Kwenda na mambu ke na kati

Kwenda na tansi ya malongi

 DILONGI 80

Yezu Me Pona Bantumwa Kumi na Zole

Yezu Me Pona Bantumwa Kumi na Zole

Na nima ya kulonga kiteso ya mvula mosi ti ndambu, yo lombaka nde Yezu kubaka desizio mosi ya mfunu. Banani yandi ta pona sambu bo salaka mingi ti yandi? Banani yandi ta pesa formasio sambu bo twadisa dibundu ya Bukristu? Sambu na kubaka badesizio yina, Yezu vandaka na mfunu ya lusadisu ya Yehowa. Yo yina, yandi kwendaka na ngumba mosi kisika yandi lenda vanda yandi mosi, mpi yandi sambaka mpimpa ya mvimba. Na suka, Yezu bingaka balongoki na yandi yonso mpi yandi ponaka bantumwa 12. Bazina ya banani nge ke yibuka? Bazina na bo yo yai: Piere, Andre, Yakobo, Yoane, Filipo, Bartelemi, Toma, Matayo, Yakobo mwana ya Alfeo, Tadeo, Simoni, mpi Yudasi Iskariote.

Andre, Piere, Filipo, Yakobo

Bantumwa 12 yai kumaka kutambula mpi kulonga kumosi ti Yezu. Na nima ya kupesa bo formasio, yandi tindaka bo na kwenda kulonga bo mosi. Yehowa pesaka bo ngolo ya kubasisa bademo mpi ya kubelula bambefo.

Yoane, Matayo, Bartelemi, Toma

Yezu vandaka kubinga bantumwa 12 banduku na yandi, mpi yandi vandaka kutudila bo ntima. Bafarize vandaka kuyindula nde  bantumwa vandaka bantu ya me longukaka ve mpi ya mpamba. Kansi Yezu pesaka bo formasio sambu na kisalu yina. Bo zolaka kuvanda ti Yezu na bantangu ya kuluta mfunu ya luzingu na yandi, mu mbandu na ntwala ya lufwa na yandi mpi na nima ya lufutumuku na yandi. Bonso Yezu, bantu mingi na kati ya bantumwa 12 katukaka na Galilea. Bankaka vandaka ti bankento.

Yakobo mwana ya Alfeo, Yudasi Iskariote, Tadeo, Simoni

Bantumwa vandaka bantu ya kukonda kukuka yina vandaka kusala bifu. Bantangu ya nkaka bo vandaka kutuba na ntwala ya kuyindula mpi bo bakaka badesizio ya mbi. Bantangu ya nkaka bo vandaka ntima zulu-zulu. Bantangu ya nkaka diaka bo swanaka sambu na kuzaba nani me luta bankaka. Kansi bo vandaka bantu ya mbote yina vandaka kuzola Yehowa. Bo zolaka kuvanda bantu ya ntete ya dibundu ya Bukristu kana Yezu me kwenda.

“Mono ke binga beno banduku, sambu mono me zabisaka beno mambu yonso ya mono waka na Tata na mono.”—Yoane 15:15