Proverbios 4:1-27
4 E̱ji̱nʼ, gudxawíín rí naxpríguála ana̱la,*+guʼgíʼ edxa̱la mu muxkamaa dí makrua̱ʼa̱la,
2 numuu dí ikhúún maxna̱la mbá májánʼ ikha,xámbumala rí nasngála.*+
3 Ikhúún ninindxu̱ʼ mbáa ada̱ bi̱ niʼnimbo̱o̱ kaʼyoo anu̱u̱,+ga̱jma̱a̱ ninindxu̱ʼ mbáa ada̱ bi̱ ru̱dúu̱* ra̱ʼkhá tháán nindoo kaʼyoo.+
4 Ikhaa naʼthúnʼ ajngáa rígi̱ mu maʼsngóʼ: “Atiéjxi̱ nga̱jua̱a̱ʼ ajngóʼ náa a̱jkia̱a̱nʼ,+
atanimbáníí kiʼtáñajunʼ ndrígóʼ ga̱jma̱a̱ maraxtaa má xúʼko̱.+
5 Atayáʼ majmañaaʼ, atayáʼ dí makrua̱ʼa̱a̱ʼ,+
xámbumaaʼ ni má xátani̱ tsínguminaʼ náa dí natha̱a̱nʼ.
6 Xátatsiʼñááʼ ku̱ma̱, numuu dí ikhaa mañewa̱a̱nʼ,
gaʼndaaʼ xtayáá numuu dí ikhaa maʼtámbáyaaʼ.
7 Dí majmañaaʼ gíʼdoo itháan numuu,+ ikha jngóo atayáʼ dí majmañaaʼ,ga̱jma̱a̱ náa mbá xúgíʼ rí gátaʼyáʼ, atayáʼ dí makrua̱ʼa̱a̱ʼ.+
8 Atayáá dí ra̱ʼkhá tháán gíʼdoo numuu dí maraʼdáá ku̱ma̱, numuu dí ikhaa maʼni mba̱a̱n.+
Á mu ndayáraʼaa, ikhaa maxnáa’ gamajkhu.+
9 Magrígu náa edxa̱a̱ʼ mbá corona dí mitsaanʼ,*ma̱ni̱ dí maʼni mitsiʼñán ga̱jma̱a̱ mbá corona dí mitsaanʼ”.
10 Atadxawíín a̱ʼdióʼ ga̱jma̱a̱ atatsimbaaʼ rí natha̱a̱nʼ,mu xúʼko̱ maraxtaa mba̱yu̱u̱ʼ.+
11 Ikhúún maʼgá ka̱ña̱a̱n náa kamba̱a̱, náa rígá ku̱ma̱,+maxna̱a̱ʼ ikha mi̱dxu̱ʼ náa kamba̱a̱ náa rígá dí jmbu.+
12 Índo̱ gájngrui̱ga̱a̱ʼ, xárígá nimbá rí maʼni majngrádáánʼ,ga̱jma̱a̱ á mu natagáyaaʼ, xáxpátriga̱a̱n.
13 Arajthuun jxa̱ʼ dí nuxpriguáaʼ, xátatsiʼñááʼ,+
atie̱wa̱a̱n, numuu dí rúʼko̱ maʼni dí maraxtaa.+
14 Xádxúʼ náa kambu̱ún xa̱bu̱ ra̱míjíinʼ,ni má xájngruiga̱a̱ʼ náa kambu̱ún xa̱bu̱ bi̱ nuni̱ dí raʼkhí.+
15 Xárajtuun kambu̱ún, xádxúʼ ikhí+atani̱ tsíngumínáʼ ga̱jma̱a̱ i̱mba̱ kamba̱a̱ gídxúʼ.+
16 Numuu dí ikhiin tsíyoo gúnúʼ á mu tséni dí ra̱májánʼ.
Tsíyoo gúnúʼ á mu tséxi̱yáa mbáa xa̱bu̱.
17 Numuu rí muni̱ dí ra̱májánʼ nindxu̱u̱ xóo pan dí naʼphu̱ eyáá ikhiin,ga̱jma̱a̱ dí muni̱ gawúúnʼ eʼwíinʼ nindxu̱u̱ xóo vino eyáá.
18 Mú kambu̱ún xa̱bu̱ míjíinʼ nindxu̱u̱ xóo agiuuʼ a̱jkha̱ʼ rí nambiʼi índo̱ najtsi,dí mañu mañu̱ú na̱jkha̱ rambiʼi itháan asndu índo̱ naʼni wakhaʼ.+
19 Kambu̱ún xa̱bu̱ ra̱míjíinʼ nindxu̱u̱ xóo mikína,ikhiin na̱nguá eyáá ndiéjunʼ eʼni majngrádiinʼ.
20 A̱ʼdióʼ, atadxawíín májánʼ dí natha̱a̱nʼ,atagíʼ edxa̱a̱ʼ* matadxawíín ajngóʼ.
21 Xámbumaaʼ rígi̱,atrajxi̱i̱ májánʼ náa awúu̱n a̱jkia̱a̱nʼ.+
22 Numuu rí bi̱ gúgíʼ edxu̱ún mudxawíín, makuwá,+ga̱jma̱a̱ mani̱ndxu̱u̱ thana náa mbá xúgíʼ xuñúúnʼ.
23 Dí itháan gíʼdoo numuu matiewa̱a̱n, nindxu̱u̱ a̱jkia̱a̱nʼ,+numuu dí ikhí na̱ʼkha̱ rí naʼni maraxtaa.
24 Xárata̱ dí minduwaʼ,+ga̱jma̱a̱ xátaniʼñáánʼ dí ajngáa rí naʼni nduwiinʼ eʼwíinʼ magajnúu náa rawaanʼ.
25 Mbóó gáyejxi̱ idaaʼ náa kamba̱a̱,xátiejxi̱ náa ñawún májáanʼ ni má náa ñawún xti̱ya̱a̱ʼ.+
26 Atanimbáníi* kamba̱a̱ náa mi̱dxu̱ʼ,+ga̱jma̱a̱ náa mbá xúgíʼ kamba̱a̱ʼ xárígá nimbá dí maʼni majngrádáánʼ.
27 Xágájnuriya̱a̱ʼ náa ñawún májáanʼ ni má náa ñawún xti̱ya̱a̱ʼ.+
Atani̱ tsínguminaʼ náa dí ra̱májánʼ.
