Kwenda na mambu ke na kati

Kwenda na tansi ya malongi

 DILONGI 93

Yezu Me Vutuka na Zulu

Yezu Me Vutuka na Zulu

Na Galilea, Yezu kutanaka ti balongoki na yandi. Yandi pesaka bo kisalu mosi ya mfunu mingi: ‘Beno kwenda mpi beno kumisa bantu ya bansi yonso balongoki. Beno longa bo mambu yina mono longaka beno, mpi beno botika bo.’ Na nima yandi silaka bo nde: ‘Beno vila ve, mono ta vanda ntangu yonso ti beno.’

Na nsungi ya bilumbu 40 na nima ya lufutumuku na yandi, Yezu monanaka na balongoki na yandi mingi na Galilea mpi na Yeruzalemi. Yandi longaka bo malongi ya mfunu mpi salaka bimangu mingi. Na nima, Yezu kutanaka ti bantumwa na yandi sambu na mbala ya nsuka na Ngumba ya Banti ya Olive. Yandi tubaka nde: ‘Beno katuka ve na Yeruzalemi. Beno landa kuvingila kima yina Tata silaka.’

Bantumwa bakisaka ve mambu yina yandi zolaka kutuba. Bo yulaka yandi nde: ‘Keti nge ke kuma Ntotila ya Izraele ntangu yai?’ Yezu tubaka nde: ‘Ntangu yina Yehowa me tulaka me lunga ntete ve sambu mono kuma Ntotila. Ntama mingi ve, beno ta baka ngolo ntangu mpeve santu ta kwisila beno, mpi beno ta vanda bambangi na mono. Beno kwenda kusamuna na Yeruzalemi, na Yudea, na Samaria, mpi na bisika ya kuluta ntama ya ntoto.’

Na nima, Yezu mataka na zulu mpi matuti fikaka yandi. Balongoki na yandi landaka kutala na zulu, kansi yandi vandaka me kwenda.

Balongoki katukaka na Ngumba ya Banti ya Olive mpi bo kwendaka na Yeruzalemi. Bo vandaka kukutana ntangu yonso na suku ya zulu mpi bo vandaka kusamba. Bo vandaka kuvingila Yezu sambu yandi pesa bo bantuma ya nkaka.

“Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.”—Matayo 24:14