Kwenda na mambu ke na kati

Kwenda na tansi ya malongi

 DILONGI 98

Bukristu Me Yalumuka na Makanda Mingi

Bukristu Me Yalumuka na Makanda Mingi

Bantumwa lemfukaka na nsiku ya Yezu ya kumwanga nsangu ya mbote na ntoto ya mvimba. Na mvu 47 T.B., bampangi ya Antioshe tindaka Polo ti Barnabasi na kukwenda kusamuna. Bansamuni zole yai ya kikesa salaka nzietelo na Asie Mineure ya mvimba mpi kwendaka na bisika yai, Derbe, Listre, mpi Ikoniumi.

Polo ti Barnabasi samunaka na bantu yonso, yo vanda bamvwama to bansukami, baleke to bambuta. Bantu mingi ndimaka kieleka ya me tala Kristu. Ntangu Polo ti Barnabasi longaka Sergiusi Paulusi, guvernere ya Shipre, nganga-ngombo mosi sosaka kukanga bo nzila. Polo tubilaka nganga-ngombo yina nde: ‘Yehowa ke sepela ve ti nge.’ Na mbala mosi, meso ya nganga-ngombo yina fwaka. Ntangu guvernere Paulusi monaka diambu yina, yandi kwikilaka.

Polo ti Barnabasi longaka bisika yonso, nzo na nzo, na bazandu, na bala-bala, mpi na basinagoga. Ntangu bo belulaka bakala mosi yina vandaka makulu-kifu na Listre, bantu yina monaka kimangu yina bo salaka, yindulaka nde bo kele banzambi mpi sosaka kusambila bo. Kansi Polo ti Barnabasi buyisaka bo nde: ‘Beno sambila kaka Nzambi! Beto kele kaka bantu.’ Na nima Bayuda ya nkaka kwisaka mpi bo pusaka kimvuka ya bantu na kutelamina Polo. Bantu yina taka yandi matadi, bo nataka yandi na nganda ya mbanza, mpi bo bikaka yandi pene-pene ya lufwa. Kansi, Polo vandaka na luzingu! Na mbala mosi, bampangi kwisaka kusadisa yandi mpi bo nataka yandi na mbanza. Na nima, Polo vutukaka na Antioshe.

Na mvu 49 T.B., Polo salaka nzietelo ya nkaka. Ntangu yandi vutukaka sambu na kutala bampangi ya Asie Mineure, yandi kwendaka kulonga nsangu ya mbote ntama kibeni, tii na Eropa. Yandi kwendaka  na Atene, na Efezo, na Filipi, na Tesalonika mpi na bisika ya nkaka. Silasi, Luka, mpi leke mosi ya bakala, zina na yandi Timoteo, salaka nzietelo ti Polo. Bo salaka kumosi sambu na kukangula mabundu mpi kusadisa yo na kukuma ngolo. Polo salaka mvula mosi ti ndambu na Korinto, sambu na kupesa bampangi kikesa. Yandi samunaka, longaka, mpi sonikilaka mabundu mingi mikanda. Yandi vandaka mpi kusala kisalu ya kutunga batenta. Na nima, Polo vutukaka na Antioshe.

Na mvu 52 T.B., Polo salaka nzietelo na yandi ya tatu; yandi yantikaka na Asie Mineure. Yandi kwendaka ntama na nordi tii na Filipi mpi na nima yandi kwendaka na Korinto. Polo salaka bamvula mingi na Efezo; yandi vandaka kulonga, kubelula, mpi kusadisa dibundu. Yandi vandaka mpi kusala badiskure konso kilumbu na nzo-nkanda mosi. Bantu mingi waka mpi salaka bansoba na luzingu na bo. Nsuka-nsuka, na nima ya kulonga nsangu ya mbote na bansi mingi, Polo kwendaka na Yeruzalemi.

“Yo yina, beno kwenda mpi beno kumisa bantu ya makanda yonso balongoki.”—Matayo 28:19