Kwenda na mambu ke na kati

Kwenda na tansi ya malongi

 DILONGI 49

Ntotila-Nkento ya Mbi Me Baka Ndola

Ntotila-Nkento ya Mbi Me Baka Ndola

Katuka na fenetre ya nzo na yandi ya kimfumu na Yizrele, ntotila Ahabi lenda mona bilanga ya vinu ya muntu mosi, zina na yandi Naboti. Ahabi vandaka kuzola kilanga yina, mpi yandi mekaka kusumba yo na Naboti. Kansi Naboti buyaka kutekila yandi yo sambu Nsiku ya Yehowa vandaka kubuyisa kuteka ntoto yina bo me bikilaka muntu na ba-nkaka na yandi. Keti Ahabi zitisaka Naboti sambu yandi salaka diambu ya mbote? Ve. Ahabi waka makasi mingi. Yandi dasukaka yo yina yandi buyaka kubasika na suku ya yandi ke lalaka, mpi yandi buyaka kudia.

Nkento ya Ahabi, ntotila-nkento Yezabele, yina vandaka muntu ya mbi, songaka yandi nde: ‘Nge kele ntotila ya Izraele. Nge lenda baka konso kima ya nge me zola. Mu ta bakila nge ntoto yina.’ Yezabele sonikilaka bankuluntu ya mbanza mukanda; yandi songaka bo na kufunda Naboti nde yandi me singa Nzambi mpi na kufwa yandi na matadi. Bankuluntu salaka mambu yina Yezabele songaka bo, ebuna Yezabele songaka Ahabi nde: ‘Naboti me fwa. Bilanga ya vinu kele ya nge.’

Katula Naboti, kele ti bantu ya nkaka ya me sala kima ve yina Yezabele fwaka. Yezabele fwaka bantu mingi yina vandaka kuzola Yehowa. Yandi vandaka kusambila biteki mpi salaka mambu ya nkaka ya mbi. Yehowa vandaka kumona mambu yonso ya mbi yina Yezabele vandaka kusala. Yandi ta sala Yezabele inki?

Ntangu Ahabi fwaka, mwana na yandi Yehorami kumaka ntotila. Yehowa tindaka muntu mosi, zina na yandi Yehu, sambu na kupesa Yezabele ti dibuta na yandi ndola.

Yehu vandaka kukwenda na pusu-pusu na yandi na Yizrele, kisika Yezabele vandaka kuzinga. Yehorami kwisaka na pusu-pusu sambu na kukutana ti Yehu mpi yulaka yandi nde: ‘Keti ngemba kele na kati na beto?’ Yehu tubaka nde: ‘Ngemba ta vanda ve kana mama na nge, Yezabele, ke landa kusala mambu ya mbi.’ Yehorami mekaka kubalusa pusu-pusu na yandi sambu na kutina. Kansi Yehu bulaka Yehorami tolo-tolo mosi, ebuna yandi fwaka.

 Na nima Yehu kwendaka na nzo ya Yezabele. Ntangu Yezabele waka nde Yehu ke kwisa, yandi tulaka babote, yidikaka nsuki na yandi, mpi vandaka kuvingila na fenetre yina vandaka na zulu. Ntangu Yehu kumaka, Yezabele pesaka yandi mbote kukonda luzitu. Yehu songaka bansadi ya Yezabele yina vandaka na lweka na yandi nde: “Beno losa yandi na ntoto!” Bo pusaka Yezabele na fenetre, ebuna yandi bwaka na ntoto mpi fwaka.

Na nima, Yehu fwaka bana ya Ahabi ya babakala 70 mpi katulaka lusambu ya Baale na insi na bo. Keti nge lenda mona nde Yehowa me zaba mambu yonso mpi nde na ntangu ya me fwana, yandi ke pesaka ndola na bantu yina ke salaka mambu ya mbi?

“Dikabu yina muntu bakaka ntete na lukasi ta vanda ve lusakumunu na nsuka.”—Bingana 20:21