Say Ebat na Biblia

“Delikado Iran Sports”—Salien Mo Ni Kasi?

“DIAD PANAON TAYO NATAN, AGLABAT MANBABANTAY IRAY TOTOO NOAGTA SASALIEN DA LAN MISMO IRAY SPORTS YA SINGA SAY ITABOY ED EROPLANO INSAN MAN-PARACHUTE, ONEPAS ED PALANDEY GAMIT SO LUBIR, MAN-KAYAK INSAN MANPAPELAG ED WATERFALLS TAN MAN-DIVE ED KULAAN NA SARAY PATING.”—SAY NEWSPAPER YA WILLOW GLEN RESIDENT.

IPAPANENGNENG na satan ya imbaga na newspaper ya onuuso iray ontan ya sports. Mas labay la natan na dakel a totoo iray delikadon sports ya singa say skydiving, ice climbing, paragliding, tan BASE jumping. * Labalabay met na totoo iray sports ya uusaren iray snowboards, bisikleta, skateboards, tan rollerskates ed saray ataragey ya kapalandeyan tan bangin pian ipanengneng ya sarasarag da itan ya gawaen. Ibabaga na Time magazine ya dakel so naiingganyo ed “delikado iran sports” ya iririsga day bilay da. Imbaga ni na satan ya “sikat irayan sports ta labalabay na totoo ya gawaen iray mairap tan delikado pian nalabanan so takot da tan exciting so bilay.”

Balet, lapud inyuso na sarayan sports, baleg so kasalat to. Dakdakel so naririsgo ta saramay aliwa met ya delikadon sports et gagawaen da lan makarisgo. Diad United States nen 1997, dinmakel na masulok ya 33 percent iray ibabatik ed emergency room lapud adisgrasyad skateboarding, 31 percent lapud snowboarding, tan 20 percent lapud mountain climbing. Say arum iran sports et mas grabe ni, nanengneng itan ed indakel na saray ompapatey lapud delikado iran sports. Amta na saramay malabay ed sarayan sports ya delikado iraya. Oniay imbaga na sakey ya biin misasali ed saray delikado iran panag-ski: “Sankanonot ko ya ompan atan so pateyan ko.” Imbaga met na professional snowboarder ya “no agka asakitan, agmo ni sirin inyupot so nanpisingan mo.”

Lapud saraya, panon ya ituring na sakey ya Kristiano irayan sports? Salien to kasi? Panon ya makatulong so Biblia pian makapandesisyon tayo no kasin salien tayo odino andi? No amtaen tayoy pangituturing na Dios ed inkasagrado na bilay, naebatan tayo iratan ya tepet.

Say Pangituturing na Dios ed Bilay

Ibabaga na Biblia ya si Jehova so “subol na bilay.” (Salmo 36:9) Agto tayo labat basta pinalsa, inter to met iray pankaukolan tayo pian na-enjoy tayoy bilay. (Salmo 139:14; Gawa 14:16, 17; 17:24-28) Kanian duga labat ya isipen tayon labay na Dios ya alwaran tayo so inregalo ton bilay. Nalikas tayo met itan ed saray prinsipyo tan Ganggan ya inter to ed bansan Israel.

Diad Mosaikon Ganggan, wala ray kaukolan ya tumboken na kada sakey pian naprotektaan so bilay na arum. No ag-itan ginawa tan walay inatey, walay eebatan na samay sakey ya agnan-alwar ya nanresultad aksidente. Singa bilang, no mangipaalagey na balon abung so sakey, kaukolan ya igawaan to na abeban padir so plastadon atep to. Ta no agto itan gawaen, walay eebatan to ed dala no walay napelag ed atep to tan ompatey. (Deuteronomio 22:8) No binuno na baka so sakey ya too tan inatey, anggapoy eebatan na akanggawa na baka. Balet no naynay lan mamubuno so baka tan apasakbayan la so akanggawa na baka balet agto itan babantayan, tan akapatey itan, walay eebatan na akanggawa na baka tan sikayoy napapatey. (Exodo 21:28, 29) Lapud mabmabli ed si Jehova so bilay, napatnagan ed Ganggan to ya importante ed sikato ya alwaran tan protektaan so bilay.

Atalosan met na saray matoor ya lingkor na Dios ya onaplika met ed sikara iyan prinsipyo, ya agda nepeg ya irisga so bilay da tan say bilay na arum. Diad sakey ya salaysay ed Biblia, imbaga nen David ya labalabay toy ‘makainum na danum ed bobon a walad abay na puerta na Betlehem.’ Diad saman, say Betlehem et sakop na saray Filisteo. Nen arengel na taloran sundalo nen David so imbaga to, pinilit da so onloob ed kampo na saray Filisteo pian mangala ray danum ed bobon ya walad abay na puerta na Betlehem, tan inawit da itan ed si David. Antoy reaksion nen David? Agto itan ininum, imbes inyibung to itan ed dalin. Oniay imbaga to: “Agkon balot iya nagawaan unong ed panmoria na Dios ko! Inumen ko kasi so dala na sarayan lalaki ya angipeligroy bilay da? Ta sanen inala da ’ya et nipeligroy bilay da.” (1 Awaran 11:17-19) Parad si David et aliwan duga so pangirisgay bilay pian labat niiter so personal ya panlabayan na sakey.

Ontan met so reaksion nen Jesus sanen sikatoy tinukso na Diablo, nayarin diad sakey ya pasingawey, ya ontaboy manlapud toktok na padir na templo pian nanengneng no sikatoy iligtas na saray anghel. Balet oniay inyebat nen Jesus: “Agmo nepeg a suboken si Jehova a Dios mo.” (Mateo 4:5-7) Kanian parehon amta nen David tan Jesus ya aglabay nen Jehova ya palpalaran tayo tan irisga tayoy bilay tayo tan bilay na arum.

Diad saraman ya alimbawa ompan nitepet mo, ‘Panon tayo kasin nibiig no say sakey ya sports ed delikado odino mapeligro? Lapud anggan say libangan ya agmet delikado et nayarin nasobraan, anggad iner sirin so limitasyon tayo?’

Kasin Salien Mo Ni?

No pannonotan tayon maong so sports ya labay tayon salien, naamtaan tayoy ebat. Singa bilang, nayarin nitepet tayod sarili tayo, ‘Kasin dakdakel lay naaksidente ed sayan sports? Kasin kabisadok la yan sports tan akapan-training ak la odino wala ray protective equipment ko pian agak narisgo? Anto kasi resulta no apatakba ak, akurinyas ak odino aliway inluksok? Panon to no nagkaproblema so safety equipment ko? Nagasgas ak labat kasi o naospital ak, odino ompatey ak?’

No ipalaran na sakey ya tuan Kristiano so bilay to lapu labat ed sports odino libangan, naapektoan so mablin relasyon tod si Jehova, pati say espisyal ya pribilehyo to ed kongregasyon. (1 Timoteo 3:2, 8-10; 4:12; Tito 2:6-8) Malinew ya anggan diad pampili na sports odino libangan, kaukolan ya ikonsidera na saray Kristiano no antoy pangituturing na Amalsa ed inkasagrado na bilay.

[Paimano ed leksab]