Kwenda na mambu ke na kati

Kwenda na tansi ya malongi

 DILONGI 51

Soda mpi Mwana-Nkento ya Fioti

Soda mpi Mwana-Nkento ya Fioti

Mwana-nkento mosi ya fioti ya Izraele vandaka na Siria, ntama ti bwala na bo. Basoda ya Siria botulaka yandi na dibuta na yandi mpi ntangu yai yandi kele nsadi ya nkento ya mfumu mosi ya basoda, zina na yandi Namani. Mwana-nkento yina vandaka kusambila Yehowa ata bantu yina vandaka na nziunga na yandi vandaka kusala yo ve.

Namani vandaka ti kimbefo mosi ya ngolo na mpusu ya nitu, mpi yandi vandaka kuniokwama ntangu yonso. Mwana-nkento yina vandaka kuzola kibeni kusadisa yandi. Yandi songaka nkento ya Namani nde: ‘Me zaba muntu mosi yina lenda belula bakala na nge. Na Izraele, kele ti profete mosi ya Yehowa, zina na yandi Elisha. Yandi lenda belula bakala na nge.’

Nkento ya Namani songaka bakala na yandi mambu yina mwana-nkento yina tubaka. Namani vandaka ti luzolo ya kusala mambu yonso, yo yina yandi kwendaka na nzo ya Elisha na Izraele. Namani vandaka kuvingila nde bo yamba yandi bonso muntu ya mfunu. Kansi, na kisika ya kusolula ti yandi, Elisha tindaka nsadi na  yandi na kupesa Namani mbote mpi kuzabisa yandi nsangu yai: ‘Kwenda mpi yobila mbala nsambwadi na Nzadi Yordani. Na nima nge ta beluka.’

Namani lembaka nitu mingi kibeni. Yandi tubaka nde: ‘Mu yindulaka nde profete yai ta binga Nzambi na yandi mpi ta lutisa maboko na yandi na zulu na mu sambu na kubelula mu. Kansi, yandi ke songa mu na kukwenda na nzadi yai ya Izraele. Beto kele ti banzadi ya mbote kuluta na Siria. Sambu na nki mu fwete kwenda ve kaka kuna?’ Namani waka makasi, mpi yandi katukaka na nzo ya Elisha.

Bansadi ya Namani sadisaka yandi na kuyindula mbote. Bo songaka yandi nde: ‘Keti nge zolaka ve kusala konso kima sambu nge beluka? Diambu yina profete ke songa nge na kusala kele diambu ya pete kibeni. Sala yo kaka.’ Namani wilaka bo. Yandi kwendaka na Nzadi Yordani mpi bwaka na masa mbala nsambwadi. Ntangu yandi basikaka na masa na mbala ya nsambwadi, nitu na yandi ya mvimba belukaka. Yandi vandaka na ntonda mingi, mpi yandi vutukaka sambu na kupesa Elisha mersi. Yandi tubaka nde: ‘Ntangu yai, mono me zaba nde Yehowa kele Nzambi ya kieleka.’ Nge ke yindula nde mwana-nkento yina ya Izraele kudiwaka nki mutindu ntangu Namani vutukaka na nzo yandi me beluka?

“Nge me sala nde lukumu kubasika na munoko ya bana mpi ya bana ya fioti.”—Matayo 21:16