Proverbios 29:1-27
29 Xa̱bu̱ bi̱ tséʼdxuun dí maratha̱a̱n* maski ajndu nuxpriguíí mbaʼa nuthu,+nda̱a̱ tsu̱ma̱ gáguma gámbáa, nándáa rí maʼni.+
2 Índo̱ mbaʼin xa̱bu̱ míjíinʼ, xa̱bu̱ xuajin nadxún,mú, índo̱ xa̱bu̱ ra̱májáanʼ naʼtáñajunʼ, xa̱bu̱ xuajin numíniiʼ.+
3 Xa̱bu̱ bi̱ nanigu̱u̱ʼ rí majmañuu naʼni rí maʼdxuu anu̱u̱,*+mú bi̱ najngrui̱go̱o̱ gajmíi̱n gu̱ʼu̱ bi̱ nugujuamíjna̱ mbaʼ natsíjmu̱úʼ mbújkhoo ga̱jma̱a̱ i̱ʼwáʼ rí gíʼdoo.+
4 Índo̱ mbáa rey naʼni rí májánʼ, naʼni rí xuajin magiʼdoo tsiaki̱i̱,+mú xa̱bu̱ bi̱ ndayá’ makhánáá regalo mu ma’ni mbá dí ra̱májánʼ naʼni rí mamínuuʼ xuajin.
5 Xa̱bu̱ bi̱ mbaʼ naʼthúún dí májánʼ eʼni xa̱bu̱ numbaaʼ ga̱jma̱a̱,nindxu̱u̱ xóo mbáa bi̱ natíga̱ mbá amaʼ dí marádooʼ rajkhúún.+
6 Aʼkhá rí naʼni xa̱bu̱ ra̱májáanʼ mani̱ndxu̱u̱ xóo mbá tsáʼkhá náa ikhaa,+mú xa̱bu̱ májáanʼ asndu naʼndxaʼwá dí nadxuun.+
7 Xa̱bu̱ májáanʼ naxmiéjuunʼ dí magumaa dí májánʼ xa̱bu̱ ngínáa,+mú xa̱bu̱ ra̱májáanʼ tsíxmiéjuunʼ rúʼko̱.+
8 Xa̱bu̱ bi̱ nuni̱ mbaʼumíjna̱ nindxu̱ún xóo bi̱ nutsikha xuajin,+mú xa̱bu̱ najmañún nuni̱ dí xákásngañu̱únʼ xa̱bu̱.+
9 Á mu mbáa xa̱bu̱ najmañuu nagi̱ʼdu̱u̱ ga̱jma̱a̱ mbáa xa̱bu̱ skágunʼ,xa̱bu̱ skágunʼ makiʼnáa ga̱jma̱a̱ matsíjma, xámbánún.+
10 Bi̱ nuradíin xa̱bu̱ nawi̱ñu̱u̱nʼ kuyáá bi̱ nda̱a̱ aʼkhúun,+ga̱jma̱a̱ nugími̱jna̱ muxiyáa xa̱bu̱ jmbii.*
11 Xa̱bu̱ skágunʼ naʼthí xúgíʼ xóo eku̱mu̱u̱,+mú xa̱bu̱ bi̱ najmañuu naʼngo̱o̱ a̱jkiu̱u̱n nagi̱ʼthu̱u̱n asndu índo̱ naguámbá xkujndu.+
12 Á mu mbáa xa̱bu̱ ñajunʼ naʼnimbo̱o̱ rí minduwaʼ,xúgíinʼ xa̱bu̱ bi̱ numbayíí mani̱ndxu̱ún xa̱bu̱ ra̱míjíinʼ.+
13 Xa̱bu̱ ngínáa ga̱jma̱a̱ xa̱bu̱ bi̱ naʼni rí mamínuuʼ xa̱bu̱ ngínáa mbrígu̱ún nindxu̱ún,
numuu dí mbá nájmi̱i̱n Jeobá naʼni rí makuwá.
14 Á mu mbáa rey naʼnimbánuu numuu xa̱bu̱ ngínáa xó má gíʼmaa,+xíliu̱u̱* rí naʼtáñajunʼ mawi̱ji̱ jxa̱ʼ.+
15 Dí mataxpríguíí* mbáa naʼni rí majmañuu,+mú ada̱ bi̱ nuniña̱a̱nʼ maʼni má rí eyoo, naríyaʼ majkhuu ru̱dúu̱.*
16 Índo̱ naʼni mbaʼin xa̱bu̱ ra̱míjíinʼ, naʼni mbaʼa aʼkhá,mú xa̱bu̱ míjíinʼ mbuyáá xóo gáguma gámbíin.+
17 Ataxpríguíí a̱ʼdiáaʼ ga̱jma̱a̱ ikhaa maʼni rí maʼni̱i̱ a̱jkia̱a̱nʼ,ga̱jma̱a̱ maʼni rí maʼdxuu a̱jkia̱a̱nʼ.+
18 Náa nda̱a̱ rí nawasngájmún* nuni̱ rí nindxu̱u̱ majthi̱ʼ,+mú bi̱ nunimbu̱u̱n xtángoo kúwá gagi.+
19 Mbáa ñumbáá xániñaminaʼ dí mataxpríguíí ga̱jma̱a̱ ajngáa,numuu rí maski ajndu najmaa nakro̱ʼo̱o̱, mú tséʼnimbo̱o̱.+
20 Nitayáá mbáa xa̱bu̱ bi̱ tségiʼthu̱u̱n rí maʼthí ráʼ.+
Itháan má ragákhíi dí matambáyíí mbáa xa̱bu̱ skágunʼ ki xóo matambáyíí ikhaa.+
21 Á mu nduyangajua̱a̱ mbáa ñumbáá asndu nákha chíʼgíiʼ,*maʼga̱nú mani̱ndxu̱u̱ mbáa xa̱bu̱ bi̱ nda̱a̱ majkhuu.
22 Xa̱bu̱ bi̱ tséjyúuʼ kiʼnáa naʼni dí marigá xkujndu,+xa̱bu̱ bi̱ nakásngañu̱u̱ʼ mbá nacha̱ nakudaminaʼ mbaʼa aʼkhá.+
23 Dí naʼnimbamínáʼ xa̱bu̱ maʼni rí maguma májti̱i̱ʼ,+mú asndu tsáá bi̱ nindxu̱u̱ xa̱bu̱ wabaaʼ makhánáá gamajkhu.+
24 Bi̱ nambájxu̱u̱ ga̱jma̱a̱ kuʼwáʼ tsíyoo gáʼyaminaʼ má ikhaa,
numuu rí naʼdxuun dí nundxa̱ʼwa̱a̱ maʼthí, mú ikhaa tséʼthí.+
25 Dí mamiñáanʼ xtañún xa̱bu̱ nindxu̱u̱ mbá tsáʼkhá,+mú bi̱ naku̱mu̱u̱ kaʼyoo Jeobá maxtiewa̱a̱n.+
26 Mbaʼin nandún magún gútháán* xa̱bu̱ ñajunʼ rí mambáñún,mú náa Jeobá e̱ʼkha̱ rí mbáa xa̱bu̱ magumaa rí májánʼ.+
27 Xa̱bu̱ májáanʼ nawi̱yu̱u̱ʼ kaʼyoo xa̱bu̱ ra̱májáanʼ,+mú xa̱bu̱ ra̱májáanʼ nawi̱yu̱u̱ʼ kaʼyoo xa̱bu̱ bi̱ na̱jkha̱ náa kamba̱a̱ rí jmbu.+
Mbaʼa nota
^ Náa ajngáa hebreo naʼthí, “gújkhúʼ itsu̱ rexo̱o̱”.
^ O “tátée”.
^ O mbáa “mú xa̱bu̱ jmbii nagíʼ mañe̱wumínaʼ”.
^ O “trono ndrígóo náa”.
^ Náa ajngáa hebreo naʼthí, “Dí mataxpríguíí ga̱jma̱a̱ xkuíyá”.
^ O “nánée”.
^ O “visión”.
^ O “lajuíin”.
^ O mbáa “nduyáʼ rí mambáñún”. Náa ajngáa hebreo naʼthí, “nduyáʼ inuu”.
