Kwenda na mambu ke na kati

Kwenda na tansi ya malongi

 DILONGI 67

Bibaka ya Yeruzalemi

Bibaka ya Yeruzalemi

Beto vutuka fioti na nima. Nehemia, nsadi ya ntotila Artazeresesi, ke muntu ya Izraele yina vandaka kuzinga na mbanza Shushane na Persia. Mpangi ya Nehemia katukaka na Yuda mpi nataka bansangu ya mbi: ‘Bantu yina vutukaka na Yeruzalemi kele ve na lutaninu. Bibaka ti bakielo ya mbanza yina bantu ya Babilone fwaka, bo me yidikaka yo ve.’ Nehemia waka makasi. Yandi zolaka kukwenda na Yeruzalemi sambu na kupesa maboko, yo yina yandi sambaka sambu ntotila kupesa yandi nswa.

Na nima, ntotila monaka nde Nehemia ke mawa-mawa. Yandi tubaka nde: ‘Me monaka nge ntete ve mutindu yai. Inki me bwa?’ Nehemia tubaka nde: ‘Sambu na nki mu fwete vanda ve mawa-mawa kana mbanza na mu, Yeruzalemi, kele ya kubeba?’ Ntotila yulaka yandi nde: ‘Nge ke zola nde mu sala nki sambu na nge?’ Na mbala mosi, Nehemia sambaka na nsi ya ntima. Ebuna yandi tubaka nde: ‘Pardo, pesa mu nzila ya kukwenda na Yeruzalemi sambu na kutunga diaka bibaka na yo.’ Ntotila Artazeresesi songaka Nehemia nde yandi lenda kwenda, mpi bakaka bangidika sambu yandi vanda na lutaninu na nzietelo yina ya nda. Yandi tulaka Nehemia guvernere ya Bayuda mpi pesaka yandi mabaya sambu na bakielo ya mbanza.

Ntangu Nehemia kumaka na Yeruzalemi, yandi talaka bibaka ya mbanza. Ebuna yandi vukisaka banganga-nzambi ti bamfumu mpi songaka bo nde: ‘Yo ke mawa. Beto fwete sala kisalu.’ Bantu ndimaka, mpi bo yantikaka kutunga diaka bibaka.

Kansi ndambu ya bambeni ya bantu ya Izraele sekaka bo, mpi tubaka nde: ‘Mukengi lenda bwisa kibaka yina beno ke tunga.’ Bantu yina vandaka kutunga tulaka ve dikebi na mafingu yina mpi bo landaka kutunga. Kibaka vandaka kukuma nda mpi ngolo.

Bambeni bakaka lukanu ya kukatuka na bandambu ya kuswaswana mpi kukwisa kunwanisa Yeruzalemi na kintulumukina. Ntangu Bayuda waka mambu yina, bo waka boma. Kansi Nehemia tubaka nde: ‘Beno wa boma ve. Yehowa kele ti beto.’ Yandi tulaka bankengidi sambu na kutanina bantu ya kisalu, ebuna bambeni kukaka ve kunwanisa bo.

 Bo manisaka kuyidika bibaka ti bakielo na nima ya bilumbu 52 mpamba. Nehemia nataka Balevi yonso na Yeruzalemi sambu na nkinsi ya kukangula bakielo. Yandi yidikaka bo na bimvuka ya bayimbi. Bo mataka na kibaka na bimatinu na Kielo ya Nto ya Masa mpi na nima bo tambulaka na nziunga ya mbanza. Bo vandaka kubula bampungi, basembale, ti bakidare mpi bo yimbilaka Yehowa. Esdrasi kwendaka ti kimvuka mosi, mpi Nehemia ti kimvuka ya nkaka, tii kuna bo kutanaka na tempelo. Bantu yonso—babakala, bankento, mpi bana—pesaka bimenga na Yehowa mpi salaka nkinsi. Makelele na bo ya kiese vandaka kuwakana ntama.

“Ata kinwaninu mosi ve ya bo ta sadila sambu na kunwanisa nge ta nunga.”—Yezaya 54:17