Barua mar Jakobo 3:1-18
3 Owetena, kik ubed jopuonj mathoth, nimar ung’eyo ni wanayud bura mager moloyo.+
2 Nimar waduto wachwanyore nyading’eny.+ Ka nitie ng’at ma ok chwanyre e wach, jalo en ng’at malong’o chuth kendo en ng’at ma nigi nyalo bende mar chiko dende duto.
3 Sa ma watueyo dho farese mondo giluw kaka wachikogi, wabedo gi nyalo mar chiko dendgi duto.
4 Nonuru meli bende: Kata obedo ni gin gik madongo ahinya kendo yamo mager e ma riembogi, ichikogi mana gi ngayi moro matin nyaka kamoro amora ma jakwang’ yie dwaro dhiye.
5 Kamano bende, lep en fuoni matin e del to e ma opong’ gi sunga madongo. Neuru kaka mach matin ahinya nyalo wang’o bungu maduong’!
6 Lep bende en mach.+ En e piny mopong’ gi gik ma ok kare e kind fuonni mag ringruok, nimar omiyo del duto bedo ma ok ler,+ kendo omoko mach ma wang’o ngima ng’ato duto. En owuon iwang’e e Gehena.*
7 Nimar le duto mag bungu, gi winy, gi le mamol, kod gik mochue manie nam, inyalo bo kendo dhano osebedo ka boyogi.
8 To onge dhano ma nyalo boyo lep. En gima ok kuwe mos kendo okelo hinyruok, opong’ gi sum ma nyalo neko.+
9 Watiyo gi lep e pako Jehova,* ma en Wuoro, to bende watiyo kode e kuong’o dhano ma ne ochue “e kido ma chal gi Nyasaye.”+
10 E dhok achielno e ma pak kod kuong’ wuokie.
Owetena, ok en gima owinjore mondo gik moko otimre e yo ma kamano.+
11 Donge soko achiel ok nyal golo pi maber kod pi makech, koso?
12 Owetena, donge yadh ng’owo ok nyal nyago olemb zeituni kata olemb mzabibu, koso?+ Kamano bende, pi maber ok nyal wuok e pi chumbi.
13 En ng’a kuomu mariek kendo mong’eyo nono tiend weche? Kokalo kuom timne maber, onyis gik mosebedo kotimo gi muolo nikech bedo gi rieko.
14 To ka un gi nyiego mang’eny+ kod ywaruok*+ ei chunyu, kik ubed ka upakoru+ kendo ka uriambo ne adiera.
15 Mano ok en rieko ma lor koa malo; to en mar pinyni,+ mar ringruok, kendo mar jochiende.
16 Nikech kamoro amora ma nyiego kod ywaruok* nitie, kanyo bende e ma chochni kod gik moko duto maricho nitie.+
17 To rieko moa malo, mokwongo oler,+ kae to ohero kuwe,+ otur,*+ oikore luwo kaka ichike, opong’ gi ng’wono kod olembe mabeyo,+ ok odew wang’ jomoko,+ bende ok owuondre.+
18 E wi mano, olemo mar tim makare ichuoyo ka ma nitie kuwe+ ne* jo mohero loso kuwe.+
Weche Moler Piny
^ Som Tiend Weche.
^ Som Apendiks A5.
^ Kata nyalo bedo, “piem.”
^ Kata nyalo bedo, “piem.”
^ Kata, “pache ni kare; owinjo pach jomoko.”
^ Kata nyalo bedo, “gi.”
