Kwenda na mambu ke na kati

Kwenda na tansi ya malongi

 DILONGI 96

Yezu Me Pona Saule

Yezu Me Pona Saule

Saule butukaka na Tarse mpi yandi vandaka muntu ya Roma. Yandi vandaka Mufarize; yandi zabaka mbote Nsiku ya Bayuda mpi yandi vandaka kumenga Bakristu. Yandi vandaka kukanga Bakristu ya babakala ti ya bankento na banzo na bo mpi vandaka kutula bo na boloko. Ntangu kimvuka ya bantu yina vandaka na makasi fwaka longoki Etiene na matadi, yandi telamaka nkutu na lweka mpi ke tala.

Kansi Saule vandaka kusepela ve kaka na kukanga Bakristu na Yeruzalemi. Yandi songaka nganga-nzambi ya nene na kutinda yandi na mbanza Damasi sambu yandi kanga Bakristu kuna. Ntangu Saule kumaka pene-pene ya mbanza, na mbala mosi nsemo mosi ya ngolo semaka na nziunga na yandi, mpi yandi bwaka na ntoto. Yandi waka ndinga mosi ke tuba nde: ‘Saule, sambu na nki nge ke monisa mono mpasi?’ Yandi vutulaka nde: ‘Nge nani?’ Ndinga yina vutulaka nde: ‘Mono Yezu. Kwenda na Damasi, mpi nge ta zaba mambu yina nge fwete sala.’ Na mbala mosi, meso ya Saule fwaka, mpi yo lombaka nde bo simba yandi na diboko sambu na kunata yandi na mbanza.

Na Damasi, kuvandaka ti Mukristu mosi ya kwikama, zina na yandi Ananiasi. Yezu tubilaka yandi na mbona-meso nde: ‘Kwenda na nzo ya Yudasi na bala-bala yina bo ke bingaka Kusungama, mpi sosa Saule.’ Ananiasi tubaka nde: ‘Mfumu, mono me zaba mambu yonso ya muntu yina! Yandi ke tula balongoki na nge na boloko!’ Kansi Yezu tubaka nde: ‘Kwenda kukutana ti yandi. Mono me pona Saule sambu na kuzabisa nsangu ya mbote na makanda mingi.’

Ananiasi kutanaka ti Saule mpi songaka yandi nde: ‘Saule, mpangi, Yezu me tinda mono sambu na kukangula nge meso.’ Na mbala mosi, Saule kumaka kumona. Yandi longukaka mambu ya Yezu mpi kumaka longoki na yandi. Saule kumaka Mukristu ya me baka mbotika; ebuna yandi yantikaka kulonga na basinagoga, kumosi ti Bakristu ya nkaka. Keti nge lenda yindula mutindu  Bayuda mingi waka mpasi na ntima ntangu bo monaka Saule ke longa bantu mambu ya Yezu? Bo tubaka nde: ‘Keti yai kele ve muntu yina vandaka kukanga balongoki ya Yezu?’

Na nsungi ya bamvula tatu, Saule longaka bantu yina vandaka kuzinga na Damasi. Bayuda mengaka Saule mpi bakaka bangidika sambu na kufwa yandi. Kansi bampangi zabaka komplo yina mpi bo sadisaka yandi na kutina. Bo tulaka yandi na kitunga mpi kulumusaka yandi na ditobo yina bo salaka na kibaka ya mbanza.

Ntangu Saule kwendaka na Yeruzalemi, yandi mekaka kuvukana ti bampangi kuna. Kansi, bampangi vandaka kuwa yandi boma. Na nima, longoki mosi ya ntima-mbote, zina na yandi Barnabasi, nataka Saule na bantumwa mpi ndimisaka bo nde Saule me sobaka kibeni. Saule yantikaka kulonga nsangu ya mbote ti kikesa kumosi ti bampangi ya dibundu ya Yeruzalemi. Na nima, zina na yandi kumaka Polo.

“Kristu Yezu kwisaka na nsi-ntoto sambu na kugulusa bansumuki. Na kati na bo, mono kele muntu ya ntete.”—1 Timoteo 1:15