Proverbios 13:1-25
13 Ada̱ bi̱ najmañuu nagruigú dí naxprígúu anu̱u̱,*+mú bi̱ natsíjma tséʼdxawun dí nuxpri̱guíí.+
2 Rí májánʼ dí naʼthí mbáa xa̱bu̱, maʼni dí maxtáa gagi,+mú bi̱ nuni̱ nduwaʼ nanigu̱u̱nʼ dí ra̱májánʼ.
3 Bi̱ nañewu̱u̱n rawuunʼ ga̱jma̱a̱ raju̱u̱n, nañewumínáʼ,+mú bi̱ tséñawu̱u̱n rawuunʼ magíʼnuu gamiéjunʼ.+
4 Bi̱ naskoo ra̱ʼkhá tháán mbaʼa dí eyoo magiʼdoo, mú na̱nguá má gíʼdoo nimbá,+mú xa̱bu̱ bi̱ nañajunʼ magiʼdoo xúgíʼ.*+
5 Xa̱bu̱ májáanʼ nawi̱yu̱u̱ʼ kaʼyoo rí minduwaʼ,+mú dí nuni̱ xa̱bu̱ ra̱míjíinʼ maʼni dí magajnúu gamajkhún ga̱jma̱a̱ maguma majti̱i̱nʼ.
6 Bi̱ ragíʼdoo aʼkhúun maxtiewa̱a̱n numuu rí naʼni dí májánʼ,+mú bi̱ naʼni aʼkhá mamínuuʼ ga̱jma̱a̱ dí ra̱májánʼ.
7 Xtáa bi̱ nasngájma dí ra̱ʼkhá tháán gíʼdoo, mú nda̱a̱ dí gíʼdoo,+ga̱jma̱a̱ xtáa bi̱ nasngájma dí nindxu̱u̱ xa̱bu̱ ngínáa, mú ikhaa itháan gíʼdoo.
8 Mbújkha̱a̱ najmaa mu miʼtsiríya̱a̱ʼ mbáa xa̱bu̱,+mú xa̱bu̱ ngíníin ndawa̱a̱ tsáa eʼnimíñún dí magudíin.*+
9 Xa̱bu̱ míjíinʼ nindxu̱ún xóo lámpara dí nambiʼi xngiyaʼ,+mú lámpara ndrígu̱ún xa̱bu̱ ra̱míjíinʼ majuiʼyúuʼ.+
10 Rí nuni̱ mbaʼumíjna̱ i̱ndó naʼni dí marigá xkujndu,+mú bi̱ nduyáʼ* consejo naguánú najmañún.+
11 Mbújkha̱a̱ rí nduyáʼ mbá nacha̱* xájyúuʼ gámbáa,+mú mbújkha̱a̱ rí naxtagijxi̱i̱ chíʼgíiʼ chíʼgíiʼ* maʼga raʼni itháán mba̱a̱.
12 Índo̱ tsémbánuu nacha̱ rí mbáa gíʼthu̱u̱n, naʼni rí maxtáa ngíná a̱jkiu̱u̱n,+mú índo̱ nambánuu rí nandoo nindxu̱u̱ xóo mbá ixi̱ rí ndaʼya.+
13 Bi̱ tséʼdxawun ikha dí najuixnáá, mamínuuʼ,+mú bi̱ naʼnimbo̱o̱ xtángoo* maguma tsajkurámaaʼ.+
14 Rí naʼsngáa* xa̱bu̱ bi̱ najmañuu ma̱ndoo maʼni rí mbáa maxtáa,+ga̱jma̱a̱ maʼni kríya̱a̱ʼ náa tsáʼkhá dí gamíi makhañúu.
15 Bi̱ najmaa nandxa̱ʼóo májánʼ edxu̱u̱ nandún kuyáá,mú rí nuni̱ xa̱bu̱ bi̱ rakáʼnii maku̱ma̱a̱ʼ xtañún naʼni dí marigá xkujndu.
16 Xa̱bu̱ bi̱ nandxa̱ʼóo májánʼ edxu̱u̱ naʼni xó má najmañuu,+mú xa̱bu̱ skágunʼ naʼni makujmaa dí nindxu̱u̱ skágui̱i̱nʼ.+
17 Xa̱bu̱ ra̱májáanʼ bi̱ na̱jkha̱ kayóo ajngáa nakudaminaʼ xkujndu,+mú xa̱bu̱ májáanʼ bi̱ na̱jkha̱ kayóo ajngáa naʼni májánʼ ñajunʼ ndrígóo.+
18 Bi̱ tséʼdxawun dí nuxpri̱guíí maʼni ngínáa ga̱jma̱a̱ magajnúu gamajkuu,mú bi̱ naʼdxawuun dí nuxpri̱guíí mbuyamajkuíí.+
19 Índo̱ nambánuu dí nandoo mbáa asndu tsímáá eʼni̱i̱ a̱jkiu̱u̱n,+mú xa̱bu̱ bi̱ tséndxa̱ʼwa̱a̱ májánʼ edxu̱ún tsíñún gúniña̱a̱nʼ runi̱ dí ra̱májánʼ.+
20 Bi̱ nambájxu̱u̱ gajmíi̱n xa̱bu̱ bi̱ najmañún maʼga̱nú majmañuu,+mú bi̱ nambájxu̱u̱ gajmíi̱n xa̱bu̱ bi̱ tséndxa̱ʼwa̱a̱ edxu̱ún magíʼnuu dí ra̱májánʼ.+
21 Gamiéjunʼ maʼni dí mumíniiʼ bi̱ nuni̱ aʼkhá,+mú xa̱bu̱ míjíinʼ maguma tsajkurámiinʼ ga̱jma̱a̱ dí májánʼ.+
22 Xa̱bu̱ májáanʼ naniñuuʼ mbá májánʼ herencia náa e̱jín xíñíiʼ,mú dí gíʼdoo xa̱bu̱ aʼkhá mixtagijxi̱i̱ mu makhánáá xa̱bu̱ májáanʼ.+
23 Náa mbaaʼ dí naxnúu xku̱bi̱ xa̱bu̱ ngínáa, narígá wéñuuʼ ganitsu,mú gamíi mudrigú káyííʼ índo̱ gúni̱ ngínáa.
24 Bi̱ tséxprígúu a̱ʼdióo* nawi̱yu̱u̱ʼ kaʼyoo,+mú bi̱ nandoo kaʼyoo a̱ʼdióo naxprígúu má xúʼko̱.*+
25 Xa̱bu̱ májáanʼ nakuiʼtsu asndu nagiʼmuu,+mú xa̱bu̱ ra̱míjíinʼ naxkidxu̱u̱n.+
Mbaʼa nota
^ O “tátée”.
^ Náa ajngáa hebreo naʼthí, “maʼni mba̱a̱”.
^ Náa ajngáa hebreo naʼthí, “tsédxawíín nimbá dí nuriñún”.
^ O “bi̱ mbóó eyáʼ”.
^ O “nduyáʼ muguáʼdáá ga̱jma̱a̱ ra̱májánʼ dí nuni̱”.
^ Náa ajngáa hebreo naʼthí, “nugimbóó ga̱jma̱a̱ ñawúúnʼ”.
^ Náa ajngáa hebreo naʼthí, “kiʼtáñajunʼ”.
^ O “Xtángoo ndrígóo”.
^ O “bi̱ tséxnúu a̱ʼdióo ga̱jma̱a̱ xkuíyá”.
^ O mbáa “mbá nacha̱ exprígúu”.
