Proverbios 28:1-28

  • Dí naʼtájkháan bi̱ tsíyoo gáʼnimbo̱o̱ tséjmaa mbá kayuuʼ (9)

  • Dios magáwíinʼ a̱jkiu̱u̱n kaʼyoo bi̱ naʼthí aʼkhá rí niʼni (13)

  • “Bi̱ ra̱ʼkhá tháán eyoo magiʼdoo mbá nacha̱, magiʼdoo aʼkhúun rí naʼni dí ra̱májánʼ” (20)

  • Dí mataxpríguíí mbáa nindxu̱u̱ itháán májánʼ, ki xóo dí mbaʼ maratha̱án dí májánʼ eʼni (23)

  • Bi̱ naxná rí gíʼdoo, nda̱a̱ rí gáʼyóoʼ (27)

28  Xa̱bu̱ ra̱míjíinʼ nangujuíin ragáñúún índo̱ ndawa̱a̱ tsáa exkhúún,mú xa̱bu̱ míjíinʼ tsémíñún xóo mbáa león.*+  2  Índo̱ xa̱bu̱ xuajin nanújngurámún xtángoo, nángi eʼni extiʼkuwíin príncipes,+mú príncipe* maxtáa raʼtáñajunʼ mba̱yu̱u̱ʼ, á mu nambáyúu mbáa xa̱bu̱ bi̱ nakro̱ʼo̱o̱ ga̱jma̱a̱ bi̱ gíʼdoo ku̱ma̱.+  3  Xa̱bu̱ ngínáa bi̱ naʼni ngíníin bi̱ ndawa̱a̱ tsáa mambáñún,+nindxu̱u̱ xóo ruʼwa dí naʼni gámbáa xúgíʼ ganitsu.  4  Bi̱ nuniña̱a̱nʼ runimbaníí xtángoo nuni̱ mba̱a̱ xa̱bu̱ ra̱májáanʼ,mú bi̱ nunimbu̱u̱n xtángoo, tsénigu̱u̱nʼ xóo eni̱ ikhiin.+  5  Xa̱bu̱ ra̱míjíinʼ tséʼngu̱u̱n gákru̱ʼu̱u̱n rí májánʼ,mú bi̱ nduyáaʼ Jeobá naʼngu̱u̱n nakru̱ʼu̱u̱n xúgíʼ.+  6  Itháan májánʼ dí mbáa xa̱bu̱ ngínáa bi̱ naʼni rí májánʼ,*ki xóo mbáa xa̱bu̱ bi̱ ra̱ʼkhá tháán gíʼdoo bi̱ naʼni nduwaʼ.+  7  Ada̱ bi̱ nakro̱ʼo̱o̱, naʼnimbo̱o̱ dí naʼthí náa xtángoo,mú bi̱ nambájxu̱u̱ gajmíi̱n bi̱ nuphiʼtsu egún, naríyaʼ majkhuu anu̱u̱.*+  8  Bi̱ naʼni mbajoo dí gíʼdoo ga̱jma̱a̱ numuu dí naruma̱a̱ inuu,+ ma̱ngaa naʼni dí ra̱májánʼ mu maʼga̱nú magiʼdoo,nagujxi̱i̱ mu majmuu bi̱ nagáwíinʼ a̱jkiu̱u̱n kaʼñún xa̱bu̱ ngíníin.+  9  Á mu mbáa tsíyoo gáʼnimbo̱o̱ xtángoo,asndu dí naʼtájkháan tséjmaa mbá kayuuʼ.+ 10  Bi̱ naʼni dí magajnúríñu̱u̱nʼ xa̱bu̱ míjíinʼ mu magún náa kamba̱a̱ dí ra̱májánʼ, ikhaa má gámínuuʼ ga̱jma̱a̱ dí ra̱májánʼ rí naʼni,+mú bi̱ nda̱a̱ aʼkhúún mudrigúu rí májánʼ.+ 11  Xa̱bu̱ bi̱ gíʼdoo ra̱ʼkhá tháán ejmañuu eʼyoo ikhaa,+mú xa̱bu̱ ngínáa bi̱ nakro̱ʼo̱o̱, ndaʼyoo gajkhun xóo phú nindxu̱u̱.+ 12  Índo̱ xa̱bu̱ míjíinʼ kúwá májánʼ, rígá gagi,*mú índo̱ xa̱bu̱ ra̱míjíinʼ naguánú nutañajunʼ, xa̱bu̱ nagáñún mu murkaʼwumijná.+ 13  Bi̱ narkaʼwumuʼúun aʼkhá dí niʼni, xáxtáa májánʼ,+mú bi̱ naʼthí aʼkhá rí niʼni ga̱jma̱a̱ naniñuuʼ raʼni, Dios magáwíinʼ a̱jkiu̱u̱n kaʼyoo.+ 14  Xa̱bu̱ bi̱ nañewu̱u̱n má xúʼko̱ rí naʼni,* xtáa gagi,mú xa̱bu̱ bi̱ tséʼdxuun dí maratha̱a̱n* mamínuuʼ.+ 15  Xóo mbáa león bi̱ nandxa̱ʼwá ga̱jma̱a̱ mbáa oso bi̱ najmangu̱u̱ʼ,xúʼko̱ nindxu̱u̱ xa̱bu̱ ra̱májáanʼ bi̱ naʼtáñajúúnʼ bi̱ ndawa̱a̱ tsáá mambáñún.+ 16  Bi̱ kayá edxu̱u̱ bi̱ tsékro̱ʼo̱o̱ najmuu ñajunʼ ndrígóo mu maʼni ngíníi eʼwíinʼ,+mú bi̱ naʼni gaʼduunʼ magruigú dí makhánáá ga̱jma̱a̱ numuu dí minduwaʼ, maxtáa mba̱yu̱u̱ʼ.+ 17  Xa̱bu̱ bi̱ naʼni gawúunʼ ku̱ma̱ ndrígóo ga̱jma̱a̱ numuu dí nixídíí eʼdi ma̱ngaa dí nixíyáa mbáa xa̱bu̱, majngruigo̱o̱ ragáyúu asndu índo̱ gáʼgáa náa iñá wajinʼ.+ ¡Nimbáa xámbáyúu! 18  Makríya̱a̱ʼ xa̱bu̱ bi̱ ragíʼdoo aʼkhúun,+mú bi̱ naʼni má xúʼko̱ dí ra̱májánʼ nda̱a̱ tsu̱ma̱ gáʼkha̱ rí maʼni mamínuuʼ.+ 19  Bi̱ naʼdu náa mbayuuʼ magiʼdoo dí mi̱khu̱ asndu mapidúún’,mú bi̱ ndayáʼ dí ragíʼdoo numuu maʼskoo gáʼni rí migínáa.+ 20  Ra̱ʼkhá tháán mba̱a̱ gáguma tsajkurámaaʼ xa̱bu̱ jmbii,+mú bi̱ ra̱ʼkhá tháán eyoo magiʼdoo mbá nacha̱, magiʼdoo aʼkhúun rí naʼni dí ra̱májánʼ.+ 21  Raʼkhí nindxu̱u̱ dí mbáa maraʼwíin xa̱bu̱ mu maʼniún dí májánʼ,+mú mbáa ma̱ndoo maʼni dí ra̱májánʼ mu makhánáá rí mi̱khu̱. 22  Xa̱bu̱ bi̱ naxígúu ra̱ʼkhá tháán eyoo dí magiʼdoorí asndu tséʼyoo dí nda̱a̱ má rí gáʼga̱nú magiʼdoo. 23  Bi̱ naxprígúu mbáa xa̱bu̱,+ nda̱wa̱á maʼndún kuyáá itháan ikhaa+ki xóo mbáa bi̱ najmuu raju̱u̱n mu mbaʼ maʼthúún eʼwíinʼ rí májánʼ eni̱. 24  Bi̱ naʼni kúwóoʼ anu̱u̱ ga̱jma̱a̱ ru̱dúu̱,* naʼthí “Na̱nguá má raʼkhí nindxu̱u̱”+ nambájxu̱u̱ ga̱jma̱a̱ xa̱bu̱ bi̱ naʼni gámbóo.+ 25  Xa̱bu̱ bi̱ ra̱ʼkhá tháán egua̱ʼa̱ magiʼdoo* naʼni dí magi̱ʼdu̱u̱n xa̱bu̱,mú bi̱ naku̱mu̱u̱ kaʼyoo Jeobá maʼga̱nú magiʼdoo.*+ 26  Bi̱ naku̱mu̱u̱ kaʼyaminaʼ* nindxu̱u̱ xa̱bu̱ skágunʼ,+mú bi̱ naʼni xó má najmañuu, maguma kríya̱a̱ʼ.+ 27  Bi̱ naxnúu rí gíʼdoo xa̱bu̱ ngínáa nda̱a̱ rí gáʼyóoʼ,+mú bi̱ asndu xóo tséʼyoo eʼni xa̱bu̱ ngínáa, majuiʼtátsríguíi. 28  Índo̱ xa̱bu̱ ra̱míjíinʼ naguánú nutañajunʼ, xa̱bekha nurkaʼwumijná,mú índo̱ ikhiin gáguma gámbíin, maʼni mbaʼin xa̱bu̱ míjíinʼ.+

Mbaʼa nota

^ O “león bi̱ gíʼdoo xtátsiu̱u̱n náa aphuu”.
^ Náa ajngáa hebreo naʼthí, “ikhaa”.
^ Náa ajngáa hebreo naʼthí, “bi̱ najngrui̱go̱o̱ májánʼ”.
^ O “tátée”.
^ O “gamajkhu”.
^ Náa ajngáa hebreo naʼthí, “bi̱ naʼni gújkhúʼ a̱jkiu̱u̱n”.
^ O “gíʼdoo gamíi”.
^ O “nánée”.
^ O mbáa “naʼnimbamínáʼ”.
^ Náa ajngáa hebreo naʼthí, “maʼni mba̱a̱”.
^ Náa ajngáa hebreo naʼthí, “Bi̱ naku̱mu̱u̱ kaʼyoo a̱jkiu̱u̱n”.

Copyrights ndrígóo i̱yi̱i̱ʼ rígi̱