Kwenda na mambu ke na kati

Kwenda na tansi ya malongi

 DILONGI 53

Kikesa ya Yehoyada

Kikesa ya Yehoyada

Yezabele vandaka ti mwana mosi ya nkento, zina na yandi Atalia; yandi vandaka muntu ya mbi bonso mama na yandi. Atalia kwelanaka ti ntotila ya Yuda. Ntangu bakala na yandi fwaka, mwana na yandi ya bakala yantikaka kuyala. Kansi ntangu mwana na yandi fwaka, Atalia kudikumisaka mfumu ya Yuda. Ebuna yandi sosaka kufwa dikanda yonso ya ntotila; yandi fwaka konso muntu yina lendaka kukuma ntotila na kisika na yandi, yandi fwaka ata bantekolo na yandi mosi ya babakala. Bantu yonso vandaka kuwa yandi boma.

Nganga-Nzambi ya Nene Yehoyada ti nkento na yandi, Yehosheba, zabaka nde mambu yina Atalia vandaka kusala kele mbi kibeni. Bo tulaka luzingu na bo na kigonsa mpi bo bumbaka mutekolo ya Atalia mosi yina vandaka bebe, zina na yandi Yehoashi. Bo sansaka yandi na tempelo.

Ntangu Yehoashi kumaka ti bamvula nsambwadi, Yehoyada vukisaka bamfumu yonso ti Balevi yonso mpi songaka bo nde: ‘Beno keba bakielo ya tempelo mpi beno kotisa ve ata muntu mosi.’ Ebuna Yehoyada kumisaka Yehoashi ntotila ya Yuda mpi lwatisaka yandi mpu ya kimfumu. Bantu ya Yuda vandaka kutuba na ndinga ya ngolo nde: ‘Luzingu ya nda na ntotila!’

Ntotila-Nkento Atalia waka makelele ya bantu mpi yandi kwisaka ntinu na tempelo. Ntangu yandi monaka ntotila ya mpa, yandi tubaka na ndinga ya ngolo nde: “Komplo! Komplo!” Bamfumu simbaka ntotila-nkento yina ya mbi, nataka yandi, mpi fwaka yandi. Ebuna nki beto lenda tuba sambu na bupusi na yandi ya mbi na dikanda?

Yehoyada sadisaka dikanda na kusala kuwakana ti Yehowa; bo silaka  na kusambila kaka yandi. Yehoyada pusaka bo na kubwisa tempelo ya Baale mpi na kufwa-fwa biteki. Yandi tulaka banganga-nzambi ti Balevi na kisalu ya tempelo sambu bantu kusambila diaka Nzambi kuna. Yandi tulaka bankengidi ya bakielo sambu na kukeba tempelo sambu muntu mosi ve ya mvindu kukota. Na nima, Yehoyada ti bamfumu nataka Yehoashi na nzo ya ntotila mpi vandisaka yandi na kiti ya kimfumu. Bantu ya Yuda sepelaka. Nsuka-nsuka, bo lendaka kusadila Yehowa kukonda bupusi ya mbi ya Atalia mpi ya lusambu ya Baale. Keti nge ke mona mutindu kikesa ya Yehoyada sadisaka bantu mingi?

“Beno wa boma ve ya bantu yina ke fwaka nitu kansi yina lenda fwa ve moyo; kansi beno wa boma ya muntu yina lenda fwa moyo ti nitu na Gehena.”—Matayo 10:28