Kwenda na mambu ke na kati

Kwenda na tansi ya malongi

 DILONGI 94

Balongoki Me Baka Mpeve Santu

Balongoki Me Baka Mpeve Santu

Bilumbu kumi na nima ya ntangu yina Yezu vutukaka na zulu, balongoki na yandi bakaka mpeve santu. Yo vandaka na kilumbu ya Pantekoti 33 T.B., mpi bantu yina katukaka na bisika mingi kwisaka na Yeruzalemi sambu na kusala nkinsi. Balongoki ya Yezu kiteso ya 120 vukanaka na suku ya zulu ya nzo mosi. Na mbala mosi, diambu mosi ya kuyituka salamaka. Kima mosi bonso ludimi ya tiya monanaka na zulu ya ntu ya konso longoki, mpi bo yantikaka kutuba na bandinga mingi. Makelele ya ngolo bonso mupepe ya ngolo fulukaka na nzo yina.

Banzenza ya bansi ya nkaka yina kwisaka na Yeruzalemi waka makelele yina mpi bo bakaka ntinu tii na nzo yina sambu na kutala diambu yina vandaka kusalama. Bo yitukaka ntangu bo waka balongoki ke tuba na bandinga yina. Bo tubaka nde: ‘Kansi bantu yai me katuka na Galilea. Inki mutindu bo ke tuba na bandinga na beto?’

Ebuna Piere mpi bantumwa ya nkaka telamaka na ntwala ya kimvuka yina ya bantu. Piere songaka bantu mutindu bo fwaka  Yezu mpi nde Yehowa futumunaka yandi. Piere tubaka nde: ‘Ntangu yai Yezu kele na zulu na diboko ya kitata ya Nzambi, mpi yandi me tiamuna mpeve santu yina yandi silaka. Yo yina beno me mona bimangu yai mpi beno me wa makelele.’

Mambu yina Piere tubaka simbaka ntima ya bantu, mpi bo yulaka nde: “Inki beto fwete sala?” Yandi vutudilaka bo nde: ‘Beno balula ntima na masumu na beno mpi beno baka mbotika na zina ya Yezu. Beno ta baka mpi dikabu ya mpeve santu.’ Na kilumbu yina, bantu kiteso ya 3 000 bakaka mbotika. Banda kilumbu yina, ntalu ya balongoki yantikaka kukuma mingi nswalu kibeni na Yeruzalemi. Na nsadisa ya mpeve santu, bantumwa salaka mabundu mingi sambu na kulonga balongoki mambu yonso yina Yezu songaka bo.

“Kana nge ke zabisa na meso ya bantu yonso na munoko na nge nde Yezu kele Mfumu, mpi nge ke kwikila na ntima na nge nde Nzambi tedimisaka yandi na bafwa, nge ta guluka.”​—Baroma 10:9