Kwenda na mambu ke na kati

Kwenda na tansi ya malongi

 DILONGI 16

Yobi Vandaka Nani?

Yobi Vandaka Nani?

Muntu mosi yina vandaka kusambila Yehowa vandaka kuzinga na ntoto ya Uzi. Zina na yandi Yobi. Yandi vandaka ti kimvwama mingi mpi dibuta ya nene. Yandi vandaka ntima-mbote, mpi yandi vandaka kusadisa bansukami, bankento yina babakala na bo me fwaka, mpi bana yina kele ve ti bibuti. Kansi kaka sambu yandi vandaka kusala mambu ya mbote, keti Yobi zolaka kukutana ve ti bampasi ata fioti?

Yobi vandaka kuzaba ve, kansi Satana Diabulu vandaka kutala yandi. Yehowa tubilaka Satana nde: ‘Keti nge me mona nsadi na mono Yobi? Kele ve ti muntu ya nkaka bonso yandi na ntoto. Yandi ke waka mono mpi ke salaka mambu ya mbote.’ Satana vutulaka nde: ‘Ya kieleka, Yobi ke lemfukilaka nge. Nge ke taninaka yandi mpi ke sakumunaka yandi. Nge me pesaka yandi ntoto mpi bambisi. Katula bima yina yonso, ebuna yandi ta yambula kusambila nge.’ Yehowa tubaka nde: ‘Nge lenda meka Yobi. Kansi nge kele ve ti nswa ya kufwa yandi.’ Sambu na nki Yehowa pesaka Satana nzila ya kumeka Yobi? Yehowa vandaka kutula ntima nde Yobi ta nunga.

Satana yantikaka kumeka Yobi na bampasi mingi. Ya ntete, yandi tindaka bantu ya Sabea sambu na kuyiba bangombe ti bampunda ya Yobi. Na nima, tiya fwaka mameme ya Yobi yonso. Kimvuka ya nkaka ya bantu, bantu ya Kaldea, yibaka bashamo na yandi. Bo fwaka bansadi yina vandaka kukeba bambisi yina. Na nima bo natilaka Yobi nsangu ya mbi kuluta. Bana ya Yobi yonso fwaka ntangu nzo yina bo vandaka kusala feti bwilaka bo. Ntima ya Yobi pasukaka ngolo, kansi yandi yambulaka ve kusambila Yehowa.

Satana vandaka kuzola nde Yobi kuniokwama diaka mingi, yo yina yandi  basisaka bamputa na nitu ya mvimba ya Yobi. Yobi vandaka kuwa mpasi mingi kibeni. Yandi vandaka kuzaba ve sambu na nki mambu yina yonso vandaka kubwila yandi. Ata mpidina, Yobi vandaka kaka kusambila Yehowa. Nzambi monaka mambu yai yonso, mpi yandi sepelaka mingi na Yobi.

Na nima, Satana tindaka bantu tatu sambu na kumeka Yobi. Bo songaka Yobi nde: ‘Yo fwete vanda nde nge me sala masumu mpi nge ke meka kubumba yo. Nzambi ke na kupesa nge ndola. Yobi tubaka nde: ‘Me sala ve ata kima mosi ya mbi.’ Kansi na nima, yandi yantikaka kuyindula nde Yehowa muntu ke basisila yandi bampasi yina, mpi yandi tubaka nde Nzambi ke sadila yandi ve mambu mbote.

Leke mosi ya bakala, zina na yandi Elihu, vandaka kulanda masolo na bo na pima yonso. Na nima, yandi bakaka ndinga mpi tubaka nde: ‘Mambu ya beno yonso me tuba kele ya luvunu. Yehowa kele nene kuluta mambu yina beto lenda bakisa. Yandi lenda sala ve ata kima mosi ya mbi. Yandi ke monaka mambu yonso mpi ke sadisaka bantu na bampasi na bo.’

Ebuna Yehowa tubilaka Yobi. Yandi tubaka nde: ‘Nge vandaka na wapi ntangu mu salaka zulu ti ntoto? Sambu na nki nge ke tuba nde mu ke sala ve mambu mbote? Nge ke tuba, kansi nge ke zaba ve sambu na nki mambu ke salama.’ Yobi ndimaka kifu na yandi mpi tubaka nde: ‘Mono kele na kifu. Mono waka kaka mambu na nge, kansi ntangu yai mono me zaba nge kibeni. Nge lenda sala mambu yonso. Lolula mu sambu na mambu yina mu tubaka.’

Ntangu kumekama yina manaka, Yehowa belulaka Yobi mpi pesaka yandi bima mingi kuluta yina yandi vandaka na yo ntete. Yobi zingaka luzingu ya nda mpi ya kiese. Yehowa sakumunaka yandi sambu yandi wilaka yandi ata ntangu yo vandaka mpasi. Keti nge ta vanda bonso Yobi mpi nge ta landa kusambila Yehowa, ata nge kutana ti konso diambu yina?

“Beno me waka nsangu ya kukanga-ntima ya Yobi mpi beno me monaka mutindu Yehowa sukisaka mambu.”—Yakobo 5:11