Proverbios 27:1-27
27 Xátani mbamína’ ga̱jma̱a̱ numuu dí matani̱ gájtsíí,numuu dí tsétayáá ndiéjunʼ dí gárígá gájtsíí.+
2 Atatsíñááʼ dí i̱mba̱a̱* gáʼni mba̱a̱n, raʼkháa ajngáa dí naratá ikháán,i̱mba̱a̱ gáʼni, raʼkháa ikháán.+
3 Ki̱wu̱n itsí ga̱jma̱a̱ ki̱wu̱n jui̱ʼi̱,mú xkujndu dí naʼni marigá xa̱bu̱ skágunʼ itháán má ki̱wu̱n ki xóo a̱jma̱ rígi̱.+
4 Xa̱bu̱ bi̱ nakásngañu̱u̱ʼ xkawiʼ a̱jkiu̱u̱n, nindxu̱u̱ xóo iyaʼ dí naguʼwa̱ dí naʼni gámbóo,mú, tsáá lá gáʼngo̱o̱ a̱jkiu̱u̱n gáʼni bi̱ naxígúu* rá.+
5 Itháán má májánʼ dí mataxpríguíí pa̱jnu mbáa, ki xóo rí maʼndaaʼ xtayáá, mú xátasngajmáá.+
6 Itháán má májánʼ dí maʼni gawáanʼ mbáa bi̱ nambájxa̱a̱ʼ májánʼ ga̱jma̱a̱ʼ,+ki xóo masngájmaaʼ dí ra̱ʼkhá tháán májánʼ a̱jkiu̱u̱n bi̱ gíʼdáán sia̱nʼ.*
7 Bi̱ jxa̱ʼ awúu̱n tsíyoo gágáan* jyááʼ dí ka̱jnu̱ʼ náa xtíya,mú bi̱ naxkidxu̱u̱ asndu rí miʼkhu̱u̱n ndaʼyoo mitaun.
8 Xó má ñu̱ʼu̱ bi̱ naniñuuʼ xújúunʼ,xúʼko̱ nindxu̱u̱ xa̱bu̱ bi̱ naniñuuʼ goʼwóo.
9 Aceite ga̱jma̱a̱ rí ndataun naʼni rí maʼdxuu a̱jkiu̱u̱n mbáa xa̱bu̱,xúʼko̱ mitsaanʼ* nindxu̱u̱ dí mambajxáaʼ ga̱jma̱a̱ʼ xa̱bu̱ bi̱ naxnáaʼ consejo ga̱jma̱a̱ xúgíʼ a̱jkiu̱u̱n.+
10 Xátatsiʼñááʼ bi̱ nambájxa̱a̱ʼ ga̱jma̱a̱ʼ, ni má bi̱ nambájxu̱u̱ ga̱jma̱a̱ ana̱a̱ʼ,*ga̱jma̱a̱ xádxúʼ náa goʼwóo ndxájuaaʼ mbiʼi dí natamíniiʼ,itháan májánʼ dí maraʼdaa mijngii bi̱ nambájxa̱a̱ʼ ga̱jma̱a̱ʼ* ki xóo ndxájuaaʼ bi̱ xtáa mitsínguánʼ.+
11 A̱ʼdióʼ, gajmañaaʼ, ga̱jma̱a̱ atani̱ rí maʼdxuu a̱jkiu̱nʼ,+mu xúʼko̱ ikhúún ma̱ndoo mariʼñuu bi̱ natsíjmún.*+
12 Índo̱ xa̱bu̱ bi̱ nandxa̱ʼóo májánʼ edxu̱u̱ ndaʼyoo gamíi, ikhaa tséjkha̱ ikhí,+mú xa̱bu̱ bi̱ tséndxa̱ʼwa̱a̱ májánʼ edxu̱ún nagún ikhí ga̱jma̱a̱ numíníiʼ.
13 Á mu xa̱bu̱ na̱ʼkha̱á tséʼngo̱o̱ gáʼni̱i̱ gidxawúu, mú na̱ʼkha̱ mbáa bi̱ naxná ajngóo dí maʼni̱i̱ gidxawúu, atrígú káyííʼ xtíñuu,ga̱jma̱a̱ á mu xúʼko̱ má niʼni ga̱jma̱a̱ numuu mbáa a̱ʼgu̱ bi̱ na̱ʼkha̱á, atrígú káyííʼ dí gíʼdoo.+
14 Índo̱ mbáa narajxi̱i̱ xígú* xa̱bu̱ numbaaʼ ga̱jma̱a̱ dí miʼcha̱,xa̱bu̱ buʼko̱ xánigu̱u̱ʼ.*
15 Mbáa a̱ʼgu̱ bi̱ ninújúnʼ bi̱ nanigu̱u̱ʼ maxiéʼkhá* má xúʼko̱, nindxu̱u̱ xóo mbá guʼwá dí naʼkho̱o̱ʼ índo̱ naxnúu ruʼwa.+
16 Bi̱ maʼngo̱o̱ marikhoo a̱ʼgiu̱u̱ bi̱ naxiéʼkhá má xúʼko̱ maʼngo̱o̱ marikhoo giñánʼ,ga̱jma̱a̱ maʼngo̱o̱ maguajtuun aceite ga̱jma̱a̱ ñawún mújúunʼ.
17 Xó má mbá ajua̱nʼ naríya̱a̱ʼ rawuunʼ i̱mba̱ ajua̱nʼ,xúʼko̱ má mbáa xa̱bu̱ nambáyúu bi̱ nambájxu̱u̱ ga̱jma̱a̱* mu mani̱ndxu̱u̱ itháan májáanʼ xa̱bu̱.+
18 Bi̱ nañewu̱u̱n ixi̱ higo, mi̱khu̱ xndúu,+ga̱jma̱a̱ bi̱ nañewu̱u̱n patriúun, magruigú gamajkhu.+
19 Xó má índo̱ natanguaʼán náa iyaʼ, natayáá inaaʼ,xúʼko̱ má índo̱ natañún eʼwíinʼ, natayaminaʼ.
20 Iñá wajinʼ* ga̱jma̱a̱ náa dí naguma gámbáa* nditháan tségiʼmúún,+ga̱jma̱a̱ xúʼko̱ má xa̱bu̱ nagua̱ʼa̱ muguáʼdáá.
21 Aguʼ naʼni kaʼwu̱u̱ plata ga̱jma̱a̱ oro,+xúʼko̱ má gamajkhu dí nagruigú mbáa xa̱bu̱ nasngájma xóo nindxu̱u̱.
22 Maski ajndu mataxpíguii mbáa xa̱bu̱ skágunʼ ga̱jma̱a̱ mbá tsíjtuunxóo gáta̱nu̱ tsígáʼ náa xúbá rajkhúu,ikhaa maʼni skágui̱i̱nʼ má xúʼko̱.
23 Atayáá májánʼ xóo kúwá mugia̱a̱ʼ.
Atiewu̱u̱nʼ májánʼ* mugia̱a̱ʼ,+
24 numuu dí maraʼdáá xájyúuʼ asndu kámuu,+ni má mbá corona, xárígá asndu kámuu náa bi̱ maguwáʼ rakúwá.
25 Rajxa̱ maxaʼ naguámbáa ga̱jma̱a̱ nakráʼáan i̱ʼwáʼ,naxtagijxi̱i̱ iná dí rígá náa kúbá mu mu̱phu̱ xujkhúʼ.
26 Ma̱ndoo majmaaʼ mugu̱ún mugu̱ mu matani̱ xtíñaaʼ,ga̱jma̱a̱ ma̱ndoo matagujui̱i̱n chivátu* mu maratsi̱ mbá mbaaʼ.
27 Ga̱jma̱a̱ maraʼdáá mbaji̱ʼ yaʼdún tsujtiaan mu matatsiʼtsu ikháánga̱jma̱a̱ bi̱ kúwá náa guʼwáaʼ, ma̱ngaa mu mataxníʼtsún gu̱ʼu̱ bi̱ numbayáaʼ.
Mbaʼa nota
^ Náa ajngáa hebreo naʼthí, “xa̱bu̱ na̱ʼkha̱á”.
^ O “naxíyúu”.
^ O mbáa “nduwaaʼ”, “kitsudaa”.
^ Náa ajngáa hebreo naʼthí, “nakujmbiri̱go̱o̱”.
^ O “nagui̱i̱”.
^ O “tátiáaʼ”.
^ Náa ajngáa hebreo naʼthí, “bi̱ xtaa mijngii ga̱jma̱a̱ʼ”.
^ O “bi̱ naʼthá wéñuʼ”.
^ Náa ajngáa hebreo naʼthí, “naʼni tsajkurámaaʼ”.
^ Náa ajngáa hebreo naʼthí, “mbaʼyoo dí nutatsríguíi”.
^ O “maʼthá numa”.
^ Náa ajngáa hebreo naʼthí, “naʼnu̱u̱ inuu bi̱ nambájxu̱u̱ ga̱jma̱a̱”.
^ O “Abadón”.
^ O “Atajngawiin”.
^ O “tsu̱jtu e̱jmba̱a̱”.
