Kwenda na mambu ke na kati

Kwenda na tansi ya malongi

 DILONGI 36

Lusilu ya Yefte

Lusilu ya Yefte

Bantu ya Izraele yambulaka diaka Yehowa mpi bo yantikaka kusambila banzambi ya luvunu. Ntangu bantu ya Amoni kwisaka kunwanisa bantu ya Izraele, banzambi yina ya luvunu sadisaka bo ve ata fioti. Bantu ya Izraele monaka mpasi bamvula mingi. Nsuka-nsuka, bo tubilaka Yehowa nde: ‘Beto me sala masumu. Pardo, gulusa beto na maboko ya bambeni na beto.’ Bantu ya Izraele fwaka biteki na bo mpi bo yantikaka kusambila diaka Yehowa. Yehowa vandaka kuzola ve nde bo landa kumona mpasi.

Yandi ponaka soda mosi, zina na yandi Yefte, sambu na kutwadisa bo ntangu bo ke nwana ti bantu ya Amoni. Yandi tubilaka Yehowa nde: ‘Kana nge sadisa beto na mvita yai, mono ke sila nde ntangu mono ta vutuka na nzo, mono ta pesa nge muntu ya ntete yina ta basika na nzo na mono sambu na kukwisa kukutana ti mono.’ Yehowa waka kisambu  ya Yefte mpi yandi sadisaka Yefte na kununga bitumba yina.

Ntangu Yefte vutukaka na nzo, muntu ya ntete yina kwisaka kukutana ti yandi vandaka mwana na yandi ya nkento, mwana mosi kaka yina yandi butaka. Mwana ya Yefte vandaka kukina mpi kubula ngoma ya fioti. Yefte ta sala nki? Yandi yibukaka lusilu na yandi mpi tubaka nde: ‘O ve, mwana na mono! Nge me pasula mono ntima. Mono salaka lusilu na Yehowa. Sambu na kulungisa yo, mono fwete tinda nge sambu nge kwenda kusala na nzo-tenta na Shilo.’ Kansi mwana na yandi tubilaka yandi nde: ‘Papa, kana nge salaka lusilu na Yehowa, nge fwete lungisa yo. Pesa mono nzila ya kulutisa bangonda zole na bangumba ti banduku na mono ya bankento. Na nima, mono ta kwenda.’ Mwana ya Yefte salaka na kwikama yonso na nzo-tenta luzingu na yandi ya mvimba. Konso mvula, banduku na yandi vandaka kwenda kutala yandi na Shilo.

“Muntu yina ke zolaka mingi tata to mama na yandi kuluta mono me fwana ve na kuvanda longoki na mono.”—Matayo 10:37