Kwenda na mambu ke na kati

Kwenda na tansi ya malongi

 DILONGI 76

Yezu Me Tula Bunkete na Tempelo

Yezu Me Tula Bunkete na Tempelo

Na nsungi ya mvula ya mvu 30 T.B., Yezu kwendaka na Yeruzalemi. Bantu mingi kwisaka na bwala yina sambu na Paki. Kupesa bimenga ya bambisi vandaka na kati ya mambu ya bo vandaka kusala na feti yina. Bantu ya nkaka kwisaka ti bambisi, kansi bankaka sumbaka yo na Yeruzalemi.

Ntangu Yezu kwendaka na tempelo, yandi monaka bantu ke teka bambisi kuna. Bo vandaka kusala mumbongo na nzo ya lusambu ya Yehowa! Yezu salaka nki? Yandi salaka fimbu mpi basisaka mameme ti bangombe na tempelo. Yandi balusaka bamesa ya bantu yina vandaka kushanze mbongo mpi  losaka mbongo na bo na ntoto. Yezu songaka bantu yina vandaka kuteka bapizio nde: ‘Beno katula bima yai awa! Beno kumisa ve nzo ya Tata na mono kisika ya kusala mumbongo!’

Bantu yina vandaka na tempelo yitukaka mambu yina Yezu salaka. Balongoki na yandi yibukaka mbikudulu mosi ya ke tubila Mesia: ‘Mono ta vanda ti kikesa mingi sambu na nzo ya Yehowa.’

Na nima, na mvu 33 T.B., Yezu tulaka bunkete na tempelo na mbala ya zole. Yandi pesaka ve ata muntu mosi nzila ya kukonda luzitu na nzo ya Tata na yandi.

“Beno lenda vanda ve bampika ya Nzambi mpi ya Kimvwama.”—Luka 16:13