Sayan imbaga na Dios et parad saray Judio ya nambilay ed panaon nen propeta Jeremias. Imbaliwala na totoo iray matunong ya ganggan nen Jehova a tan say maaron panangipetek to panamegley na saray propeta to. Lapud satan et agto ra prinotektaan ed saray aliwliwan resulta na mauges ya ginawa ra.​—Proverbio 1:24-32.

 “Kanian inkuan nen Jehova.” Amay salitan “kanian” et ikonekta to iray akaunan bersikulo ed onsublay ya bersikulo. Diad Jeremias 11:1-10, imbaga nen Jehova ed saray totoo to ya agda tinoor so impisipanan odino impipaknaan na inmuunan atateng da ed sikato. (Exodo 24:7) Imbes ya dayewen na saray Judio so amalsa ed sikara, nandayew ira ed saray imahen. Lapud satan ya impan-apostasya da et dakdakel ni ray mauges ya ginawa da, kaiba lad tay impangibagat da ed saray ananak da!​—Jeremias 7:31.

 “Idapok ed sikara so kadederal.” Kaslakan et ibabaga na Biblia ya gagawaen na Dios so sakey ya bengatla pero diad tua et aabuloyan to labat ya nagawa itan. Panon tayon nibaga ya atan so situasyon ed sayan bersikulo? Nen nandayew ed palson dirios iray totoo nen Jehova tan imbaliwala da ray maong ya estandarte to, nanirap iran maong lapud saratan ya ginawa ra. Agmet la ra prinotektaan na Dios. Lapud satan et asakop na makapanyarin kalaban​—say ari na Babilonia—​so Jerusalem tan inaawit to ed arum ya pasen iray manaayam ed satan ya syudad. Ag-ira atulongan na saray palson dirios ya nantiwalaan da.​—Jeremias 11:12; 25:8, 9.

 Inabuloyan na Dios ya nagawa iratan ya kaugsan ed saray totoo to, pero aliwan mauges so Dios tan agtayo nibagan aliwan patas. Ibabaga na Santiago 1:13 ya “Agnayarin suboken so Dios tan agto susuboken so siopaman diad panamegley na mauges iran bengatla.” Tua ya nabasa tayo ed Maung a Balita ya imbaga na Dios ya “deralen ko ra [saray Judio].” Balet diad Jeremias 11:11, say salita ed orihinal ya lenguahe b ya nipatalos bilang “deralen” et nayari met ya ipatalos bilang “kalamidad” odino “trahedya”​—dugaruga iratan ya salita pian ideskribe iray mauges ya agawa ed saray Judio.

 “Sano onkerew ira na tulong ed siak, agko ra dengelen.” Agdengelen nen Jehova so pikakasi na saramay ‘saray lima ra et napnoy dala,’ odino saramay mantitiwala ed saray palson dirios pian niliktar ira. (Isaias 1:15; 42:17) Balet dengelen to iramay talagan magbabawi ed saray mauges ya kagagawa ra tan mapaabeban ompawil ed sikato.​—Isaias 1:16-19; 55:6, 7.

 Nen 647 B.C.E., imbaki nen Jehova si Jeremias bilang propeta to. Diad loob na 40 taon, pinasakbayan nen Jeremias iray totoo na Juda nipaakar ed nagawan panangukom na Dios. Balet ag-ira dinmengel. Legan na satan ya panaon, insulat na propeta iray salitan nabasa tayo ed Jeremias 11:11. Insan kasabi 607 B.C.E., agawa iray impropesiya to nen dineral na saray tagad Babilonia so Jerusalem.​—Jeremias 6:6-8; 39:1, 2, 8, 9.

 Wala met so mensahe parad ilalo diad libro na Jeremias. Imbaga nen Jehova: “Kayari na 70 taon diad Babilonia, . . . tooren koy sipan ko ya ipawil ta kayo ed sayan pasen [say dalin ya nanlapuan na saray Judio].” (Jeremias 29:10) ‘Tinoor’ nen Jehova itan ya sipan to nen 537 B.C.E., kayarin asakop na saray Medo tan Persiano so Babilonia. Inabuloyan nen Jehova iray totoo ton nitaytayak ed nanduruman pasen ya sakop na Babilonia ya makapawil ed dalin ya nanlapuan da tan nipawil so dugan panagdayew.​—2 Awaran 36:22, 23; Jeremias 29:14.

 Bantayan iyan antikey ya video pian nawalaan kay ideya ed libro na Jeremias.