼ a̱jkiu̱u̱n, naríyaʼ má xúʼko̱ awan maʼni dí ra̱májánʼ+ga̱jma̱a̱ naʼni rí eʼwíinʼ magi̱ʼdu̱u̱n.+
15 Ikha jngóo nda̱a̱ tsu̱ma̱ gáʼkha̱ dí maʼni mamínuuʼ,nda̱a̱ tsu̱ma̱ gáguma gámbáa, nándáa rí maʼni.+
16 Rígá mbá majun dí Jeobá tsíyoo gáʼyoo,xúʼko̱, rígá mbá juwan dí ikhaa nawi̱yu̱u̱ʼ kaʼyoo:
17 Dí nuni̱ mbaʼumíjna̱,+ dí nuni̱ nduwaʼ,+ dí nuradíin xa̱bu̱ bi̱ nda̱a̱ aʼkhúún,+
18 dí nurawíi awan náa a̱jkiu̱ún muni̱ dí raʼkhí,+ dí nagún ragáñúún mu muni̱ dí ra̱májánʼ,
19 dí mbáa testigo minduwaaʼ mámbá índo̱ narmbáʼtoo rawuunʼ naʼni nduwaʼ,+ga̱jma̱a̱ rí nuni̱ rí magi̱ʼdu̱u̱n a̱ngiu̱ún.+
20 A̱ʼdióʼ, atatsimbaaʼ kiʼtáñajunʼ ndrígóo ana̱a̱ʼ*ga̱jma̱a̱ xátani̱ gaʼduunʼ rí naʼsngáaʼ* ru̱dáaʼ.*+
21 Gagiwa̱nʼ má xúʼko̱ náa a̱jkia̱a̱nʼ,atajngrígú náa aphaaʼ.
22 Índo̱ gájngrui̱ga̱a̱ʼ, muxnaaʼ ikha,índo̱ gátaba̱a̱ʼ, mujngawíín,ga̱jma̱a̱ índo̱ gárajxu̱u̱nʼ, muthaanʼ.*
23 Numuu dí kiʼtáñajunʼ nindxu̱u̱ xóo mbá lámpara+ga̱jma̱a̱ xtángoo nindxu̱u̱ xóo mbá aguʼ,+ga̱jma̱a̱ dí muxpriguáaʼ nindxu̱u̱ kamba̱a̱ dí maʼga kañáán maraxtaa.+
24 Muñewa̱a̱nʼ náa a̱ʼgu̱ ra̱májáanʼ,+muñewa̱a̱nʼ náa a̱ʼgu̱ bi̱ nabóoʼ gajmíi̱n eʼwíinʼ.*+
25 Xánigua̱a̱ʼ gáʼni rí mitsiʼyáa+ni má xátaniʼñáminaʼ maʼni rájáánʼ xóo eʼni iduu,
26 numuu rí mbáa a̱ʼgu̱ bi̱ nagujuamínáʼ, maʼni rí mbáa xa̱bu̱ maguanúu ngínáa wéñuuʼ dí kááʼ maʼngo̱o̱ ma̱ʼtsi̱ mbá xuíʼtóo pan mi̱khu̱,+mú a̱ʼgu̱ bi̱ nakudaminaʼ aʼkhá gajmíi̱n eʼwíinʼ* maʼni dí matanimbátíga̱ vida ndrígáaʼ.
27 Lá ma̱ndoo dí mbáa xa̱bu̱ magruaʼmáʼ chámbuʼ náa tsoxto̱o̱ dí asndu xákha xtíñuu ráʼ.+
28 O lá ma̱ndoo dí mbáa xa̱bu̱ majngruámuuʼ náa tsu̱du̱u̱ chámbuʼ dí asndu xákha rajkhúu ráʼ.
29 Xúʼko̱ má kayuuʼ egíʼnuu asndu tsáá bi̱ nabóoʼ ga̱jma̱a̱ a̱ʼgiu̱u̱ xa̱bu̱ numbaaʼ ga̱jma̱a̱:Mamínuuʼ má tsiaki̱i̱ asndu tsáá bi̱ gáguguaa.+
30 Xa̱bu̱ xuajin tséwiñu̱u̱nʼ má kuyáá kuʼwáʼ,á mu naʼni kúwáʼ numuu dí naxkidxu̱u̱.
31 Mú, índo̱ gúxkamaa, mbaʼyóoʼ dí martanga̱a̱ mbá juwan nuthu itháan,maxnájxi̱ xúgíʼ dí gíʼdoo numuu dí rígá náa goʼwóo.+
32 Nda̱a̱ a̱jkiu̱u̱n xa̱bu̱ bi̱ nabóoʼ ga̱jma̱a̱ i̱mba̱a̱ a̱ʼgu̱ bi̱ raʼkháa a̱ʼgiu̱u̱,bi̱ naʼni xígi̱ kaʼnii ikha̱á má eyáʼ dí mamínuuʼ.+
33 I̱ndó maʼni gawúminaʼ ga̱jma̱a̱ magajnúu gamajkuu,+ma̱ngaa maguma májti̱i̱ʼ má xúʼko̱.+
34 Ga̱jma̱a̱ numuu rí naxíyúu ajmbio̱o̱* a̱ʼgu̱, rúʼko̱ gáʼni dí makásngañu̱u̱ʼ,xágáwíinʼ a̱jkiu̱u̱n kaʼyoo índo̱ gáyáaʼ mu maʼni dí mamínuuʼ.+
35 Ikhaa xágruigú mbújkha̱a̱,tséʼniuu má nguáthá gíʼdoo numuu regalo dí gáxnúu, ikhaa makásngañu̱u̱ʼ má xúʼko̱.
