Kwenda na mambu ke na kati

Kwenda na tansi ya malongi

 DILONGI 56

Yoziasi Vandaka Kuzola Nsiku ya Nzambi

Yoziasi Vandaka Kuzola Nsiku ya Nzambi

Yoziasi kumaka ntotila ya Yuda ntangu yandi vandaka ti bamvula nana. Na bilumbu yina, bantu vandaka kusadila mazi mpi kusambila biteki. Ntangu Yoziasi kumaka ti bamvula 16, yandi mekaka kulonguka mutindu ya kusambila Yehowa na mutindu ya mbote. Ntangu yandi vandaka ti bamvula 20, yandi yantikaka kufwa biteki mpi bamesa-kimenga na insi na bo. Mpi ntangu yandi kumaka ti bamvula 26, yandi bakaka bangidika sambu bo yidika tempelo ya Yehowa.

Na tempelo, nganga-nzambi ya nene, Hilkia, monaka rulo ya Nsiku ya Yehowa—ziku rulo yina Moize yandi mosi sonikaka. Shafani, sekretere ya ntotila natilaka Yoziasi rulo yina mpi yantikaka kutanga Nsiku na ndinga ya ngolo. Ntangu Yoziasi vandaka kuwa, yandi bakisaka nde bantu vandaka kulemfukila ve Yehowa bamvula mingi. Ntotila Yoziasi songaka Hilkia nde: ‘Yehowa me wila beto makasi mingi. Kwenda kusolula ti yandi. Yehowa ta songa nge mambu ya beto fwete sala.’ Yehowa pesaka mvutu na nzila ya profete ya nkento Hulda: ‘Bantu ya Yuda me yambula mono. Bo ta baka ndola kansi ve na luyalu ya ntotila Yoziasi, sambu yandi kudikulumusaka.’

Ntangu ntotila Yoziasi waka nsangu yina, yandi kwendaka na tempelo mpi vukisaka bantu ya Yuda. Ebuna yandi tangilaka dikanda ya mvimba Nsiku ya Yehowa na ndinga ya ngolo. Yoziasi ti bantu silaka na kulemfukila Yehowa ti ntima na bo ya mvimba.

 Dikanda ya Yuda vandaka kusala ve feti ya Paki banda bamvula mingi. Kansi ntangu Yoziasi tangaka na Nsiku nde bo fwete sala Paki konso mvula, yandi songaka dikanda nde: ‘Beto ta sala Paki sambu na Yehowa.’ Ebuna Yoziasi yidikaka bimenga mingi mpi bakaka bangidika sambu na kuvanda ti bayimbi na tempelo. Dikanda salaka Paki bilumbu nsambwadi, na nima bo salaka Nkinsi ya Mampa ya Kukonda Levire. Bo me salaka ntete ve Paki ya mutindu yai banda bilumbu ya Samuele. Yoziasi vandaka kibeni kuzola Nsiku ya Nzambi. Keti nge ke zolaka kulonguka mambu ya me tala Yehowa?

“Ndinga na nge kele mwinda sambu na dikulu na mono, mpi nsemo sambu na nzila na mono.”—Nkunga 119:105