ක්‍රියා 8:1-40

8  ස්තේපන්ව එලෙස මරා දැමීමට සාවුල්ගේ සහයෝගයද ලැබිණ.+ ඒ දවසේ සිට යෙරුසලමෙහි පිහිටි සභාවට දැඩි පීඩා පැමිණියේය.+ යේසුස්ගේ නියෝජිතයන්* හැර අන් සියලුදෙනාම යුදයේ සහ සමාරියේ පළාත් පුරා විසිරී ගියෝය.+  නමුත් දේවගරුබියෙන් ක්‍රියා කළ මිනිසුන් කිහිපදෙනෙක් ස්තේපන්ගේ මළ සිරුර ගෙන ගොස් සොහොන් ගෙයක තැන්පත් කළ අතර+ සියලුදෙනාම ඔහු ගැන මහත් සේ වැලපුණෝය.+  මේ අතර සාවුල් සභාවට විරුද්ධව ඉතා කුරිරු ආකාරයකින් ක්‍රියා කරන්න පටන්ගත්තේය. ඔහු ගෙයක් ගෙයක් පාසා ගොස් පුරුෂයන්වද ස්ත්‍රීන්වද පිටතට ඇදගෙන ඇවිත් ඔවුන්ව සිරගෙට භාර දුන්නේය.+  නමුත් පීඩාව නිසා දේශය පුරාම විසිරී ගිය අය ඔවුන් ගිය ගිය තැන්වල දෙවිගේ පණිවිඩය ඇතුළත් ශුභාරංචිය ප්‍රකාශ කළෝය.+  ෆිලිප් ඔවුන්ගෙන් එක් අයෙකි. ඔහු සමාරිය නම් නුවරට ගොස්+ එහි සිටි අයට ක්‍රිස්තුස් ගැන දේශනා කළේය.  එක් රැස් වූ සමූහයා ෆිලිප් පැවසූ දේවලට සවන් දෙමින් ඔහු සිදු කළ පුදුමසහගත දේවල් දුටුවෝය. සියලුදෙනාම ඔහුට ඉතා කිට්ටු අවධානයක් දුන්නෝය.  එහි සිටි බොහෝදෙනෙකුට භූතයන් ආවේශ වී සිටි අතර+ ඒ භූතයෝ මහත් හඬකින් කෑගසා පිටතට ආවෝය. අංශභාග රෝගීන්+ හා කොර වූ බොහෝදෙනෙකුටද සුවය ලැබිණ.  ප්‍රතිඵලයක් ලෙස ඒ නුවරේ සිටි සියලුදෙනා තුළ මහත් ප්‍රීතියක් ඇති විය.+  ඒ නුවරෙහි සීමොන් නම් මිනිසෙක් සිටියේය. ඔහු මන්තර ගුරුකම්වල යෙදී සිටි කෙනෙකි.+ ඔහු තමා ඉතා බලවත් කෙනෙක් බව කියමින් සමාරියේ වැසියන්ව විස්මයට පත් කළේය.+ 10  ඔහු සියලුම තරාතිරම්වල සිටි අයගේ පිළිගැනීමට ලක් විය. ඔවුන් ඔහු ගැන පැවසුවේ මෙසේය. “මේ මිනිසා තමයි ‘දෙවියන්ගේ බලය.’ ඒ බලය කොයි තරම් ශ්‍රේෂ්ඨද!” 11  සෑහෙන කාලයක් පුරා ඔහු විවිධ මන්තර ගුරුකම් කර ඔවුන්ව විස්මයට පත් කර තිබුණු නිසා සියලුදෙනාම පුරුදු වී සිටියේ ඔහු පවසන දෙයක් එකවර පිළිගැනීමටය. 12  නමුත් දෙවිගේ රාජ්‍යය සහ යේසුස් ක්‍රිස්තුස් පිළිබඳ ශුභාරංචිය ප්‍රකාශ කරමින් සිටි+ ෆිලිප්ට සවන් දුන් ඔවුහු, ඔහුව විශ්වාස කරන්න පටන්ගත්තෝය. එහි ප්‍රතිඵලයක් ලෙස බොහෝ පුරුෂයෝ හා ස්ත්‍රීහු බව්තීස්ම වූහ.+ 13  සීමොන්ද යේසුස්ගේ අනුගාමිකයෙක් වී බව්තීස්ම විය. ඉන්පසු ඔහු නිතරම සිටියේ ෆිලිප් සමඟය.+ ෆිලිප් සිදු කරන පුදුම දේවල් සහ ආශ්චර්යයන් දැක ඔහු පුදුමයට පත් වූයේය. 14  සමාරියේ වැසියන් දෙවිගේ පණිවිඩය පිළිගෙන තිබෙන බව යෙරුසලමේ සිටි නියෝජිතයන්ට ආරංචි වූ විට+ ඔවුහු පේතෘස්වද යොහන්වද ඔවුන් වෙතට යැව්වෝය. 15  ඔවුහු එතැනට ගිය විට එහි සිටි අයටද දෙවිගේ බලය ලබා දෙන්න කියා යාච්ඤා කළෝය.+ 16  ඒ වන තුරු ඔවුන් ස්වාමීන් වන යේසුස් පමණක් පිළිගෙන බව්තීස්ම වූ නිසා කිසි කෙනෙකුට දෙවිගේ බලය ලැබී තිබුණේ නැත.+ 17  නමුත් පේතෘස් සහ යොහන් රැස්ව සිටි අය පිට අත් තැබූ විට+ ඔවුන්ට දෙවිගේ බලය ලැබිණ. 18  යේසුස්ගේ නියෝජිතයන් තම අත් යම් කෙනෙකු පිට තැබූ විගස ඔහුට දෙවිගේ බලය ලැබුණු ආකාරය දුටු සීමොන් ඔවුන්ට මුදල් දීමට පොරොන්දු වෙමින්,+ 19  “මටත් මේ බලය දෙන්න. එතකොට මටත් පුළුවන් ඕනෑම කෙනෙකු පිට අත් තබා ඔහුට දෙවිගේ බලය ලබා දෙන්න” කියා පැවසුවේය. 20  පේතෘස් එම ඉල්ලීමට පිළිතුරු දුන්නේ මෙසේය. “ඔබේ මුදල් ඔබ සමඟම විනාශ වේවා! ඔබ හිතුවාද දෙවිගෙන් නොමිලේ ලැබෙන මේ දීමනාව මුදල් දී ගන්න පුළුවන් දෙයක් කියා?+ 21  ඔබේ සිත අවංක නැති බව දෙවිට පේනවා.+ ඒ නිසා මේ සේවයට කිසිම ආකාරයකින්වත් සම්බන්ධ වෙන්න ඔබට බැහැ. 22  ඔබේ මේ දුෂ්ටකම ගැන පසුතැවිලි වන්න. ඔබ කරන්න සිතූ මේ දුෂ්ට දේ ගැන යෙහෝවා දෙවිට කන්නලව් කරන්න.+ සමහරවිට ඔබට සමාව ලැබෙයි. 23  ඔබේ සිත විෂ සහිත දේවලින් පිරිලා.+ ඔබ අධර්මිෂ්ඨකමට වහල් වෙලා.”+ 24  එවිට සීමොන් මෙසේ පිළිතුරු දුන්නේය. “සහෝදරයෙනි, ඔබ පැවසූ කිසිම දෙයක් මට වෙනවාට මම කැමති නැහැ. ඒ නිසා මා වෙනුවෙන් යෙහෝවා දෙවිට කන්නලව් කරන්න.”+ 25  ඒ මුළු ප්‍රදේශය පුරාම යෙහෝවා දෙවිගේ පණිවිඩය ගැන පවසමින් සම්පූර්ණ සාක්ෂියක් දැරූ පසු ඔවුහු නැවත යෙරුසලම බලා ගියෝය. ඒ යන අතරතුරේදීත් ඔවුහු සමරිතානුවන්ගේ ගම් බොහොමයක ශුභාරංචිය ප්‍රකාශ කළෝය.+ 26  මේ අතර යෙහෝවා දෙවිගේ දූතයෙක්+ ෆිලිප්ට මෙසේ කීවේය. “දැන් දකුණු දෙසට ගොස් යෙරුසලමේ සිට ගාසා දක්වා දිව යන පාරට යන්න.” (මෙම පාර පාළු පාරකි.) 27  එහෙයින් ඔහු ඒ දෙසට ගියේය. එවිට එම පාරේ ඉතියෝපියානු+ නිලධාරියෙකු+ ගමන් කරනවා ඔහු දුටුවේය. ඒ තැනැත්තා ඉතියෝපියානු ජනතාවගේ රැජින වූ කන්දසී යටතේ සේවය කළ ඇගේ මුළු වස්තුව භාරව සිටි උසස් නිලධාරියෙකි. නමස්කාරය සඳහා යෙරුසලමට ගොස්,+ 28  නැවත තම රට බලා යමින් සිටි ඔහු, තම අශ්ව රථයේ ඉඳගෙන අනාගතවක්තෘ යෙසායාගේ ලියවිල්ල හඬ නඟා කියවමින් ගියේය.+ 29  එවිට දෙවි තම බලය යොදාගෙන ෆිලිප්ට මෙසේ දැනුම් දුන්නේය.+ “ඒ අශ්ව රථයට ළං වෙන්න.” 30  ෆිලිප් ඔහු ළඟට දුව ගොස් එම නිලධාරියා අනාගතවක්තෘ යෙසායාගේ ලියවිල්ල හඬ නඟා කියවන ආකාරය අසා, “ඔබ කියවන දේ ඔබට ඇත්තටම වැටහෙනවාද” කියා ඇසුවේය. 31  එවිට ඔහු, “කාගෙවත් මඟ පෙන්වීමක් නැතුව මේ දේවල් මම කොහොමද තේරුම්ගන්නේ” කියා පවසා, රථයට නැඟ තමා සමඟ ඉඳගන්න කියා ෆිලිප්ගෙන් බැගෑපත්ව ඉල්ලා සිටියේය. 32  ඔහු ශුද්ධ ලියවිල්ලෙන් හඬ නඟා කියවමින් සිටි කොටස මතු දැක්වේ. “ඔහුව ගෙන ගියේ මරන්න ගෙන යන බැටළුවෙකු මෙනි. බැටළු පැටවෙකු තම ලොම් කපන්නා ඉදිරියෙහි නිහඬව සිටින්නා සේ ඔහුද නිහඬව සිටියේය.+ 33  ඔහුව අවමානයට පත් කළ අවස්ථාවේදී ඔහුට සාධාරණ විනිශ්චයක් ලැබුණේ නැත.+ ඔහුගේ පෙළපතේ විස්තර ගැන සොයා බලන්නේ කවුද? මන්ද ඔහු මේ පොළොවෙන් තුරන් වනු ඇත.”+ 34  එම නිලධාරියා ෆිලිප්ගෙන් මෙසේ ඇසුවේය. “අනාගතවක්තෘවරයා මෙසේ පවසන්නේ කා ගැනද? ඔහු කතා කරන්නේ තමන් ගැනද නැත්නම් වෙනත් කෙනෙක් ගැනද? ඔබට පුළුවන්ද මට මේ දේ පැහැදිලි කර දෙන්න?” 35  ෆිලිප් ශුද්ධ ලියවිල්ලේ සඳහන් එම පදයෙන් පටන්ගෙන+ ඔහුට යේසුස් පිළිබඳ ශුභාරංචිය ප්‍රකාශ කළේය.+ 36  ඔවුහු පාරේ යද්දී ප්‍රමාණවත් ජලය ඇති තැනකට පැමිණියෝය. එවිට එම නිලධාරියා, “මෙන්න වතුර තිබෙන තැනක්! මට දැන් බව්තීස්ම වෙන්න මොකක්ද තිබෙන බාධාව”+ කියා පැවසුවේය. 37  —— 38  එහෙයින් ඔහු අශ්ව රථය නවත්වන්න කියා අණ කළේය. ඉන්පසු ෆිලිප් සහ එම නිලධාරියා වතුරට බැස්සෝය. ෆිලිප් ඔහුව එතැනදී බව්තීස්ම කළේය. 39  ඔවුන් ජලයෙන් ඉවතට පැමිණි විට යෙහෝවා දෙවිගේ බලය ෆිලිප් මත නැවත ක්‍රියාත්මක වී ඔහු වහාම එතැනින් පිටත් වී ගියේය.+ ඒ නිසා නිලධාරියා ඔහුව නැවත දුටුවේ නැත. නමුත් ඔහු මහත් ප්‍රීතියකින් තම රට බලා ගියේය. 40  ෆිලිප් ඊළඟට ගියේ අෂ්දොද් නුවර වෙතටය. ඔහු ඒ ප්‍රදේශය පුරාම ගමන් කර සිසේරිය නම් නුවර දක්වා යන තුරු+ සෑම නුවරකම ශුභාරංචිය ප්‍රකාශ කළේය.+

පාදසටහන්

හෝ, “යවනු ලැබූවන්.”