Proverbios 12:1-28
12 Bi̱ nanigu̱u̱ʼ rí nuxpriguíí ra’khá tháán eyoo majmañuu,*+mú bi̱ tséʼdxuun maratha̱a̱n* tsénigu̱u̱ʼ rí muxpriguíí.+
2 Jeobá nandoo kaʼyoo xa̱bu̱ májáanʼ,mú tsíyoo gáʼyoo xa̱bu̱ bi̱ naguwíi awan maʼni dí ra̱májánʼ.+
3 Nimbáa xa̱bu̱ xákríya̱a̱ʼ á mu naʼni dí ra̱májánʼ,+mú xa̱bu̱ májáanʼ manindxu̱u̱ xóo mbá ixi̱ rí xándoo maxtuburiya̱ʼ.
4 Mbáa a̱ʼgu̱ bi̱ májáanʼ nindxu̱u̱ xóo mbá corona dí grígu edxu̱u̱ ajmbio̱o̱,*+mú a̱ʼgu̱ bi̱ naríya̱ʼ majkhuu a̱jmbio̱o̱ nindxu̱u̱ xóo mbá nandii rí naʼni mi̱ga itsu̱.+
5 Rí nundxa̱ʼwa̱míjna̱ xa̱bu̱ míjíinʼ nindxu̱u̱ májánʼ,mú consejo rí nuxna xa̱bu̱ ra̱míjíinʼ nindxu̱u̱ nduwaʼ.
6 Rí nuthi xa̱bu̱ ra̱míjíinʼ nindxu̱u̱ xóo mbáa xa̱bu̱ sia̱nʼ bi̱ nagi̱ʼthu̱u̱n maxíyáa mbáa,*+mú dí nuthi xa̱bu̱ míjíinʼ nambáñún mu maʼni káwíin náa gamíi.+
7 Índo̱ gáguma gámbíin xa̱bu̱ ra̱míjíinʼ, ni xákúwíin,mú guʼwún xa̱bu̱ míjíinʼ marigá má xúʼko̱.+
8 Xa̱bu̱ bi̱ nañewu̱u̱n rí naʼthí nduyamajkuíí,+mú xa̱bu̱ bi̱ xkawi̱ʼ a̱jkiu̱u̱n tséyamajkuíí.+
9 Itháán májánʼ dí maʼni gínán, mú maraʼdaa mbáa bi̱ mambáyáaʼ,ki xóo rí matanimbamínáʼ rí xtaʼdáá wéñuuʼ ga̱jma̱a̱ nda̱a̱ rí miʼtsu.*+
10 Xa̱bu̱ májáanʼ nañewu̱u̱n xujkiúu,+mú xa̱bu̱ ra̱májáanʼ nakumu̱u̱ dí nagáwíinʼ a̱jkiu̱u̱n, mú na̱nguá.
11 Bi̱ naʼdu náa mbayuuʼ, magiʼdoo dí mi̱khu̱ asndu magiʼmuu,+mú nda̱a̱ a̱jkiu̱u̱n bi̱ ndayáʼ magiʼdoo rí nda̱a̱ numuu.
12 Xa̱bu̱ ra̱májáanʼ naxígúu eʼni rí eʼwíinʼ xa̱bu̱ ra̱míjíinʼ niʼngu̱u̱n ndiyáʼ,mú xa̱bu̱ májáanʼ nindxu̱u̱ xóo ixi̱ dí naxkuaʼán mi̱jnu̱ʼ ajmu̱u̱ rí naxná májánʼ xndúu.
13 Ga̱jma̱a̱ numuu dí tséñawu̱u̱n rawuunʼ xa̱bu̱ ra̱májáanʼ nakudaminaʼ mbaʼa xkujndu,+mú xa̱bu̱ májáanʼ naʼni kríyaminaʼ náa gamiéjunʼ.
14 Dí naʼthí mbáa xa̱bu̱ ma̱ndoo magajnúu májánʼ rí naʼni,+mada̱a̱ʼ ga̱jma̱a̱ numuu rí naʼni.
15 Xa̱bu̱ skágunʼ naku̱mu̱u̱ dí májánʼ má rí naʼni,+mú xa̱bu̱ bi̱ najmañuu nagruigú consejo dí nuxnáá.+
16 Xa̱bu̱ skágunʼ mbá nacha̱ esngájma dí nakiʼnáa,+mú xa̱bu̱ bi̱ nandxa̱ʼóo májánʼ edxu̱u̱ tségíʼ edxu̱u̱ maʼdxawuun* dí nutawéñííʼ.
17 Testigo jmbii naʼthí dí gajkhun,*mú testigo nduwaaʼ tséʼthí dí gajkhun.
18 Ajngáa rí nuthi bi̱ tséndxa̱ʼwa̱a̱ edxu̱ún nindxu̱u̱ xóo rí maʼni gawáanʼ espada,mú ajngáa rí nuthi xa̱bu̱ bi̱ najmañún naʼni̱i̱ náa nigawáanʼ.+
19 Ajngáa rí gajkhun dí nuthi xa̱bu̱ míjíinʼ mbajyúuʼ asndu kámuu,+mú ajngáa rí minduwaʼ, kááʼ mbá xngaa gágajyúuʼ.+
20 Rí nduwaʼ rígá náa a̱jkiu̱ún bi̱ nuriyaʼ awan muni̱ dí ra̱májánʼ,mú bi̱ nuni̱ marigá* dí tsímáá kúwá gagi.+
21 Nimbá nda̱a̱ dí gáʼni mamínuuʼ xa̱bu̱ májáanʼ,+mú xa̱bu̱ ra̱májáanʼ ra̱ʼkhá tháán gámínuuʼ.+
22 Jeobá nawi̱yu̱u̱ʼ kaʼñún bi̱ nuni̱ nduwaʼ,+mú bi̱ naguájún jmbu nuni̱ rí maʼdxuu.
23 Xa̱bu̱ bi̱ nandxa̱ʼóo májánʼ edxu̱u̱ tséʼthi mbaʼ maʼthíí rí najmañuu,mú xa̱bu̱ skágunʼ tséndxa̱ʼóo edxu̱u̱, mbaʼ naʼthíí.+
24 Bi̱ tséskhúún muñajunʼ, mutañajunʼ,+mú bi̱ naskhúún, muxtumiin muñajunʼ gakhi̱i̱.+
25 Rí naxmiéjuunʼ xa̱bu̱ naʼni rí maxtáa ngíná,+mú mbá ajngáa rí májánʼ naxnáa tsiaki̱i̱.+
26 Xa̱bu̱ májáanʼ naraʼwíí mbaaʼ náa rígá májánʼ ra̱jxa̱,mú kamba̱a̱ náa nagún xa̱bu̱ ra̱míjíinʼ naʼni dí magajnúriñu̱u̱nʼ.
27 Bi̱ naskoo tségájnuu gáyáaʼ xujkhúʼ mu mikhu̱u̱,+mú bi̱ nañajunʼ nindxu̱u̱ xóo mbá dí ra̱ʼkhá tháán gíʼdoo numuu dí ikhaa gíʼdoo.
28 Rí matani̱ dí májánʼ maʼni dí maraxtaa,+xáʼga̱ kañáán makhañáaʼ.
Mbaʼa nota
^ O “skágui̱i̱nʼ”.
^ Náa ajngáa hebreo naʼthí, “nandoo kaʼyoo ku̱ma̱”.
^ O “jmba̱yi̱i̱”.
^ Náa ajngáa hebreo naʼthí, “narkaʼwuminaʼ mu maxídíí eʼdi”.
^ Náa ajngáa hebreo naʼthí, “pan”.
^ Náa ajngáa hebreo naʼthí, “narugoo”.
^ Náa ajngáa hebreo naʼthí, “májánʼ”.
^ Náa ajngáa hebreo naʼthí, “bi̱ nuxna consejo”.
