Angisagyat na Isusumpa so Impanpulong nen Saulo

AGNATALOSAN na saray Judio ed Damasco no akin. Panon a say maseet a manangidepensa na ortodokso so nagmaliw ya apostata? Si Saulo so datin kabkabat a managpasegsegang ed saray mananisia ed ngaran nen Jesus diad Jerusalem. Sikato so linma ed Damasco pian pasegsegangen iray babangatan diman. Balet natan et ipupulong to lan mismo a samay minudmoran kriminal ya impasak lapud panag-ayew et sikato so Mesias! Kasin naaatapis la si Saulo?​—Gawa 9:1, 2, 20-22.

Nayarin walay rason. Maseguron inistorya na saramay akabansag nen Saulo a nambaroy manlapud Jerusalem no anto so agawa ed dalan. Sanen asingger la ra ed Damasco, bigbigla ya alimbos ira na liwawa, tan amin da so niparugso ed dalin. Wala met so nadngel dan boses. Si Saulo labat so asakitan. Sikatoy niparukol ed dalan. Sanen akaalagey la, sikatoy kaukolan ya itabin na saray kakaiba to paonla’d Damasco ta sikatoy abulag.​—Gawa 9:3-8; 26:13, 14.

Nagmaliw a Mananuporta so Datin Sumusumpa

Anto ta so agawa ed si Saulo diad dalan a paarap ed Damasco? Nayari kasin sikatoy tinmalaw lapud karukey na biahe odino ed petang na kaagwan? Lapud determinado iran mananap na natural iran eksplinasyon, saray manduaruwa ed sayan modernon panaon so mangiproproponi na saray posibilidad a singa say impandeliryo, halusinasyon, pirmin impakaapektoan na isip lapud impakagonigon na konsiensia nen Saulo, impaka-alintaweng, tan say ideya ni ingen a tinmuka so inkadumurorot to.

Say peteg ya agawa et si Jesu-Kristo so pinmayawar ed sikato ed satan a makalaram a liwawa, a kokombinsien ton Sikato so Mesias. Walaray panangilitrato ed sayan inkagawa a mangipaparungtal a naplag si Saulo manlapud kabayo. Anggaman posible itan, say simplin inkuan na Biblia et sikatoy “niparugso ed dalin.” (Gawa 22:6-11) Antokaman ni literal ya inkaplag nen Saulo, satan so andiay kabaliksan no ikompara ed makapabaing ya inkaplag to manlapud datin kipapasen to. Kaukolan to lan bidbiren natan a tua so ipupulong na saray patumbok nen Jesus. Say nagawaan labat la nen Saulo et say pikasakey ed sikara. Si Saulo a datin agresibon onsusumpa ed mensahe nen Jesus et sakey la natan ed saray maseseg a mananuporta na satan. Kayari na bautismo tan inkipawil na pakanengneng to, “si Saulo so lalon ombibiskeg, et agto paebaten so saray Judio a manaayam ed Damasco, ya impatnag to a saya, salanti [si] Jesus, sikato so Kristo.”​—Gawa 9:22.

Sinmaew so Planon Pamatey ed Sikato

Iner so nila nen Saulo, a diad saginonor et tinawag a Pablo, kayari na inkakomberte to? Sanen sinulat to iray taga-Galacia, oniay inkuan to: “Linma ak ed Arabia, tan pinmawil ak lamet ed Damasco.” (Galacia 1:17) Say impanaglawi to ed terminon Arabia et nayarin ontukoy ed impanbaroy to ed inerman a pasen ed Peninsula na Arabia. Isusuheri na arum ya iskolar a si Pablo so nayarin linma ed Desierto na Sirya  odino ed arum a pasen diad Nabataean a panarian nen Aretas IV. Kayari na bautismo to, maseguron linma si Saulo ed sakey a mareen a pasen pian mandalepdep, a singa met ed si Jesus a linma ed kalawakan kayari na inkipalseb to.​—Lucas 4:1.

Kapawil nen Saulo ed Damasco, “nansisingbat so saray Judio pian [sikatoy] pateyen da.” (Gawa 9:23) Ginuardiaan na gobernador a manangilaman nen Arin Aretas ed Damasco so syudad pian erelen si Saulo. (2 Corinto 11:32) Balet legan ya iplaplano na kakabusol so pamatey ed si Saulo, nanggaway paraan iray babangatan nen Jesus pian sikatoy makatakas.

Kaiba ed saramay tinmulong ed intakas nen Saulo si Ananias tan saramay babangatan ya akaulop na apostol kayarin tuloy na inkakomberte to. * (Gawa 9:17-19) Nayarin tinmulong met so arum ed saramay nagmaliw a mananisia lapud impanpulong nen Saulo ed Damasco, ta inkuan na Gawa 9:25 a: “Saray babangatan to inala ra ed labi, et inleksab da ed kuta, ya inlugan da ed sakey a babako,” odino buksot. Say balikas a “saray babangatan to” et nayarin manutukoy met ed saramay binangatan nen Saulo. Antokaman so kipapasen, mapatnag a say intalona na ministeryo to so lalon amasanok ed saray dati lan mamubusol ed sikato.

Say Leksion a Naaralan

Sano usisaen tayo iramay agawgawa a misiglaotan ed inkakomberte tan inkabautismoan nen Saulo, naimano tayo ya agto nampagaan a maong no antoy isipen na arum ed sikato; nisay sinmuko lapud pirmin isusumpa. Say sankaimportantian ed si Saulo et say niganggan ed sikaton kimey a panagpulong.​—Gawa 22:14, 15.

Kasin diad agano ni et atebek yo so kaimportantian na panangipulong ed maong a balita? No ontan, amta yo ya amin a tuan Kristiano so nepeg a managpulong na Panarian. Nepeg ya agkayo la nabibigla no say ministeryo yo no maminsan et mangisagyat na isusumpa. (Mateo 24:9; Lucas 21:12; 1 Pedro 2:20) Maabig a pangaligan so inkiwas nen Saulo ed isusumpa. Saray Kristianon mansusungdo ed saray subok so makagamor na panangabobon na Dios. Oniay imbaga nen Jesus ed saray patumbok to: “Gulaen da kayo naani na saray amin a nasyon nisengeg ed ngaran ko.” Balet, sikaray pinaseguroan to: “Dia ed pantepel yo natalima yo naani kamarerwa yo.”​—Lucas 21:17-19.

[Paimano ed leksab]

[Litrato ed pahina 28]

“Niparugso ed dalin” si Saulo sanen pinmayawar ed sikato si Jesus

[Litrato ed pahina 29]

Aliktaran nen Saulo so planon pamatey ed sikato diad Damasco