Proverbios 16:1-33
16 Mbáa xa̱bu̱ nandxa̱ʼwáminaʼ májánʼ* dí maʼthí,+mú dí nariʼña̱a̱* na̱ʼkha̱ náa Jeobá.
2 Mbáa xa̱bu̱ naku̱mu̱u̱ dí xúgíʼ rí naʼni nindxu̱u̱ májánʼ,*+mú Jeobá ndaʼyoo náá numuu dí xúʼko̱ eʼni mbáa xa̱bu̱.*+
3 Atatsíñááʼ náa ñawúunʼ Jeobá xúgíʼ rí natani̱,+ga̱jma̱a̱ xúgíʼ awan ndrígáaʼ magajnúu májánʼ.
4 Jeobá najmuu xúgíʼ dí rígá mu mambanúu dí nandoo,asndu najmiuu xa̱bu̱ ra̱májáanʼ mu maʼni gámbíin bi̱ ra̱míjíinʼ.+
5 Jeobá nawi̱yu̱u̱ʼ kaʼñún xúgíinʼ bi̱ nuni̱ mbaʼumíjna̱.+
Ma̱ndoo ma̱ta̱ya̱a̱ gajkhun dí ikhiin mumíniiʼ má tsiaki̱i̱.
6 Ga̱jma̱a̱ numuu dí mbáa xa̱bu̱ nandoo kaʼñún eʼwíinʼ* ga̱jma̱a̱ nawi̱ji̱ jmbu, nuni̱ mba̱a̱ a̱jkiu̱ún náa rí nakiéʼkúun,+ga̱jma̱a̱ índo̱ mbáa namíñuu kaʼyoo Jeobá naniñuuʼ raʼni dí ra̱májánʼ.+
7 Índo̱ Jeobá nadxuu a̱jkiu̱u̱n ga̱jma̱a̱ numuu rí naʼni mbáa xa̱bu̱,ikhaa naʼni rí asndu bi̱ nawiñu̱u̱nʼ kuyáá xa̱bu̱ buʼko̱ maxtáa tsímáá gajmíi̱n.+
8 Itháan májánʼ dí maraʼdáá mbá chíʼgíiʼ* á mu natani̱ rí májánʼ,+ki xóo maraʼdáá wéñuuʼ á mu tsétani̱ rí májánʼ.+
9 Mbáa xa̱bu̱ ma̱ndoo maraʼwíí xóo maxtáa,mú Jeobá nindxu̱u̱ bi̱ naxnúu ikha xóo maʼni.+
10 Mbáa rey ndayóoʼ maʼthí dí naraʼwíí maguma xó má naxná ikha maguma Dios,+ga̱jma̱a̱ rey gíʼmaa maʼni má xúʼko̱ rí nindxu̱u̱ májánʼ.+
11 Balanzas o básculas dí nagiéwan májánʼ na̱ʼkha̱ náa Jeobá,mbá xúgíʼ amaʼ náa kajti itsí rí naxtagiéwan májánʼ ga̱jma̱a̱, ikhaa niʼni.+
12 Reyes bi̱ míjíinʼ nawiñu̱u̱nʼ eʼni dí ra̱májánʼ,+numuu dí á mu ikhiin nuni̱ dí májánʼ mbajyúuʼ rí nutañajunʼ.*+
13 Nadxuu a̱jkiu̱ún reyes índo̱ xa̱bu̱ nuthi dí májánʼ,
ikhiin nandún kuñúún bi̱ nuthi rí gajkhun.+
14 Índo̱ nakásngañu̱u̱ʼ rey, nindxu̱u̱ xóo mbá ajngáa dí najuiʼthá dí makhañún xa̱bu̱,+mú mbáa xa̱bu̱ bi̱ najmañuu naʼni dí xákiʼnáa.+
15 Á mu rey nasngájma rí nandoo kaʼyoo mbáa, ikhú xa̱bu̱ buʼko̱ maʼga̱nú maxtáa gagi,dí nandoo kaʼyoo nindxu̱u̱ xóo mbá du̱u̱n dí na̱ʼkha̱ kayóo ruʼwa náa mbiʼi dí kaʼyoo.*+
16 ¡Itháán májánʼ dí mataʼyáʼ majmañaaʼ ki xóo mataʼyáʼ oro!+
Itháán májánʼ dí mataʼyáʼ makrua̱ʼa̱a̱ʼ ki xóo mataʼyáʼ plata.+
17 Xa̱bu̱ míjíinʼ, tséni dí ra̱májánʼ.
Bi̱ nañewu̱u̱n dí naʼni, maxtáa.+
18 Rí matanimbamínaʼ maʼga kañáán matagíʼníí dí ra̱májánʼ,ga̱jma̱a̱ á mu nataxújximinaʼ maʼga kañáán magíʼnaaʼ dí raʼkhí.*+
19 Itháan májánʼ dí mani̱ndxa̱a̱ʼ mbáa xa̱bu̱ wabaaʼ náa majñu̱únʼ bi̱ tsékiʼníi,+ki xóo dí mataxuíʼtámina̱a̱ʼ gajmiáanʼ mbújkha̱a̱ bi̱ nuni̱ mbaʼumíjna̱.*
20 Bi̱ nandxa̱ʼwáminaʼ májánʼ xóo maʼnimbánuu mbá xkujndu magajnúu májánʼ*ga̱jma̱a̱ bi̱ naku̱mu̱u̱ kaʼyoo Jeobá, xtáa gagi.
21 Xa̱bu̱ bi̱ najmañuu, muxna mbiʼíí bi̱ nakro̱ʼo̱o̱,+ga̱jma̱a̱ bi̱ naʼthí ajngáa rí mitsaanʼ* tséjyúu eʼni matatsimbaaʼ.+
22 Rí nandxa̱ʼóo májánʼ edxu̱u̱ mbáa xa̱bu̱, rúʼko̱ naʼni dí maxtáa,mú xa̱bu̱ skágunʼ mumíniiʼ ga̱jma̱a̱ numuu dí raʼkhí eni̱.
23 Rí nakro̱ʼo̱o̱ xa̱bu̱ bi̱ najmañuu nambáyúu mandxaʼwáminaʼ májánʼ dí maʼthí,+ga̱jma̱a̱ naʼni rí xáʼniaaʼ gakhi̱i̱ matatsimbaaʼ rí naʼthí.
24 Ajngáa mitsaanʼ* nindxu̱u̱ xóo xtíya náa ga̱jnu̱ʼ jyááʼ,mitaun ga̱jma̱a̱ naʼni gújkhúʼ itsu̱.+
25 Rígá mbá kamba̱a̱ rí xa̱bu̱ numbaaʼ ndaʼyoo rí nindxu̱u̱ májánʼ,mú kamba̱a̱ rúʼko̱ na̱jkha̱ kayáa makhañúu.+
26 Mbáa xa̱bu̱ nañajunʼ gakhi̱i̱ mu magiʼdoo dí mi̱khu̱,numuu dí naxkidxu̱u̱* naxkajxi̱i̱ dí mañajunʼ.+
27 Mbáa xa̱bu̱ bi̱ nda̱a̱ rí ejmaa naʼndiriya̱a̱ʼ dí ra̱májánʼ dí nuni̱ eʼwíinʼ,+ajngáa rí naʼthí nindxu̱u̱ xóo aguʼ dí nakha.+
28 Xa̱bu̱ bi̱ nanigu̱u̱ʼ xkujndu* naʼni rí magi̱ʼdu̱u̱n eʼwíinʼ,+ga̱jma̱a̱ bi̱ naʼthí dí raʼkhí ga̱jma̱a̱ numún eʼwíinʼ, naʼni wájíinʼ bi̱ nambájxu̱u̱n májánʼ.+
29 Xa̱bu̱ ra̱májáanʼ naʼni rájáaʼ xa̱bu̱ numbaaʼ ga̱jma̱a̱ mu maʼni dí ra̱májánʼ,ga̱jma̱a̱ na̱jkha̱ kayáa náa kamba̱a̱ dí ra̱májánʼ.
30 Narugoo mbóoʼ iduu índo̱ naríyaʼ awan mu maʼni dí ra̱májánʼ,
ga̱jma̱a̱ na̱ʼkhu̱ xpa̱ rawuunʼ índo̱ naʼni mbá dí ra̱májánʼ.
31 Xngiʼxóo xa̱bu̱ bi̱ na̱jkha̱ náa kamba̱a̱ dí májánʼ+nindxu̱u̱ xóo mbá corona dí naʼni maʼni mitsiʼyáa.*+
32 Itháan májáanʼ mbáa xa̱bu̱ bi̱ naʼngo̱o̱ a̱jkiu̱u̱n*+ ki xóo mbáa xa̱bu̱ bi̱ xkujiiʼ,ga̱jma̱a̱ itháan májáanʼ bi̱ nañewu̱u̱n dí naʼni* ki xóo bi̱ naʼngo̱o̱ naxmínaʼ ga̱jma̱a̱ mbá xuajin.+
33 Mbáa xa̱bu̱ naʼngo̱o̱ naríyaʼ suerte,*+mú asndu ndiéjunʼ má dí nagájnuu náa suerte na̱ʼkha̱ náa Jeobá.+
Mbaʼa nota
^ O “nariʼña̱a̱ xó má gíʼmaa”. Náa ajngáa hebreo naʼthí, “dí xóo nariʼña̱a̱ raju̱u̱n”.
^ Náa ajngáa hebreo naʼthí, “Dí xóo naʼniratoo a̱jkiu̱u̱n mbáa xa̱bu̱ ikhaa má kaʼyoo”.
^ Náa ajngáa hebreo naʼthí, “kaʼwu”.
^ O “dí xóo nandxa̱ʼwáminaʼ”. Náa ajngáa hebreo naʼthí, “espíritu”.
^ O “lajuíin”.
^ O “trono ndrígu̱ún”.
^ Mbáa mbiʼi rígi̱ nandoo gáʼthúu̱n gu̱nʼ abril, índo̱ ra̱ʼkhá tháán eyóoʼ ruʼwa mu xúʼko̱ mbaja̱a̱ rí nudu xa̱bu̱.
^ O “maxpátri̱ga̱a̱n”.
^ O “dí mataxuíʼtamina̱a̱ʼ gajmiáanʼ mbújkha̱a̱ rí nundrigú káñúnʼ eʼwíinʼ”.
^ Náa ajngáa hebreo naʼthí, “maxkamaa rí májánʼ”.
^ Náa ajngáa hebreo naʼthí, “rí xóo mitaun rawuunʼ”.
^ O “nagui̱i̱”.
^ Náa ajngáa hebreo naʼthí, “rawuunʼ”.
^ O “Bi̱ naríya̱ʼ awan maʼni dí ra̱májánʼ”.
^ O “naʼni dí magruigú gamajkhu”.
^ O “tsékiʼnáa nacha̱”.
^ Náa ajngáa hebreo naʼthí, “bi̱ naʼngo̱o̱ naʼtáñájuminaʼ”.
