Kwenda na mambu ke na kati

Kwenda na tansi ya malongi

 DILONGI 65

Estere Gulusaka Bantu na Yandi

Estere Gulusaka Bantu na Yandi

Estere vandaka mwana-nkento ya Muyuda mpi yandi vandaka kuzinga na mbanza ya Shushane na Persia. Bamvula mingi na ntwala, Nebukadenezare bakaka dibuta na bo na Yeruzalemi mpi nataka yo kuna. Kisoni na yandi Mordekai, yina vandaka nsadi ya Asuerusi, ntotila ya Persia, muntu sansaka yandi.

Ntotila Asuerusi vandaka kusosa ntotila-nkento ya mpa. Bansadi na yandi natilaka yandi bankento ya kuluta kitoko ya insi yina, ti Estere mpi. Na bankento yina yonso, ntotila ponaka Estere na kuvanda ntotila-nkento. Mordekai songaka Estere na kutuba ve nde yandi vandaka Muyuda.

Muntu mosi ya lulendo, zina na yandi Amani, vandaka mfumu ya bamfumu yonso. Yandi vandaka kuzola nde bantu yonso kufukimina yandi. Mordekai buyaka kusala yo, ebuna Amani waka makasi mingi yo yina yandi sosaka kufwa yandi. Ntangu Amani zabaka nde Mordekai kele Muyuda, yandi salaka komplo sambu na kufwa Bayuda yonso na insi yina. Yandi songaka ntotila nde: ‘Bayuda kele kigonsa; nge fwete katula bo.’ Asuerusi tubaka nde: ‘Sala konso kima ya nge me zola,’ mpi yandi pesaka Amani kiyeka ya kubasisa nsiku. Amani basisaka nsiku yina pesaka bantu nzila ya kufwa Bayuda yonso na kilumbu ya 13 ya ngonda ya Adare. Yehowa vandaka kutala.

Estere zabaka ve nsiku yina. Yo yina Mordekai tindilaka yandi kopi ya nsiku yango mpi songaka yandi nde: ‘Kwenda kusolula ti ntotila.’ Estere tubaka nde: ‘Muntu yina me kwenda kukutana ti ntotila kansi bo me binga yandi ve, bo ta fwa yandi. Ntotila me binga mono ve bilumbu 30 me lunga! Kansi mu ta kwenda. Kana yandi tandudila mu muhangu na yandi, mono ta bikala na luzingu. Kana yandi sala yo ve, mono ta fwa.’

Estere kwendaka na kibansala ya ntotila. Ntangu ntotila monaka yandi, ntotila tandudilaka yandi muhangu na yandi. Estere kwendaka kisika ntotila vandaka, ebuna ntotila yulaka yandi nde: ‘Mu sala nki sambu  na nge, Estere?’ Estere tubaka nde: ‘Mu ke zola kubinga nge ti Amani na feti.’ Na feti yina, Estere bingaka bo diaka na feti ya zole. Na feti ya zole, ntotila yulaka diaka Estere nde: ‘Mu sala nki sambu na nge?’ Estere tubaka nde: ‘Muntu mosi ke zola kufwa mono ti bantu na mono. Pardo gulusa beto.’ Ntotila yulaka nde: ‘Nani ke zola kufwa nge?’ Yandi tubaka nde: ‘Muntu yai ya mbi Amani.’ Asuerusi waka makasi mingi yo yina yandi songaka bantu na kufwa Amani kukonda kusukinina.

Kansi muntu mosi ve lendaka kukatula nsiku ya Amani, yo vanda ntotila. Yo yina, ntotila kumisaka Mordekai mfumu ya bamfumu yonso mpi yandi pesaka yandi kiyeka ya kubasisa nsiku ya mpa. Mordekai basisaka nsiku yina pesaka Bayuda nswa ya kudinwanina kana bo nwanisa bo. Na kilumbu ya 13 ya ngonda ya Adare, Bayuda bedisaka bambeni na bo. Banda kilumbu yina, bo vandaka kusala feti ya kununga yina konso mvula.

“Bo ta nata beno na ntwala ya baguvernere mpi ya bantotila sambu na mono, sambu na kuta kimbangi na ntwala na bo mpi ya makanda.”—Matayo 10:18