එළිදරව් පොතට ග්‍රීක භාෂාවෙන් කියන්නේ “අපොකලිප්සිස්” (A·po·kaʹly·psis) කියලයි. ඒ නමේ තේරුම “නිරාවරණය” හෝ “හෙළි කිරීම” යන්නයි. සැඟවුණු දේවල් නිරාවරණය කරනවා කියන එක සහ හුඟක් කාලෙකට කලින් ලියපු අනාවැකි ඉටු වෙන විදිහ හෙළි කරනවා කියන එක ඒකෙන් ඇඟවෙනවා. ඒකේ සඳහන් කරලා තියෙන අනාවැකි බොහොමයක් ඉටු වෙන්නේ ඉදිරි අනාගතයේදියි.

එළිදරව් පොත ගැන කෙටියෙන් සලකා බලමු

•   හැඳින්වීම.—එළිදරව් 1:1-9.

•   සභා හතට යේසුස්ගෙන් පණිවිඩ.—එළිදරව් 1:10–3:22.

•   යෙහෝවා දෙවියන්ගේ සිංහාසනයේ දර්ශනයක්.—එළිදරව් 4:1-11.

•   දර්ශන කිහිපයක් අනුපිළිවෙළට:

  •   මුද්‍රා හත.—එළිදරව් 5:1–8:6.

  •   හොරණෑ හත, අන්තිම තුනෙන් විපත් තුනක් ගැන හෙළි කරයි.—එළිදරව් 8:7–14:20.

  •   බඳුන් හත, එක් එක් බඳුනේ ඇති පීඩාවලින් ඇඟවෙන්නේ දෙවි පොළොව මතට ගෙනෙන විනිශ්චයයි.—එළිදරව් 15:1–16:21.

  •   දෙවියන්ගේ සතුරන්ට අත් වෙන විනාශය ගැන දර්ශන.—එළිදරව් 17:1–20:10.

  •   ස්වර්ගයට හා පොළොවට දෙවියන් ගෙනෙන ආශීර්වාද ගැන දර්ශන.—එළිදරව් 20:11–22:5.

•   අවසානය.—එළිදරව් 22:6-21.

එළිදරව් පොත තේරුම්ගන්න උපකාරවත් වෙන කරුණු

1.   “අපොකලිප්සිස්” කියන වචනය සමහරු ලෝක විනාශයක් සමඟ සම්බන්ධ කරලා තියෙන නිසා එළිදරව් පොතේ නම ඇහෙද්දිම හුඟදෙනෙක් බය වෙනවා. ඒත් එළිදරව් පොත පටන්ගන්නෙත් අවසන් වෙන්නෙත් ‘එහි පණිවිඩය කියවලා, තේරුම්ගෙන, පිළිපදින අය සන්තෝෂවත්’ කියලයි. (එළිදරව් 1:3; 22:7) ඒ නිසා ඒකේ තියෙන පණිවිඩය යෙහෝවා දෙවියන්ගේ සේවකයන් තුළ නම් බයක් ඇති කරන්නේ නැහැ.

2.   එළිදරව් පොතේ හුඟක් දේවල් ලියලා තියෙන්නේ සංකේත යොදාගෙන නිසා ඒවා වචනානුසාරයෙන්ම තේරුම්ගන්න උත්සාහ කරන්න එපා.—එළිදරව් 1:1.

3.   එළිදරව් පොතේ තියෙන සංකේත හා වැදගත් කරුණු ගැන බයිබලයේ වෙනත් පොත්වලත් සඳහන් කරලා තියෙනවා.

   •   ස්වර්ගයේ ඉන්න ‘සැබෑ දෙවියන්’ සහ සියල්ලේ නිර්මාතෘ යෙහෝවා දෙවියි.—ද්විතීය කතාව 4:39; ගීතාවලිය 103:19; එළිදරව් 4:11; 15:3.

   •   යේසුස් ක්‍රිස්තුස් “දෙවිගේ බැටළු පැටවායි.”—යොහන් 1:29; එළිදරව් 5:6; 14:1.

   •   සාතන් නමැති යක්ෂයා දෙවියන්ගේ විරුද්ධකාරයායි.—උත්පත්ති 3:14, 15; යොහන් 8:44; එළිදරව් 12:9.

   •   පුරාණ බැබිලෝනිය වගේ මහ බැබිලෝනියත් යෙහෝවා දෙවියන්ටත් ඔහුගේ සෙනඟටත් සතුරෙක් වන අතර බොරු ඉගැන්වීම්වල මූලාරම්භයයි.—උත්පත්ති 11:2-9; යෙසායා 13:1, 11; එළිදරව් 17:4-6; 18:4, 20.

   •   “මුහුද” දෙවියන්ට විරුද්ධ වෙන දුෂ්ට මිනිස් සමාජයයි.—යෙසායා 57:20; එළිදරව් 13:1; 21:1.

   •   දෙවියන්ට නමස්කාර කරන්න යොදාගත්ත පුරාණ ශුද්ධ කූඩාරමේ තිබුණු ගිවිසුම් පෙට්ටිය, වීදුරු මෙන් පැහැදිලි මුහුද (පවිත්‍ර වීම සඳහා වතුර භාජනය), පහන්, සුවඳ ද්‍රව්‍ය, පූජා ඔප්පු කරන පූජාසනය වගේ දේවල් එළිදරව් පොතෙත් සඳහන් වෙනවා.—නික්මයාම 25:10, 17, 18; 40:24-32; එළිදරව් 4:5, 6; 5:8; 8:3; 11:19.

   •   මෘගයන්ගෙන් සංකේතවත් වෙන්නේ දේශපාලන ආණ්ඩුක්‍රමයි.—දානියෙල් 7:1-8, 17-26; එළිදරව් 13:2, 11; 17:3.

   •   විවිධ ඉලක්කම්වලට සංකේතවත් තේරුමක් තියෙනවා.—එළිදරව් 1:20; 8:13; 13:18; 21:16.

4.   දර්ශන අදාළ වෙන්නේ ‘ස්වාමීන්ගේ දවසටයි.’ ඒ දවස ආරම්භ වුණේ 1914දී දේවරාජ්‍යය පිහිටුවලා යේසුස් රජු හැටියට එහි පාලනය ඇරඹීමත් සමඟයි. (එළිදරව් 1:10) ඒ නිසා එළිදරව් පොතේ සඳහන් දේවල ප්‍රධාන ඉටුවීම අපේ කාලයේ සිද්ධ වෙයි කියලා බලාපොරොත්තු වෙන්න පුළුවන්.

5.   එළිදරව් පොතේ තියෙන තොරතුරු තේරුම්ගන්න බයිබලයේ අනිත් පොත් තේරුම්ගන්න උපකාර වෙන දේවල්ම අවශ්‍යයි. ඒවාට දෙවියන්ගේ ප්‍රඥාවත් දැනටමත් ඒවා තේරුම් අරගෙන ඉන්න අයගේ උපකාරයත් ඇතුළත් වෙනවා.—ක්‍රියා 8:26-39; යාකොබ් 1:5.