Ayub 6:1-30
6 Ayub nodwoko kama:
2 “Ma dine pimie lit ma an-go,+Mi ketgi e ratil kaachiel gi masichena!
3 Diyud ni gipek moloyo kuoyo me nam.
Mano e momiyo aserikni gi wuoyo.+
4 Nimar aserni mag Ng’at Manyalo Duto osechuoya,Kendo kwichgi landore e denda duto;+Masiche ma a kuom Nyasaye olwora koni gi koni.
5 Be punda manie thim+ nyalo ywak ka lum nitie,Koso be dhiang’ nyalo ywak ka en gi chiemo?
6 Be ng’ato dicham chiemo maboth both ma onge chumbi,Koso be pi tong gweno nigi ndhadhu?
7 Atamora gik ma kamago.
Gichalona chiemo motop.
8 Mad Nyasaye timna gima akwayeMad omiya gima agombo.
9 Mad Nyasaye ng’inja matindo tindo,Kendo orie lwete motieka chuth.+
10 Ka dotimna kamano, mano nyalo hoyo chunya,Dabed mamor kata bed ni awinjo lit manade,Nimar pok atamora winjo weche Ng’a Maler.+
11 Ere teko ma pod adong’go ma dichwal ngimana?+
Koso ang’o ma arito ma dimi pod agomb bedo mangima?
12 Iparo ni denda en lwanda?
Koso ringra en chuma?
13 Be nitie teko modong’ kuoma ma dakonyragoKa osemaya gik moko duto ma dikonya?
14 Ng’ato ang’ata ma ok makre gi wadgi konyise hera mosiko+Ok oluoro Ng’at Manyalo Duto.+
15 Owetena osewuonda+ mana kaka aora ma pong’ kinde koth,Kae to duono kinde oro.
16 Aoche ma duwore ma lokre rateng’ nikech pe,Kendo ma pe molokore pi lal e igi.
17 Kata kamano, e ndalo oro gidong’ nono;Kendo ka piny liet, giduono.
18 Gibaro e thim;Kendo giduono ma gilal.
19 Jo ohala mowuok Tema+ manyogi;Kendo jowuoth mowuok Sheba*+ ritogi.
20 Wigi kuot nikech ne gigeno gima onge;Ne gichopo e aochego to ok giyudo gimoro.
21 Uchalona mana gi aochego;+Useneno kaka an gi masiche malich, kendo ubuok.+
22 Be asekwayou gimoro amora,
Kata be asenyisou ni umiya mich mowuok e mwandu ma un-go?
23 Koso be asenyisou ni uresa e lwet jasigu,Kata ni uresa kuom jo ma sanda?
24 Puonjauru, an to abiro chikonu ita ka aling’;+Konyauru fwenyo kethona.
25 Weche madier ok litga!+
Un to wecheu konya gang’o?+
26 Di bed ni udwaro manyo ketho kuom weche ma awacho,Weche mag ng’at ma chunye ool,+ kendo weche ma kalo gi yamo?
27 Un jo ma goyo ombulu e wi nyathi kich,+Kendo uuso osiepu uwegi!+
28 Koro ng’iuru wang’a tir,Nimar ok anyal riambo e wang’u.
29 Kuyie, paruru ane kendo, kik ung’adna bura marach,Ee, paruru ane kendo, nimar pok aweyo timna makare.
30 Be dhoga wacho weche ma ok kare?
Uparo ni ok anyal fwenyo ka gimoro rach?
Weche Moler Piny
^ Kata, “jowuoth ma Jo-Sabea.”
