Në fillim të vitit 1925, vëlla Xhorxh Jangu mbërriti në Portugali dhe filloi t’u fliste të tjerëve për mesazhin e Biblës. Kjo ishte mundësia e parë për shumë veta në atë vend që të dëgjonin lajmin e mirë. Pak pas kësaj, më 13 maj, vëllai Xhozef Radhërford mbajti një fjalim të bazuar në Bibël me titull «Si të jetosh përgjithmonë në tokë». Në përgjigje të njoftimit që u dha në një gazetë lokale, rreth 2.000 veta u mblodhën në auditorin e shkollës së mesme «Luís de Camões», në Lisbonë, për të dëgjuar fjalimin e vëllait Radhërford. Afro 2.000 të tjerëve iu desh të largoheshin, sepse në auditor nuk kishte më vende. Ky event zgjoi interesin e shumë vetave për Biblën dhe i shtyu t’i shërbenin Jehovait. Vlen të përmendet se, më vonë po atë vit, u botua numri i parë i revistës Kulla e Rojës në gjuhën portugeze (Portugali) dhe u hap një zyrë dege në Lisbonë. Megjithatë, vëllezërit atje shpejt do të përballeshin me kohë të vështira.

Në vitin 1926, në Portugali erdhi në fuqi një qeveri e re diktatoriale. Qeveria i kundërshtonte vazhdimisht përpjekjet e degës për të marrë njohjen ligjore për veprën e predikimit dhe të mësimdhënies. Prapëseprapë, motrat e vëllezërit tanë u flitnin me guxim të tjerëve për lajmin e mirë. Pastaj, në mars të vitit 1961, situata u përkeqësua. Pas një kryengritjeje politike në Angolë, që asokohe ishte koloni portugeze, vëllezërit tanë të rinj në Portugali u përballën me përndjekje të egër për shkak të asnjanësisë së krishterë. Shumë i arrestuan dhe i keqtrajtuan ngaqë refuzonin të shkonin ushtarë për shkak të ndërgjegjes. Duke kthyer kokën pas, vëllai David Mota, i cili qëndroi besnik me gjithë kushtet e këqija kur ishte në burg për shkak të asnjanësisë, tha: «Pavarësisht nga keqtrajtimi i padrejtë që hasa për shkak të bindjeve të mia, të qenit pjesë e organizatës së Jehovait i ka dhënë kuptim dhe lumturi jetës sime.»

Më në fund, më 1974, qeveria portugeze u dha njohjen ligjore Dëshmitarëve të Jehovait, dhe kjo u solli më shumë liri vëllezërve tanë për të shpallur mesazhin e Biblës. Pastaj, më 22 qershor 2009, qeveria i njohu Dëshmitarët e Jehovait si një komunitet i vjetër fetar dhe u dha statusin më të lartë ligjor që mund t’i jepet një feje në Portugali. Vëllai ynë 75-vjeçar Karlos Heisha kujton: «Ka qenë e mrekullueshme të shohësh si është rritur vepra në Portugali. Në vitin 1961, këtu kishte rreth 1.000 lajmëtarë. Kurse sot, ka më shumë se 57.000.»

E themi me plot bindje se Jehovai është kujdesur me dashuri për motrat e vëllezërit në Portugali gjatë këtyre 100 viteve, duke vërtetuar kështu se asgjë s’e pengon dot ‘ta zgjerojë vendin e tendës së tij’.—Isaia 54:2.