Proverbios 25:1-28
25 Rígi̱ ma̱ngaa nindxu̱u̱ proverbios dí niʼthí Salomón,+ dí niniraʼmáaʼ* xa̱bi̱i̱ Ezequías+ rey ndrígóo Judá.
2 Dios nagruigú gamajkhu, numuu dí rígá tikhuu rí ikhaa nagujxi̱ ngo̱ʼo̱o̱,+ga̱jma̱a̱ reyes nundrigú gamajkhu índo̱ naguánú nduyáá májánʼ xóo nindxu̱u̱ mbá xkujndu.
3 A̱jkiu̱ún reyes nindxu̱u̱ xóo mitsídánʼ mekhu,ga̱jma̱a̱ xóo mi̱jnu̱ʼ awúu̱n ku̱ba̱ʼ, nimbáa tséʼngo̱o̱ gákro̱ʼo̱o̱.
4 Índo̱ mbáa naʼni kaʼwi̱i̱ plata,ikhú plata naʼni̱i̱ xngiyaʼ.+
5 Atríya̱a̱ʼ xa̱bu̱ ra̱májáanʼ náa inuu rey,mu xúʼko̱ ikhaa maʼtáñajunʼ májánʼ.+
6 Xátani mbamínáʼ náa inuu rey+ga̱jma̱a̱ xáraxtaa náa majñu̱únʼ xa̱bu̱ bi̱ guáʼdáá numún,+
7 numuu rí itháan májánʼ dí rey maʼtháanʼ “Atatsimaaʼ gi̱i̱”
ki xóo dí matani̱ majtimínáʼ náa inuu mbáa bi̱ gíʼdoo numuu.+
8 Xáʼcha̱a̱ʼ mataxuʼdáminaʼ náa nuxruigamíjna̱ xa̱bu̱,ndiéjunʼ gátani̱ á mu xa̱bu̱ numbaaʼ ga̱jma̱a̱ʼ naʼni majti̱i̱nʼ rá.+
9 Atanimbaníí xkujndu dí xtaʼdáá ga̱jma̱a̱ʼ xa̱bu̱ numbaaʼ ga̱jma̱a̱ʼ,+mú xárata̱ dí nijuiʼtháanʼ dí xáʼyóoʼ má mudxawíín eʼwíinʼ,+
10 raʼkháa gáʼni dí bi̱ niʼdxawaanʼ maríya̱ʼ majkuaaʼga̱jma̱a̱ nándáa dí matani̱ mu xáwán ri̱go̱o̱ ajngáa raʼkhí dí niratá.
11 Ajngáa dí najuiʼthá índo̱ phú ndayóoʼ,nindxu̱u̱ xóo manzanas dí oro rí tuaʼán náa xua̱a̱ dí niguma ga̱jma̱a̱ plata.+
12 Xa̱bu̱ bi̱ najmuu ku̱ma̱ mu maxprígúu mbáa,nindxu̱u̱ xóo mbá xábí mitsaanʼ* dí niguma ga̱jma̱a̱ oro dí itháan májánʼ, náa bi̱ naʼdxawuun dí naxprígúu.+
13 Xa̱bu̱ jmbii bi̱ na̱jkha̱ kayóo ajngáa, nindxu̱u̱ xóo iyaʼ wéʼtsí dí naʼwa̱a̱n* náa mbiʼi dí nurajxi̱i̱ rí nidu,xúʼko̱ kaʼnii eyáá bi̱ nixuʼmaa maʼga,numuu dí ikhaa naʼni dí mbayáa tsiaki̱i̱ tátióo.+
14 Xa̱bu̱ bi̱ naʼnimbamínáʼ dí naxná regalo,* mú tséxná,+nindxu̱u̱ xóo du̱u̱n ga̱jma̱a̱ giñánʼ dí tséʼni maxnúu ruʼwa.
15 Á mu mbáa xa̱bu̱ naʼngo̱o̱ a̱jkiu̱u̱n, maʼngo̱o̱ maʼni dí mariʼkhu̱u̱ xóo endxa̱ʼwáminaʼ mbáa xa̱bu̱ ñajunʼ,ga̱jma̱a̱ mbá ajngáa wabaʼ maʼngo̱o̱ majkúmigaʼ mbá itsu̱.+
16 Á mu nataxkamaa jyááʼ, chíʼgíiʼ* gígíi̱n,numuu dí á mu nagi̱i̱n mba̱ji̱nʼ, mbáa marajxi̱ʼ gáʼni.+
17 Xádxúʼ nángi eʼni náa goʼwóo xa̱bu̱ numbaaʼ ga̱jma̱a̱ʼ,raʼkháa maʼskoo gátani̱ ga̱jma̱a̱ maʼga̱nú mawi̱yu̱u̱ʼ kaʼyaaʼ.
18 Xóo mbá ragóti rí najmaa náa nuxmijná, mbá espada ga̱jma̱a̱ mbá flecha dí xíníʼ inuu,xúʼko̱ kaʼnii nindxu̱u̱ xa̱bu̱ bi̱ naʼthí rí nduwaʼ ga̱jma̱a̱ numuu xa̱bu̱ numbaaʼ ga̱jma̱a̱.+
19 Xóo dí maraʼdáá mbá iñaaʼ dí niwiʼtá ga̱jma̱a̱ mbá rajkuáaʼ dí na̱ʼkhu̱,xúʼko̱ nindxu̱u̱ dí maku̱ma̱a̱ʼ xtayáá mbáa bi̱ rakáʼnii mambáyáaʼ* náa mbiʼi mingíjyúuʼ.
20 Nda̱a̱ rí gáyambáá dí mbáa maríya̱ʼ xtíñuu náa mbiʼi dí naʼni migúwán,o nda̱a̱ dí gáyambáá dí mbáa maguxiʼñáʼ vino miga̱ʼ náa carbonato,*ga̱jma̱a̱ xúʼko̱ má nda̱a̱ dí gáyambáá dí mbáa maʼni ajmúú mu maʼdxuu bi̱ xtáa ngíná.+
21 Á mu xa̱bu̱ bi̱ gíʼdáán sia̱nʼ* naxkidxu̱u̱, araxnáá dí mi̱khu̱,ga̱jma̱a̱ á mu nakándawuuʼ, araxnáá iyaʼ maga̱a̱n,+
22 á mu xúʼko̱ etani̱ matadrámáʼ chámbuʼ mijkha náa edxu̱u̱,*+ga̱jma̱a̱ Jeobá maʼni tsajkurámáánʼ.
23 Giñánʼ dí na̱ʼkha̱ xígií náa norte na̱ʼkha̱ kayóo mbá ruʼwambiʼ,ga̱jma̱a̱ bi̱ naʼni xtujtaa naʼni dí eʼwíinʼ makiʼníin.+
24 Itháan má májánʼ dí maraxtaa náa eskíniu̱u̱ tsu̱du̱u̱ guʼwáaʼ,ki xóo dí maraxtaa awúu̱n guʼwáaʼ ga̱jma̱a̱ʼ a̱ʼgia̱a̱ʼ bi̱ naxiéʼkhá* má xúʼko̱.+
25 Xóo iyaʼ wéʼtsí rí naʼga̱a̱n mbáa bi̱ néʼngo̱o̱,xúʼko̱ nindxu̱u̱ mbá ajngáa májánʼ dí na̱ʼkha̱ náa mbá ku̱ba̱ʼ mitsínguánʼ.+
26 Xóo mbá iduu iyaʼ dí tsaga ga̱jma̱a̱ mbá puzu dí niguma gachíí,xúʼko̱ kaʼnii nindxu̱u̱ xa̱bu̱ májáanʼ bi̱ namíñuu* kaʼyoo xa̱bu̱ ra̱májáanʼ.
27 Ra̱májánʼ dí migi̱i̱n mba̱ji̱nʼ jyááʼ,+ni má dí mbáa xa̱bu̱ mbayáʼ magruigú gamajkhu i̱ndó ikhaa.+
28 Mbáa xa̱bu̱ bi̱ tséñawu̱u̱n rí naʼni,*nindxu̱u̱ xóo mbá xuajin dí niguma gámbáa xtájtsí dí kúgumaʼá ga̱jma̱a̱.+
Mbaʼa nota
^ O “niniri̱ya̱a̱ʼ”.
^ O “nagui̱i̱”.
^ Náa ajngáa hebreo naʼthí, “xóo wéʼtsí idiʼ”.
^ Náa ajngáa hebreo naʼthí, “ga̱jma̱a̱ mbá regalo nduwaʼ”.
^ O “lajuíin”.
^ O mbáa “bi̱ naʼni nduwaʼ”.
^ O “álcali”.
^ Náa ajngáa hebreo naʼthí, “bi̱ nawi̱yu̱u̱ʼ kaʼyaaʼ”.
^ Xóo muʼthá, matani̱ rí maguabaaʼ a̱jkiu̱u̱n xa̱bu̱.
^ O “naʼthá numa”.
^ Náa ajngáa hebreo naʼthí, “naguáʼáan”.
^ O “tséʼngo̱o̱ gárikoo xóo nindxu̱u̱”.
