Proverbios 10:1-32
10 Proverbios dí niʼthí Salomón.+
Ada̱ bi̱ najmañuu naʼni rí maʼdxuu anu̱u̱,*+mú ada̱ bi̱ tséjmañuu, naʼni dí maxtáa ngíná ru̱dúu̱.*
2 Á mu mbáa naʼni dí ra̱májánʼ mu mbayáʼ dí magiʼdoo, rúʼko̱ xágiʼdoo numuu,mú á mu naʼni dí májánʼ ma̱ndoo maguma kríya̱a̱ʼ mu xákháñúu.+
3 Jeobá xániñuuʼ dí xa̱bu̱ májáanʼ manújngoo ewiʼ,+mú xáxnún xa̱bu̱ ra̱míjíinʼ dí ra̱ʼkhá tháán eñún.
4 Xa̱bu̱ bi̱ naskoo maʼni ngínáa,+mú xa̱bu̱ bi̱ nanigu̱u̱ʼ mañajunʼ maʼga̱nú magiʼdoo.+
5 Nandxa̱ʼóo májánʼ edxu̱u̱ ada̱ bi̱ nagujxi̱i̱ mbiʼi ruʼphu dí niʼdu,mú ada̱ bi̱ naʼgu midu̱u̱ mbiʼi dí naxtagijxi̱i̱ dí nijuiʼdu, xtáa raríya̱ʼ majkhuu má ikhaa.+
6 Xa̱bu̱ májáanʼ maguma tsajkurámaaʼ,+mú xa̱bu̱ ra̱májáanʼ tséʼthí dí ra̱májánʼ rí nandoo maʼni.
7 Índo̱ narmáʼáan a̱jkiu̱ún kuyáá xa̱bu̱ májáanʼ, nuthi dí májánʼ ga̱jma̱a̱ numuu,+mú nambumún kuyáá xa̱bu̱ ra̱májáanʼ.+
8 Bi̱ najmañuu magruigú consejo dí nuxnáá,+mú bi̱ tséñawu̱u̱n dí naʼthí, ikhaa má gámínuuʼ.+
9 Bi̱ naʼni dí májánʼ xáxtáa ga̱jma̱a̱ gamíi,+mú bi̱ naʼni nduwaʼ xáʼngo̱o̱ gárkaʼwu múʼúun dí naʼni.+
10 Bi̱ narugoo mbóo iduu mu maʼni nduwaʼ, naʼni gawúúnʼ eʼwíinʼ,+ga̱jma̱a̱ bi̱ tséñawu̱u̱n dí naʼthí, ikhaa má gámínuuʼ.+
11 Dí naʼthí mbáa xa̱bu̱ májáanʼ naʼni dí mbáa maxtáa,+mú xa̱bu̱ ra̱májáanʼ tséʼthí dí ra̱májánʼ rí nandoo maʼni.+
12 Rí nawiñu̱u̱nʼ kuyamijná xa̱bu̱ naʼni rí maku̱mu̱u̱ xkujndu,mú rí nandún kuyamijná,* narugurámuuʼ rí nakiéʼkúún.+
13 Rí naʼthí mbáa xa̱bu̱ bi̱ nakro̱ʼo̱o̱ nasngájma rí gíʼdoo ku̱ma̱,+mú xa̱bu̱ bi̱ tséndxa̱ʼóo májánʼ edxu̱u̱ muxpajtii ga̱jma̱a̱ xkuíyá.+
14 Xa̱bu̱ bi̱ najmañún nduyáá rí gíʼdoo numuu ku̱ma̱,+mú i̱ndó má xkujndu eyáʼ ga̱jma̱a̱ dí naʼthí mbáa xa̱bu̱ skágunʼ.+
15 Rí gíʼdoo* mbáa xa̱bu̱ nindxu̱u̱ xóo mbá xuajin dí kúgumaʼá,
mú xa̱bu̱ ngínáa namínúuʼ numuu rí nda̱a̱ dí gíʼdoo.+
16 Rí naʼni xa̱bu̱ májáanʼ na̱jkha̱ kayáa maxtáa,mú rí naʼni xa̱bu̱ ra̱májáanʼ na̱jkha̱ kayáa maʼni aʼkhá.+
17 Bi̱ nagruigú dí nuxpri̱guíí na̱jkha̱nú nanindxu̱u̱ xóo mbá kamba̱a̱ rí maʼni makuwá eʼwíinʼ,*mú bi̱ tsémajkhuu eʼni dí nuxpri̱guíí naʼni dí eʼwíinʼ magajnúriñu̱u̱ʼ náa kamba̱a̱ rúʼko̱.
18 Bi̱ tsésngájma pa̱jnu rí nawi̱yu̱u̱ʼ kaʼñún eʼwíinʼ naʼni nduwaʼ,+ga̱jma̱a̱ bi̱ naʼthí dí raʼkhí ga̱jma̱a̱ numuu eʼwíinʼ nindxu̱u̱ xa̱bu̱ skágunʼ.
19 Tséjyúu ekiéʼkúun bi̱ ra̱ʼkhá tháán eni̱gu̱u̱ʼ maʼthí,+mú bi̱ nañewu̱u̱n dí naʼthí nasngájma rí nandxa̱ʼóo májánʼ edxu̱u̱.+
20 Raju̱u̱n xa̱bu̱ májáanʼ nindxu̱u̱ xóo plata dí itháán májánʼ,+mú a̱jkiu̱u̱n xa̱bu̱ ra̱májáanʼ ragíʼdoo wéñuuʼ numuu.
21 Ajngáa dí nuthi xa̱bu̱ míjíinʼ naxnún ikha ga̱jma̱a̱ naxníʼtsún mbaʼin,+mú xa̱bu̱ skágunʼ nakháñún numuu dí tséjmañún.+
22 Índo̱ Jeobá naʼni tsajkurámaaʼ mbáa xa̱bu̱ naxtáa májánʼ,*+ga̱jma̱a̱ rúʼko̱ tséʼkha̱ kayóo nimbá ga̱ʼkhu̱.
23 Dí ma’ni dí ra̱májánʼ mbáa xa̱bu̱ skágunʼ ndaʼyoo rí nindxu̱u̱ xóo mbá gitsíin,mú xa̱bu̱ bi̱ nandxa̱ʼóo májánʼ edxu̱u̱ nagiʼdoo ku̱ma̱.+
24 Rí namíñuu eʼni xa̱bu̱ ra̱májáanʼ rúʼko̱ gáʼni dí mamínuuʼ,mú xa̱bu̱ májáanʼ majuixnáá dí ra̱ʼkhá tháán eyoo.+
25 Índo̱ gánújngoo gamiéjunʼ, ni xáxtáa xa̱bu̱ ra̱májáanʼ,+mú xa̱bu̱ májáanʼ nindxu̱u̱ xóo rajkhúu guʼwá dí wíji̱ jxa̱ʼ rí mbajyúuʼ asndu kámuu.+
26 Xó má índo̱ vino miga̱ʼ naʼni gawúunʼ iñaaʼ ga̱jma̱a̱ gúní naʼni dí majmaguʼ idaaʼ,xúʼko̱ kaʼnii eku̱mu̱u̱ patriúun mbáa xa̱bu̱ bi̱ naskoo.
27 Bi̱ namíñuu kaʼyoo Jeobá maxtáa mba̱yu̱u̱ʼ,+mú xa̱bu̱ ra̱májáanʼ xájyúuʼ gákháñuu.+
28 Rí gíʼthu̱u̱n xa̱bu̱ májáanʼ naʼni rí maxtáa gagi,+mú dí gíʼthu̱u̱n xa̱bu̱ ra̱májáanʼ xáʼga̱nú mambanúu.+
29 Xúgíʼ rí naʼni* Jeobá nindxu̱u̱ mu mañewu̱u̱n bi̱ ragíʼdoo aʼkhúun,+mú maʼni gámbíin bi̱ nuni̱ dí ra̱májánʼ.+
30 Xa̱bu̱ míjíinʼ nditháan xákúwá ga̱jma̱a̱ gamíi,+mú xa̱bu̱ ra̱míjíinʼ ni xákúwá itháan náa tsu̱du̱u̱ ku̱ba̱ʼ.+
31 Ajngáa dí naʼthí xa̱bu̱ májáanʼ nasngájma dí najmañuu,mú xa̱bu̱ ra̱májáanʼ ni xáʼthí mbá kayuuʼ.
32 Xa̱bu̱ míjíinʼ nuthi ajngáa rí mitsaanʼ,*mú xa̱bu̱ ra̱májáanʼ naʼthí rí nindxu̱u̱ minduwaʼ.
