Proverbios 21:1-31

  • Jeobá naxnúu ikha a̱jkiu̱u̱n mbáa rey (1)

  • Dí matani̱ rí májánʼ nindxu̱u̱ itháan májánʼ ki xóo tsigijñaʼ (3)

  • “Magajnúu májánʼ awan dí naguwíi xa̱bu̱ bi̱ nanigu̱u̱ʼ mañajunʼ” (5)

  • Bi̱ tsíyoo gáʼdxawún xa̱bu̱ bi̱ nda̱ñúunʼ, xúdxawíín má ma̱ngaa (13)

  • Ndawa̱a̱ nimbáa bi̱ gíʼdoo itháan ku̱ma̱, ki xóo Jeobá (30)

21  A̱jkiu̱u̱n mbáa rey nindxu̱u̱ xóo iyaʼ náa ñawúunʼ Jeobá.+ Ikhaa naxnúu maʼga̱ náa má nandoo.+  2  Mbáa xa̱bu̱ naku̱mu̱u̱ dí xúgíʼ rí naʼni nindxu̱u̱ májánʼ,+mú Jeobá ndaʼyoo dí rígá náa a̱jkiu̱u̱n mbáa xa̱bu̱.*+  3  Índo̱ xa̱bu̱ naʼni dí májánʼ ga̱jma̱a̱ dí jmbu,rúʼko̱ dí itháan nanigu̱u̱ʼ Jeobá, raʼkháa tsigijñaʼ.+  4  Xóo nuyejxi̱ ga̱jma̱a̱ dí nundxa̱ʼwa̱míjna̱ xa̱bu̱ bi̱ nuni̱ mbaʼumíjna̱,nindxu̱u̱ xóo mbá lámpara dí naxná ikhúún xa̱bu̱ ra̱míjíinʼ, mú rúʼko̱ nindxu̱u̱ aʼkhá.+  5  Magajnúu májánʼ awan dí naguwíi xa̱bu̱ bi̱ nanigu̱u̱ʼ mañajunʼ,+mú bi̱ tséndxaʼwamínaʼ májánʼ dí maʼni, maʼga̱nú mani̱ndxu̱u̱ xa̱bu̱ ngínáa.+  6  Rí gíʼdoo numuu rí ndayáʼ mbáa xa̱bu̱ ga̱jma̱a̱ numuu rí naʼni nduwaʼ,nindxu̱u̱ xóo mbá rujmbaaʼ dí nanújngoo, xóo mbá tsáʼkhá rí maʼni makhañúu.*+  7  Maguma gámbíin xa̱bu̱ ra̱míjíinʼ ga̱jma̱a̱ numuu ra̱májánʼ má dí nuni̱,+numuu rí tsíñún gúni̱ rí májánʼ.  8  Mixngaa kambo̱o̱ xa̱bu̱ bi̱ gíʼdoo aʼkhúun,mú jmbu kambo̱o̱ xa̱bu̱ bi̱ ragíʼdoo aʼkhúun.+  9  Itháan má májánʼ dí maraxtaa náa eskíniu̱u̱ tsu̱du̱u̱ guʼwáaʼ,ki xóo dí maraxtaa awúu̱n guʼwáaʼ ga̱jma̱a̱ʼ a̱ʼgia̱a̱ʼ bi̱ naxiéʼkhá* má xúʼko̱.+ 10  Xa̱bu̱ ra̱májáanʼ ra̱ʼkhá tháán eyoo marigá dí ra̱májánʼ,+tségáwíinʼ a̱jkiu̱u̱n kaʼyoo xa̱bu̱ numbaaʼ ga̱jma̱a̱.+ 11  Índo̱ naguma ngínáa bi̱ natsíjma, ikhú bi̱ tséndxa̱ʼwa̱a̱ májánʼ edxu̱ún naguánú najmañún itháan,ga̱jma̱a̱ índo̱ bi̱ najmañuu nagruigú ikha, na̱jkha̱nú nagiʼdoo ku̱ma̱.*+ 12  Dios bi̱ Jmbii ndaʼyoo goʼwóo xa̱bu̱ ra̱májáanʼ,ga̱jma̱a̱ naʼni dí xa̱bu̱ ra̱májáanʼ maguma gámbáa.+ 13  Bi̱ tsíyoo gaʼdxawun xa̱bu̱ bi̱ na̱nda̱ʼa̱ mínuuʼ dí mixtambáyííxúʼko̱ má gúni̱i̱ ma̱ngaa índo̱ gánda̱ʼa̱ mínuuʼ rí mixtambáyíí.+ 14  Regalo dí najuixná ngu̱ʼwa̱á, naʼni dí mbáa xákiʼnáa,+mú tsigijñaʼ dí najuixná ngu̱ʼwa̱á,* naʼni dí makiʼníin itháan. 15  Índo̱ xa̱bu̱ májáanʼ naʼni rí májánʼ, naxtáa gagi,+mú bi̱ nuni̱ dí ra̱májánʼ, raʼkhí eyáá dí májánʼ ikhiin. 16  Xa̱bu̱ bi̱ nagájnutiyo̱o̱ʼ náa kamba̱a̱ rí maʼga kayáa mikro̱ʼo̱o̱mbayáa jxu̱u̱ʼ mbóó gajmíi̱n bi̱ nikháñún má.*+ 17  Bi̱ ra̱ʼkhá tháán eni̱gu̱u̱ʼ maʼni gagimina̱ʼ, maʼga̱nú maʼni migínáa,+bi̱ nanigu̱u̱ʼ maga̱a̱n vino ga̱jma̱a̱ nanigu̱u̱ʼ majmuu aceite xáʼga̱nú magiʼdoo. 18  Xa̱bu̱ ra̱májáanʼ maʼni kríya̱a̱ʼ xa̱bu̱ májáanʼ,ga̱jma̱a̱ xa̱bu̱ bi̱ naʼni nduwaʼ mamínuuʼ ga̱jma̱a̱ numuu xa̱bu̱ májáanʼ.+ 19  Itháan má májánʼ dí maraxtaa náa ku̱ba̱ʼ mijxooʼ,*ki xóo dí maraxtaa ga̱jma̱a̱ʼ a̱ʼgia̱a̱ʼ bi̱ naxiéʼkhá ga̱jma̱a̱ bi̱ nakiʼnáa.+ 20  Náa goʼwóo xa̱bu̱ bi̱ najmañuu rígá dí gíʼdoo wéñuuʼ numuu ma̱ngaa rígá aceite,+mú bi̱ tséndxa̱ʼóo májánʼ edxu̱u̱ mbaʼ najmu̱ú* dí gíʼdoo.+ 21  Bi̱ ndayáʼ má xúʼko̱ maʼni rí májánʼ ga̱jma̱a̱ rí maʼndoo kaʼñún eʼwíinʼ,* maxtáa,mani̱ndxu̱u̱ xa̱bu̱ májáanʼ ga̱jma̱a̱ mbuyamajkuíí.+ 22  Xa̱bu̱ bi̱ najmañuu, maʼngo̱o̱ maxmína̱ʼ ga̱jma̱a̱ mbá xuajin náa kúwá xa̱bu̱ bi̱ xkujiinʼ,ga̱jma̱a̱ maʼngo̱o̱ maʼni gámbáa xtájtsí dí naku̱mu̱ún kuyáá.+ 23  Bi̱ nañewu̱u̱n rawuunʼ ga̱jma̱a̱ raju̱u̱n,tségiʼdoo xkujndu.+ 24  Xa̱bu̱ bi̱ tséñawu̱u̱n rí naʼninagumbiʼyuu bi̱ nakujximínáʼ ga̱jma̱a̱ bi̱ najñekoo.+ 25  Xa̱bu̱ bi̱ naskoo, maxíyáa dí ra̱ʼkhá tháán eyoo magiʼdoo,numuu rí tsíyoo gáñajunʼ.+ 26  Bi̱ naskoo xúgíʼ mbiʼi nandoo magiʼdoo,mú xa̱bu̱ májáanʼ naxná rí gíʼdoo, dí asndu tsíyéjxi̱i̱ nimbá.+ 27  Dios nawi̱yu̱u̱ʼ eʼni tsigijñaʼ ndrígóo xa̱bu̱ ra̱májáanʼ.+ ¡Iwáá lá índo̱ tséxnájxi̱ ga̱jma̱a̱ xúgíʼ a̱jkiu̱u̱n xá! 28  Testigo bi̱ minduwaaʼ, maʼga̱nú mambáa,+mú xa̱bu̱ bi̱ naʼthí xó má naʼdxawuun, maxtáa májánʼ.* 29  Xa̱bu̱ ra̱májáanʼ naʼni dí eʼwíinʼ mbuyáá dí ikhaa nditháan tséti̱yu̱u̱ʼ,+mú xa̱bu̱ májáanʼ naraʼwíí májánʼ náá kamba̱a̱ gíʼmaa maʼga.*+ 30  Ndawa̱a̱ nimbáa bi̱ gíʼdoo itháan ku̱ma̱, bi̱ nandxa̱ʼóo májánʼ edxu̱u̱ o naxná májánʼ consejo, bi̱ maʼngo̱o̱ marikhoo dí nandoo maguma Jeobá.+ 31  Wáyú xtáa má xawii mu maʼga náa mbiʼi rí muxmijná,+mú Jeobá nindxu̱u̱ bi̱ naʼni káwíin xa̱bu̱.+

Mbaʼa nota

^ O “náá numuu dí xúʼko̱ eʼni mbáa xa̱bu̱”.
^ O mbáa “rujmbaaʼ dí nanújngoo náa bi̱ nduyáʼ rí makhañún”.
^ O “naʼthá numa”.
^ O “ndaʼyoo dí maʼni”.
^ Náa ajngáa hebreo naʼthí, “mbá tsigijñaʼ dí nagájnuu náa tsu̱xtu̱ún”.
^ Náa ajngáa hebreo naʼthí, “bi̱ nikháñún bi̱ nánguá guáʼdáá tsiaki̱i̱”.
^ O “desierto”.
^ Náa ajngáa hebreo naʼthí, “mbaʼ naʼkhu̱ú”.
^ Náa ajngáa hebreo naʼthí, “masngájmún eʼwíinʼ ngajua rí tsétumuu”. Atayáá glosario, ngajua rí tsétumuu.
^ Náa ajngáa hebreo naʼthí, “xa̱bu̱ bi̱ naʼdxawuun maʼthí má xúʼko̱”.
^ O “naʼni dí náa kambo̱o̱ xárígá gamíi”.

Copyrights ndrígóo i̱yi̱i̱ʼ rígi̱