ද්විතීය කතාව 4:1-49

4  “ඊශ්‍රායෙල්වරුනි, මම දැන් ඔබට දෙන නීති හා තීන්දු හොඳින් සිතට ගන්න. ඔබ ඒවා පිළිපදිමින් ඔබේ ජීවිතය රැකගන්න.+ ඔබ එසේ කළොත් ඔබේ මුතුන්මිත්තන්ගේ දෙවි වන යෙහෝවා ඔබට ලබා දෙන දේශය හිමි කරගන්නත් ඔබට හැකි වෙයි.  මම දැන් ඔබට කියන්න යන මේ දේවලට කිසිම දෙයක් එකතු කරන්නවත් එයින් කිසිම දෙයක් ඉවත් කරන්නවත් ඔබට අවසර නැහැ.+ ඔබේ දෙවි වන යෙහෝවා දුන් ඒ සෑම නීතියක්ම ඔබ පිළිපැදිය යුතුයි.  “පෙයෝර් කන්දේ බාල් දෙවියාට+ වන්දනාමාන කළ ඊශ්‍රායෙල්වරුන්ට යෙහෝවා දෙවි කළ දේ දැන් මතක් කරගන්න. යෙහෝවා දෙවි ඔවුන්ව විනාශ කළ හැටි ඔබේ ඇස් දෙකෙන්ම දැක්කා. ඔවුන්ගෙන් එක් කෙනෙක්වත් ඔහු ඉතුරු කළේ නැහැ.+  නමුත් අද ඔබ ජීවතුන් අතර සිටින්නේ ඔබේ දෙවි වන යෙහෝවාට ඔබ ළංව+ සිටින නිසයි.  මගේ දෙවි වන යෙහෝවා මට අණ කළ ආකාරයටම, ඔහුගේ නීති+ හා තීන්දු+ මම ඔබට කියා දුන්නා. ඔබට උරුමයක් ලෙස ලැබෙන දේශයට ගොස් එහි පදිංචි වූ පසුත් ඔබ ඉගෙනගත් මේ දේවල් පිළිපැදිය යුතුයි.  ඔබ මේ අණපනත්වලට එකඟව ජීවත් වුණොත් ප්‍රඥාවන්තව+ හා දැනුම් තේරුම්+ ඇතුව කටයුතු කිරීමට ඔබට හැකි වෙයි. එවිට අවට ජාතීන්ට ඒ නීති ගැන පැහැදීමක් ඇති වී, ‘මේ මහත් ජාතිය දැනුම් තේරුම් ඇති බුද්ධිමත් සෙනඟක්’ කියා පවසන බවට කිසිම සැකයක් නැහැ.+  ඇත්තෙන්ම, ඊශ්‍රායෙල් ජාතිය තරම් ආශීර්වාද ලත් සෙනඟක්+ මේ පොළොවේ කොතැනකවත් සිටිනවාද? නිතරම අපේ උපකාරයට සිටින අපේ දෙවි වන යෙහෝවා තරම් ශ්‍රේෂ්ඨ දෙවි කෙනෙක් සිටින්නේ වෙන කාටද?+  මා ඔබට කියා දෙන මේ නීති මාලාව තරම් ධර්මිෂ්ඨ නීති මාලාවක් තිබෙන්නේ වෙන කා ළඟද?+  “නමුත් කල්පනාකාරීව සිටින්න.+ ඔබ දුටු කිසි දෙයක් අමතක නොකර+ ඔබේ මුළු ජීවිත කාලය පුරාම ඒවා සිතේ තබාගැනීමට වගබලා ගන්න.+ ඔබේ පුතුන්ටත් මුනුපුරන්ටත් ඒ සෑම දෙයක්ම ඔබ කියා දිය යුතුයි.+ 10  ඊශ්‍රායෙල් සෙනඟ හොරෙබ්+ කඳුකරයේ යෙහෝවා දෙවි ඉදිරියේ රැස්ව සිටි අවස්ථාව ගැනත් ඔවුන්ට කියන්න. යෙහෝවා දෙවි එදා මට මෙසේ පැවසුවා. ‘මා පවසන දේවලට සවන් දෙන පිණිස සෙනඟව රැස් කරන්න. ඔවුන් මට සවන් දී+ ජීවිත කාලය පුරාම මට ගරුබිය+ දක්වමින් තම දරුවන්ටත් ඒ කාරණා ගැන ඉගැන්විය යුතුයි.’+ 11  “ඔබේ පියවරුන් දෙවි කී ලෙසම කන්ද පාමුල රැස් වුණා. ඒ අවස්ථාවේදී මුළු ප්‍රදේශයම ගන දුමකින් හා වලාකුළකින් වැසී තිබුණා. ඉන්පසුව ඒ කන්දෙන් ගින්නක් ඇති වී අහස උසට ඇවිළී ගියා.+ 12  යෙහෝවා දෙවි ගින්න තුළින් සියල්ලන්ට ඇසෙන සේ කතා කළා.+ ඒ අවස්ථාවේදී දෙවිගේ හඬ පැහැදිලිව ඇසුණත්+ අපිට ඔහුව+ දැකගන්න ලැබුණේ නැහැ. 13  දෙවි ඊශ්‍රායෙල් සෙනඟට ආඥා දහය*+ දුන්නේ ඒ අවස්ථාවේදීයි. ඔහු ඒවා ගල් පුවරු+ දෙකක් මත ලියා දී ඒවා පවත්වන ලෙස අණ කරමින් ඔබ සමඟ ගිවිසුමක්+ ඇති කරගත්තා. 14  යෙහෝවා දෙවි ඔහුගේ නීති හා තීන්දු ගැන ඔබට කියා දෙන්න මාව පත් කළේ ඒ අවස්ථාවේදීයි. ඔබට උරුමයක් ලෙස ලැබෙන දේශයට ගිය පසුත් ඔබ ඒ අණපනත්වලට එකඟව ජීවත් විය යුතුයි.+ 15  “ඔබ මේ කාරණය කිසිවිටෙකත් අමතක නොකළ යුතුයි.+ හොරෙබ් කඳුකරයේ රැස්ව සිටි ඔබේ පියවරුන්ට යෙහෝවා දෙවි ගින්න තුළින් කතා කරද්දී කිසි කෙනෙක් ඔහුව+ දැක්කේ නැහැ. 16  ඒ නිසා ඔබ කොයිම හැඩයකින්වත් දේවතා රූප සාදා නොගත යුතුයි. එසේ කිරීම ඉතා පිළිකුල්සහගත දූෂිත+ දෙයක්. පුරුෂයෙකුගේ හෝ ස්ත්‍රියකගේ+ හෝ 17  පොළොවේ සැරිසරන සතෙකුගේ+ හෝ අහසේ පියාසර කරන කුරුල්ලෙකුගේ+ හෝ 18  පොළොවේ බඩ ගා යන සතෙකුගේ හෝ ජලයේ සැරිසරන මත්ස්‍යයෙකුගේ+ හෝ හැඩයටවත් කිසි රූපයක් සාදා නොගන්න. 19  ඉර, හඳ, තාරකා හා වෙනත් ආකාශ වස්තූන් දෙස බලා ඒවා ඉදිරියේ වැඳ වැටී නමස්කාර නොකරන්න.+ ඒ සියල්ල මිනිසාගේ ප්‍රයෝජනය පිණිස යෙහෝවා දෙවි සෑදූ බව අමතක නොකරන්න.+ 20  යකඩ ගිනි උදුනක්+ හා සමාන වූ ඊජිප්තු දේශයෙන් ඔබව නිදහස් කළේ යෙහෝවා දෙවි බව මතක තබාගන්න. දෙවි එසේ කළේ ඔබව දෙවිට පමණක් අයිති වූ විශේෂ සෙනඟක්+ ලෙස වෙන් කිරීමටයි. 21  “ඔබේ පියවරුන් නිසා මා අතින් සිදු වූ වරදට,+ යෙහෝවා දෙවි මා සමඟ උදහස් වී යොර්දාන් ගඟෙන් එගොඩ වෙන්න මට ඉඩ නොදෙන බව දිවුරා පැවසුවා. ඒ නිසා, ඔබේ දෙවි වන යෙහෝවා ඔබට උරුම කර දෙන ඒ සරුසාර දේශයට පය තබන්න මට ඉඩ ලැබෙන්නේ නැහැ.+ 22  අපි දැන් සිටින මේ දේශයේදීම මම මිය යනවා.+ මට යොර්දාන් ගඟෙන් එගොඩ වෙන්න නොලැබුණත් ඔබ හැමෝම අනිවාර්යයෙන්ම ගඟෙන් එගොඩ වී ඒ සරුසාර දේශය අයිති කරගන්නවා. 23  යෙහෝවා දෙවි ඔබ සමඟ ඇති කරගත් ගිවිසුම කිසිවිටෙකත් අමතක නොකිරීමට වගබලා ගන්න.+ යෙහෝවා දෙවි ඔබට අණ කළ ලෙස කොයිම හැඩයකින්වත් දේවතා රූප සාදා නොගන්න.+ 24  මන්ද ඇවිළෙන ගින්නක් හා සමාන වූ ඔබේ දෙවි වන යෙහෝවා+ වෙනත් දෙවිවරුන්ට කරන නමස්කාරය දැඩි ලෙස හෙළාදකිනවා.+ 25  “ඔබට දරු මුනුපුරන් ලැබී දේශයේ බොහෝ කල් ජීවත් වූ පසු ඔබ යෙහෝවා දෙවිව අත්හැර දුෂ්ට ලෙස ක්‍රියා කරමින්+ රූපයක් සෑදුවොත්+ ඔබේ දෙවි ඔබ සමඟ උදහස් වෙයි.+ 26  ස්වර්ගයේ හා පොළොවේ ජීවත් වන සියලුදෙනා මා දැන් මේ කියන්න යන දේට සාක්ෂිකරුවන්.+ ඔබ දෙවිව එසේ උදහස් කළොත් යොර්දාන් ගඟෙන් එගොඩ තිබෙන දේශයේ වැඩි කල් ජීවත් වෙන්න නම් ඔබට ලැබෙන්නේ නැහැ. ඔබ දේශයෙන් නැත්තටම නැති වී යයි.+ 27  යෙහෝවා දෙවි ඔබව ඒ දේශයෙන් පන්නා දමා විවිධ ජාතීන් අතරට විසුරුවාහරියි.+ යෙහෝවා දෙවි ඔබව ඒ ජාතීන් අතට පත් කළ විට ඔබෙන් ඉතුරු වන්නේ ඉතා සුළු+ පිරිසක් පමණයි. 28  එවිට ඔබට සිදු වන්නේ, අහන්න දකින්න බැරි, කන්න බොන්න බැරි, ගඳ සුවඳ දැනෙන්නේ නැති+ ලීවලින් හා ගල්වලින් තැනූ+ ඒ ජාතීන්ගේ දෙවිවරුන්ට සේවය කරන්නයි.+ 29  “නමුත් ඔබ ඒ තත්වයේ සිටියදී අවංකවම ඔබේ දෙවි වන යෙහෝවා වෙතට හැරී+ ඔබේ මුළු හදවතින්ම ඔහුගේ මඟ පෙන්වීම් පැතුවොත් ඔබට නැවතත් ඔහුට ළං වීමට හැකි වෙයි.+ 30  මා ඔබට අනතුරු අඟවමින් පැවසූ මේ සියලු දේවල් ඉටු වී ඔබට බොහෝ දුෂ්කරතා විඳින්න සිදු වෙද්දී, නැවත ඔබේ දෙවි වන යෙහෝවා වෙතට හැරී+ ඔහුගේ හඬට සවන් දෙන්න+ ඔබ පෙලඹෙයි. 31  ඇත්තෙන්ම ඔබේ දෙවි වන යෙහෝවා දයාවන්ත දෙවි කෙනෙක්.+ ඔහු කිසිදා ඔබව අත්හරින්නේවත් විනාශ වී යන්න ඔබට ඉඩහරින්නේවත් නැති බව මතක තබාගන්න. ඔබේ මුතුන්මිත්තන් සමඟ ඔහු ඇති කරගත් ගිවිසුමත්+ ඔහු කිසිදා අමතක කරන්නේ නැහැ. 32  “දැන් ටිකක් මේ ගැන කල්පනා කර බලන්න.+ දෙවි මිනිසාව සාදා මේ පොළොවේ පදිංචි කළ දා පටන්+ මේ දක්වා අහස යට කිසිම තැනක මේ තරම් පුදුම දේවල් සිදු වී ඇද්ද? එවැනි දේවල් ගැන ඔබ මීට කලින් අසා තිබෙනවාද?+ 33  ගින්නක් තුළින් දෙවිගේ හඬට සවන් දෙන්න ඔබට හැකි වුණා. ඒ හඬ ඇසුණත් ඔබ මිය ගියේ නැහැ. වෙනත් කිසිම ජාතියක් එවැනි අද්දැකීමක් ලබා තිබෙනවාද?+ 34  ඒ වගේම ඔබේ දෙවි වන යෙහෝවා ඔහුගේ මහත් බලය+ යොදාගෙන+ පුදුමසහගත ක්‍රියා+ හා ආශ්චර්යයන්+ සිදු කරමින් ඔබ වෙනුවෙන් සටන් කළා.+ ඔහු පුදුමසහගත භයානක දේවල්+ කර ඊජිප්තුවෙන් ඔබව නිදහස් කළා. දෙවි වෙනත් කිසිම ජාතියක් වෙනුවෙන් එවැනි දේවල් කර තිබෙනවාද?+ 35  යෙහෝවා දෙවි එවැනි දේවල් කළේ තමන් සැබෑ දෙවි බව ඔබට අවබෝධ කර දෙන පිණිසයි.+ ඇත්තෙන්ම අපේ දෙවි හැර වෙන කිසි දෙවි කෙනෙක් නැහැ.+ 36  දෙවි ස්වර්ගයේ සිට ඔබ සමඟ කතා කර ඔබට අවශ්‍ය හික්මවීම් ලබා දුන්නා. ඇවිළෙන ගින්නක් තුළින්ද ඔහු ඔබ සමඟ කතා කළා.+ 37  “දෙවි ඔබේ මුතුන්මිත්තන්ට බොහෝ සෙයින් ප්‍රේම කළා. ඔවුන්ගෙන් පැවතෙන්නන්ව ඔහුගේ සෙනඟ වශයෙන් තෝරා+ ඔහුගේ මහත් බලයෙන්+ ඔවුන්ව ඊජිප්තුවෙන් නිදහස් කළේ ඒ නිසයි. 38  ඔබට වඩා බලවත් ජාතීන්ව පන්නා දමා ඔවුන්ගේ දේශය ඔබට උරුමයක් ලෙස ලබා දුන්නෙත් ඒ නිසයි.+ 39  යෙහෝවා දෙවි සැබෑ දෙවි බවත් ස්වර්ගයේ හෝ පොළොවේ හෝ ඔහු හැර වෙන කිසි දෙවි කෙනෙක් නැති බවත්+ ඔබ හොඳින් දන්නවා. ඒ කාරණය නිතරම ඔබේ සිතේ තබාගත යුතුයි.+ 40  අද මම ඔබට කියා දෙන දෙවිගේ අණපනත්+ හා නියෝග ඔබ පිළිපැදිය යුතුයි.+ එසේ කළොත් ඔබටත් ඔබේ දරුවන්ටත් බොහෝ ආශීර්වාද ලැබී ඔබේ දෙවි වන යෙහෝවා ඔබට හිමි කර දෙන දේශයේ බොහෝ කල් ජීවත් වෙන්න ඔබට හැකි වෙයි.”+ 41  මේ දේවල් පැවසීමෙන් පසුව මෝසෙස් යොර්දාන් ගඟට නැඟෙනහිර දෙසින් පිහිටි නුවරවල් තුනක් වෙන් කර තැබුවේය.+ 42  ඔහු එම නුවරවල් වෙන් කළේ යමෙකු අතින් සිදු වූ අත්වැරදීමක් නිසා කෙනෙකු මිය ගියොත්+ මිය ගිය පුද්ගලයා සමඟ කිසි අමනාපයකින් නොසිටි+ වරදකරුට පලා ගොස් ජීවිතය බේරාගැනීමට හැකි වන පිණිසය.+ 43  ඒ නුවරවල් තුන මේවාය. බෙෂෙර්+ නමින් හැඳින්වූ පළමුවන නුවර වෙන් කර තිබුණේ රූබෙන්වරුන් සඳහාය. එය පාළුකරයේ උස් තැනිතලාවක පිහිටා තිබිණ. ගාද්වරුන් සඳහා වෙන් කර තිබූ නුවර වූයේ ගිලියද් දේශයේ පිහිටි රාමොත්ය.+ මනස්සේ+ ගෝත්‍රයේ අය සඳහා බාෂාන් දේශයේ පිහිටි ගෝලාන්+ නම් නුවර වෙන් කරන ලදි. 44  ඉන්පසුව මෝසෙස් ඊශ්‍රායෙල්වරුන්ට නීති+ මාලාව පිළිබඳ විස්තර කියා දීමට සූදානම් විය. 45  ඊජිප්තුවෙන් නිදහස් වී ආ ඊශ්‍රායෙල්වරුන්ට මෝසෙස් ඒ සිහිගැන්වීම්,+ නියෝග+ සහ තීන්දු+ කියා දුන්නේය. 46  ඒ කාලයේදී ඊශ්‍රායෙල්වරුන් කඳවුරු බැඳගෙන සිටියේ යොර්දාන් ගඟ අසල පිහිටි බෙත්-පෙයෝර්+ කන්ද ඉදිරිපිට තිබෙන නිම්නයේය. එම ප්‍රදේශය හෙෂ්බොන්හි+ ජීවත් වූ අමෝරිවරුන්ගේ රජු වූ සීහොන්ට අයිතිව තිබුණත් මෝසෙස් සහ ඊශ්‍රායෙල් සෙනඟ ඔහු සමඟ සටන් කර ඔහුව පරාජයට පත් කළෝය.+ 47  සීහොන්ට අයිති වූ දේශයද බාෂාන්හි රජු වූ ඕග්ට+ අයිති වූ දේශයද ඔවුහු අල්ලාගත්තෝය. යොර්දාන් ගඟට නැඟෙනහිරින් ජීවත් වූ අමෝරිවරුන්ගේ එම රජවරුන් දෙදෙනාට අයිති වූ මුළු ප්‍රදේශයම ඔවුහු යටත් කරගත්තෝය. 48  එම ප්‍රදේශය ආනොන් ඔයේ එක් ඉවුරක පිහිටි අරෝයේර්+ නුවරෙන් ඇරඹී සයොන් කන්ද එනම්, හෙර්මොන්+ කන්ද දක්වාම විහිදී යයි. 49  යොර්දාන් ගඟට නැඟෙනහිරින් පිහිටි දේශය ඇතුළුව මහ අරබා+ නිම්නයට අයිති මුළු ප්‍රදේශයද ඊට අයත් වෙයි. එය අරබා මුහුද+ අසල පිහිටි පිස්ගා+ කන්ද පාමුල දක්වාම විහිදී යයි.

පාදසටහන්

නික් 34:28හි පාදසටහන බලන්න.