Kingdom News No. 35

Kasin Onsabi ni Panaon a Manaaroan so Amin a Totoo?

 Ombebetel so Aro ed Kaparan Too

MINILYON so pakaskasi tan miserable, ya anggapo labat lay naasinggeran. Onia so inkuan na retiradon negosyantin bii: ‘Sakey a labi et tinmoktok ed puertak so sakey a balon bii a manaayam met ed kawalaan kon grado tan inkuanton sikatoy maer-ermen. Sigagalang balet ta prangkaan kon imbaga ed sikaton okupado ak. Kinmerew na dispensa ta naabala toak insan la inmalis.’

Makapaermen, diad saman a mismon labi et nanbitkel so balo. Kayari to et inkuan na bii ya akaaral na “importantin leksion.”

Say kaandian na aro ed kaparan too so mabetbet a makapasinagem. Legay panlalaban na tribu ed Bosnia tan Herzegovina, datin kabiangan na Yugoslavia, masulok a sakey milyon so pinatakyas manlapud kaabungan da tan sinamplon nilibo so pinapatey. Na siopa? Na “mismon kakaabay mi,” so maer-ermen ya inkuan na ugaw a biin pinataynan manlapud baryo to. “Kabat mi’ra.”

Diad Rwanda et nilibu-libon totoo so pinapatey, mabetbet na saray dilin kaabay da. “Saniiban [manbibilay] iray Hutu tan Tutsi, manaasawaan, anggapoy pibabali ra nisay aamtaen da no siopay Hutu tan no siopay Tutsi,” so inreport na The New York Times. “Insan biglan anguman so kipapasen,” tan “ginmapoy panpapateyan.”

Mipadpara, saray Judio tan Arabo ed Israel so manaayam ed saksakey a pasen, balet ta dakel so manbubusolan. Say situasyon so pariho met ed dakel a Katoliko tan Protestanti diad Irlandia tan ed ondarakel a totoo ed arum niran bansa. Anggapo nin balot nensaman ed awaran so ontanlan kaandian na panangaro.

Akin ya Ombebetel so Aro ed Kaparan Too?

Iiter na Manamalsa tayo so ebat. Tatawagen iraya na Salita To, say Biblia, a say panaon a pambibilayan tayo et “saray kaunoran ya agew.” Saya so sakey a peryodo a legan to, saray totoo et “anggapo so aro ra a nianakan,” so ibabaga na propesiyay Biblia. Nipaakar ed sarayan “panaon a maatap [a mairap a pidenengan, NW],” a tinawag met ed Kasulatan a “say anggaan na mundo,” impasakbay nen Jesu-Kristo a “say aro ray amayamay ombetel.”—2 Timoteo 3:1-5; Mateo 24:3, 12.

Kanian, say kaandian na aro natan so kabiangan na ebidensia a manbibilay itayo la ed kaunoran iran agew na sayan mundo. Makapaliket, kabaliksan met na satan a sayan mundo na agmaridios a totoo so magano lan nasalatan na matunong a balon mundon uleyan na aro.—Mateo 24:3-14; 2 Pedro 2:5; 3:7, 13.

Balet peteg kasin walaan itayo na rason pian manisian posibli itan a pananguman—a makaaral a manaaroan iray amin a totoo tan manayam a mankakasakey diad kareenan?

 Panangaro ed Kaparan Too—Nagagawa la

“SIOPA so kaparak a too?” intepet na inmunan-siglon abogado ed si Jesus. Anggapoy duaruwan iilaloan toy Jesus a mangikuan, ‘Say kaparam iran Judio.’ Balet diad sakey ya istorya nipaakar ed makasi’d kaparan too a Samaritano, impanengneng nen Jesus a saray totoo ed arum a nasyon et kakaabay tayo met.​—Lucas 10:​29-37; Juan 4:​7-9.

Indanet nen Jesus ya, onkomadua’d aro ed Dios, say aro ed kaparan too so nepeg a manguley ed bilay tayo. (Mateo 22:​34-40) Balet wala tay grupo na totoo a peteg ya angaro la’d kapara ran too? Ginawa itan na inmunan Kristianos! Sikaray kabkabat lapud aro ra’d arum.​—Juan 13:​34, 35.

Komusta balet natan? Kasin walay mangaagamil na singa-Kriston panangaro? Onia so inkuan na Encyclopedia Canadiana: “Say kimey na Tastasi nen Jehova et say pangibangon-lamet tan pangiletneg-lamet na akaunan Inkakristiano ya inagamil nen Jesus tan saray babangatan to . . . Amin so sanaagi.”

Antoy kabaliksan na satan? Kabaliksan ton ag-aabuloyan na Tastasi nen Jehova so antokaman​—anggan say rasa, nasyonalidad, nisay etnikon abenegan​—a pansengegay pamusol ed saray kapara ran too. Nisay pateyen day siopaman, lapud piguratibon pinitpit da laray kampilan da ya impagmaliw a dingding na lukoy tan saray gayang da a komkompay. (Isaias 2:4) Diad tua, kabkabat iray Tastasi lapud inkamabulos dan ontulong ed saray kapara ran too.​—Galacia 6:10.

Agpankelawan a nibaga ed sakey ya editoryal ed Sacramento Union na California: “Magenap lan ibaga a no say intiron mundo et manbilay unong ed aral na Tastasi nen Jehova anggapo lay panagpaagos na dala tan panbubusolan, tan manari so aro.” Inkuan na sakey a managsulat ed magasin a Ring na Hungarya: “Nikuan ko a no Tastasi nen Jehova labat lay manaayam ed dalin, naandi lay bakabakal, tan say trabaho labat na saray polis et say pantrapik tan pangi-isyu na saray pasaporte.”

Tuan nakakaukolan so malaknab tan sankamundoan a pananguman no amin a totoo so kaukolan a manaaroan. Panon a nagawa itan a pananguman? (Ipangasin nengnengen so beneg a pahina.)

 Sano Manaaroan Lay amin a Totoo

IPAPANENGNENG na pikakasin imbangat nen Jesus ya asingger lay biglan pananguman. Diad bantog a Sermon to ed Palandey, imbangat itayo nen Jesus a manpikasi: “Onsabi komoy panarian mo. Nagawa komoy linawam ed dalin, a singa ed tawen.”—Mateo 6:10, King James Version.

Anto so Panarian na Dios? Satan so peteg a gobierno, a manuuley manlapud tawen. Satan no akin a tinawag a “say panarian na tawen.” Si Jesus, say “Prinsipe na Kareenan,” so tinuro la na Ama to a manuley na satan.​—Mateo 10:​7; Isaias 9:6, 7; Salmo 72:1-8.

Sano onsabi so Panarian na Dios, antoy nagawa ed sayan napnoy-gula a mundo? “Say panarian,” et “buybuyaken to tan upoten to” so amin ya abulok iran gobierno na sayan mundo. (Daniel 2:44) Ipapaliwawa na Biblia: “Say mundo mangangga . . . , sabalet so mangunor ed linawa na Dios onsiansia lawas.”​—1 Juan 2:17.

Nipaakar ed balon mundo na Dios, kuan na Biblia: “Say matunong tawiren to so dalin tan manayam diman lawas.” (Salmo 37:​9-11, 29; Uliran 2:​21, 22) Agaylan maglorian panaon itan! “Tan andi-gapo la naani ipatey; tan anggapo la naani onnangis o dageyem, o ot-ot.” (Apocalipsis 21:4) Anggan saray inaatey et nabilay lamet ira, tan say intiron dalin so pagmaliwen a literal a paraiso.​—Isaias 11:​6-9; 35:​1, 2; Lucas 23:​43; Gawa 24:15.

Pian makapanayam ed balon mundo na Dios, nepeg tayon ipasal so panaaroan, ta ibabangat itan na Dios ed sikatayon gawaen. (1 Tesalonica 4:​9) Onia so inkuan na taga-Oriental ya estudyante na Biblia: “Manilalo ak ed panaon, unong ya isisipan na Biblia, ya amin a totoo so nabangatan a manaaroan.” Tan makaseguro itayon sumpalen na Dios iray sipan to! “Sinalitak,” kuanto, “sikato naani met so gawaen ko.”​—Isaias 46:11.

Balet pian napanggayagaan iray bendisyon ed silong na Panariay Dios, nepeg moy mangasol na pikakabat ed Biblia, a singa gagawaen na minilyon a matuan-impanpuson totoo ed sankamundoan. (Juan 17:3) Natulongan ka na say 32-pahinan brosyur ya Anto so Kakaukolanen na Dios ed Sikatayo? Mangala na kopya diad pansulat ed kupon a nitarya ed biek a pahina tan ipawit itan ed address a sankaasinggeran ed panaayaman mo.

□ Labay koy makaawat na brosyur ya Anto so Kakaukolanen na Dios ed Sikatayo?

□ Ipangasin mitalosan ed siak nipaakar ed libren panagaral na Biblia ed ayaman.

[Picture Credit Line ed pahina 2]

Sniper tan tulor ed Bosnia: Reuters/Corbis-Bettman