යෙසායා 13:1-22

13  බැබිලෝනියට විරුද්ධව දුන් තීන්දුව+ ගැන ආමොෂ්ගේ+ පුත් යෙසායාට ලැබුණු දර්ශනය මෙයයි.  “ජනයෙනි, පාළු පර්වතයක් මත කොඩියක් සිටුවන්න.+ අතින් සංඥා කර+ ඔවුන්ව කැඳවන්න. ඔවුන්ට හඬගසා උත්තමයන්ගේ දොරකඩින් ඇතුල් වෙන්න කියා පවසන්න.+  මගේ උදහස ප්‍රකාශ කරන පිණිස මම මගේ බලවන්තයන්ව කැඳවාගතිමි.+ මා තෝරාගත් සටන්කරුවන්ට* නියෝගය දුන්නෙමි.+ ඔවුහු ප්‍රීතියෙන් ඉපිල යති.  සවන් දෙන්න! කඳුකරය දෙසින් සමූහයකගේ හඬ ඇසෙයි. ඔවුන්ගේ හඬ මහත් සමූහයක් නඟන හඬ මෙනි.+ සවන් දෙන්න! එකට එක් රැස් කරනු ලැබූ ජාතීහුද රාජ්‍යයන්ද එක්ව හඬ නඟති!+ ස්වර්ගයේ සේනාවල අධිපති වන යෙහෝවා නම් වූ මම සේනාව සටනට සූදානම් කරමි.+  ඒ සේනාව දුර බැහැර දේශයකින් පැමිණෙන්නෝය.+ ක්ෂිතිජය පෙනෙන දිශාවෙන් ඔවුහු එන්නෝය. මගේ උදහස ප්‍රකාශ කිරීමට ආයුධයක් මෙන් යොදාගන්නා ඒ සෙනඟ සමඟ යෙහෝවා දෙවි වන මම පැමිණ මුළු දේශයටම පහර දෙන්නෙමි.+  “ජනයෙනි, විලාප නඟන්න.+ මන්ද යෙහෝවා දෙවි වන මාගේ දවස ළඟය!+ සියලු බලැති තැනැත්තා වන මා මහත් විනාශයක් සිදු කරන එම දවස නිසැකවම පැමිණෙන්නේය.+  එදාට සියල්ලෝම කිසිවක් කරකියාගත නොහැකිව භයෙන් වෙවුලන්නෝය.+  ජනයා කැලඹීමට පත් වන්නෝය.+ ඔවුහු මහත් වේදනාද සිත්තැවුල්ද අද්දකින්නෝය. ස්ත්‍රියකට ඇති වන ප්‍රසව වේදනාව මෙන් දරුණු වේදනා විඳින්නෝය.+ එකිනෙකා දෙස භයෙනුත් පුදුමයෙනුත් බලා සිටින ඔවුන්ගේ මුහුණු සුදුමැලි වී ඇත.+  “යෙහෝවා දෙවි වන මාගේ දවස පැමිණෙන්නේය. මාගේ දැවෙන උදහස වගුරුවන එම දවස ඉතා භයානකය. මම දේශයේ පව්කාරයන්ව සහමුලින්ම නැති කර දමන්නෙමි.+ දේශයට සිදු වන විනාශය මොන තරම්ද කිවහොත් මිනිස්සු කට ඇර පුදුමයෙන් ඒ දෙස බලා සිටිති.+ 10  ඒ දවසේදී අහසේ තාරකාවත් එහි තාරකා මණ්ඩලවත්*+ බැබළෙන්නේ නැත. ඉර පායද්දීම එය අඳුරු වෙයි. සඳද එළිය නොදෙයි. 11  දේශයේ වැසියන් කළ දුෂ්ටකම්වලට මම නිසි දඬුවම් දෙමි.+ දුෂ්ටයෝ තමන් කළ වැරදිවලට දඬුවම් විඳිනු ඇත. අහංකාර අයගේ උඩඟුකමත් කුරිරු පාලකයන්ගේ උඩඟුකමත් මම පහ කර දමමි.+ 12  ඒ කාලයේදී මිනිසුන්ව සොයාගැනීම, ඕෆීර් දේශයේ අනර්ඝ රන්+ සොයාගැනීමටත් වඩා දුෂ්කර වෙයි.+ 13  ස්වර්ගයේ සේනාවල අධිපති වූ යෙහෝවා දෙවි වන මාගේ දැවෙන කෝපය ප්‍රකාශ කරන දවසේදී+ අහස පවා කම්පා වෙයි.+ මාගේ උදහස නිසා පොළොවද සෙලවී යන්නේය.+ 14  එවිට, පන්නා දැමූ මුවදෙනක මෙන්ද විසිරී ගිය බැටළු රැළක් මෙන්ද+ ඔවුහු එක් එක් කෙනා තම තමන්ගේ දේශයටත් තම තමන්ගේ සෙනඟ වෙතටත් හැරී යනු ඇත.+ 15  දේශයේ ඉතුරුව සිටින අයද දේශයෙන් පලා යන අයද යන දෙපිරිසම කඩුවෙන් මැරුම් කන්නෝය.+ 16  ඔවුන් බලා සිටියදීම සතුරෝ ඔවුන්ගේ දරුවන්ව පොළොවේ ගසා මරා දමති.+ ඔවුන්ගේ ගෙවල් කොල්ල කා ඔවුන්ගේ භාර්යාවන්ව දූෂණය කරති.+ 17  “ඔවුන්ට විරුද්ධව නැඟී සිටීමට මම මේදිය ජාතිකයන්ව පොලඹවන්නෙමි.+ ඔවුහු රිදීවලටවත් රන්වලටවත් ආශා නොකරති. 18  ඔවුන් විදින ඊතල නිසා තරුණයෝ මැරී වැටෙති.+ දරුවන්ටවත් බිලිඳුන්ටවත් ඔවුහු අනුකම්පා නොකරති.+ 19  අන් සියලු රාජ්‍යයන්ට වඩා අලංකාර වූ,+ කල්දිවරුන්ගේ මහත් ආඩම්බරයට හේතු වූ+ ඔවුන්ගේ තේජස වන බැබිලෝනියට සිදු වන්නේ මා සොදොම් සහ ගොමෝරාව+ යන නුවරවලට සිදු කළ දේමයි. 20  නැවත කෙදිනකවත් කිසි කෙනෙකුට බැබිලෝනියේ ජීවත් වෙන්න ලැබෙන්නේ නැත.+ ඇයට නැවත කිසිදා ස්ථානයක් හිමි වන්නේද නැත.+ අරාබි ජාතිකයන් එහි තමන්ගේ කූඩාරම් ගසාගන්නේවත් එඬේරුන් තමන්ගේ බැටළු රැළවල් එතැනට ගෙන යන්නේවත් නැත. 21  වතුර නැති පාළු තැන්වල වෙසෙන වනසත්තු එහි වෙසෙති. එහි පාළුවට ගිය නිවෙස්වල ලගින්නේ බකමූණන් පමණි.+ පැස්බරුද භූතයෝද* එහි සැරිසරති.+ 22  එහි බලකොටුවල හිවල්ලු උඩු බුරති.+ ඔවුන්ගේ සුඛෝපභෝගී මන්දිර විශාල නාගයින්ට තෝතැන්නක් වනු ඇත. ඇයට දඬුවම් ලැබෙන කාලය අත ළඟය. එය ප්‍රමාද නොවෙයි. ඇයට ඉතුරුව ඇත්තේ තව ස්වල්ප කාලයක් පමණි.”+

පාදසටහන්

මූ.අ., “මාගේ ශුද්ධ තැනැත්තන්ට.”
හෝ, “කේසිල් තරු මණ්ඩල.”
හෝ, “එළුවන්ගේ හැඩයෙන් යුත් භූතයන්.” මෙහි සඳහන් වන්නේ භූතයන්ට හෝ භූතයන්ව මතකයට නඟන සත්තු ජාතියකට හෝ විය හැකියි.