Kwenda na mambu ke na kati

Kwenda na tansi ya malongi

 DILONGI 8

Abrahami ti Sara Lemfukaka na Nzambi

Abrahami ti Sara Lemfukaka na Nzambi

Ntama ve ti Babele kuvandaka ti bwala mosi, zina na yo Ure, kisika bantu vandaka kusambila banzambi mingi kansi Yehowa ve. Kansi, kuvandaka ti muntu mosi na Ure yina vandaka kusambila kaka Yehowa. Zina na yandi Abrahami.

Yehowa tubilaka Abrahami nde: ‘Bikisa nzo na nge ti bampangi na nge, mpi kwenda na insi yina mono ta songa nge.’ Ebuna Nzambi silaka yandi nde: ‘Nge ta kuma dikanda ya nene, mpi mono ta sadila bantu mingi ya ntoto ya mvimba mambu ya mbote sambu na nge.’

Abrahami zabaka ve kisika Yehowa vandaka kutinda yandi, kansi yandi tulaka ntima na Yehowa. Yo yina, Abrahami, nkento na yandi Sara, tata na yandi Tera, ti mwana-mpangi na yandi  Loti, kangaka bima mpi na bulemfu yonso bo yantikaka nzietelo na bo ya nda.

Abrahami vandaka ti bamvula 75 ntangu nsuka-nsuka, yandi ti dibuta na yandi, kumaka na insi yina Yehowa zolaka nde bo mona. Yo vandaka insi ya Kanana. Kuna Nzambi solulaka ti Abrahami mpi salaka lusilu yai: ‘Insi yai yonso ya nge ke mona na nziunga na nge, mono ta pesa yo na bana na nge.’ Kansi Abrahami ti Sara vandaka minunu mpi bo vandaka ve ti mwana. Yo yina, inki mutindu Yehowa zolaka kulungisa lusilu yina?

“Sambu na lukwikilu, Abrahami . . . lemfukaka mpi kwendaka na kisika yina yo lombaka nde yandi baka bonso dikabu; mpi yandi kwendaka, ata yandi zabaka ve kisika yina yandi vandaka kukwenda.”—Baebreo 11:8